इलाम– इलाम र पाँचथरको सीमावर्ती क्षेत्र राँके बजारमा गएराति आगलागी हुँदा करिब २ करोड मूल्य बराबरको क्षति भएको छ।
देउमाई नगरपालिका–१ का स्थानीय ठालुराम श्रेष्ठको घरमा भएको आगलागीमा ३ वटा सटर (पसल) साथै घर जल्दा सो मूल्य बराबरको क्षति भएको हो। विद्युत चुहिएर आगो लागेको हुन सक्ने प्रहरीको अनुमान रहेको छ।
बेलुका ८ बजे सुरु भएको आगलागी ११ बजे राती पाँचथरको फिदिम नगरपालिकाबाट आएको दमकलले नियन्त्रणमा लिएको थियो। दमकलसहित स्थानीय बासिन्दा र सुरक्षाकर्मी समेतको प्रयासमा आगलागी नियन्त्रणमा लिइएको थियो।
आगलागीबाट राँके बजार व्यवस्थापन समितिका अध्यक्षसमेत रहेका श्रीबहादुर विष्टको जुत्ता, चप्पल र फेन्सी पसल साथै तीलविक्रम बस्नेतको खाद्यान्न एवं किराना पसल जलेर पूर्णरुपमा नष्ट भएको बताइएको छ।
आगलागीमा २ वटा एलपी ग्यास पड्किएको स्थानीय बासिन्दाले जानकारी दिए। पानी परेकाले पनि आगलागी नियन्त्रणमा सहज भएको उनीहरूको भनाइ छ।
राति भएको आगलागीबाट क्षतिको यकिन विवरण भने आइनसकेको बताइएको छ।
मेची राजमार्गसँगै जोडिएको राँके बजारमा करिब २ वर्ष अगाडि पनि आगलागी हुँदा केही घर जलर नष्ट भएका थिए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
