काठमाडौं- संघीय संसद्ले नेपाली दूतावास भएका देश र नेपालमा आवासीय राजदूतावास रहेका मुलुकमा संसदीय मैत्री समूह गठनको प्रक्रिया सुरु गरेको छ। सभामुख कृष्णबहादुर महराले नेपाल–अष्ट्रेलिया संसदीय मैत्री समूहमा रहने सांसदको नाम घोषणा गरेर आइतबार उक्त प्रक्रियाको शुभारम्भ गर्रेका छन्।
नेकपाका नेता एवं सांसद भीम रावलको नेतृत्व रहने नेपाल–अष्ट्रेलिया संसदीय मैत्री समूहमा सांसदहरु योगेश भट्टराई, जयपुरी घर्ती, पुष्पा भुसाल, सुरेन्द्रराज पाण्डे, लेखराज भट्ट र उमेश श्रेष्ठलगायत छन्। केही सांसदको नाम अझैं आउने क्रममा रहेको र नाम आइसकेपछि समूहले पूर्णता पाउने सभामुख महराले बताए।
सभामुख महराका अनुसार पहिलो चरणमा भारत, चीन र अष्ट्रेलियाका लागि संसदीय मैत्री समूह गठन हुनेछ। प्रत्येक मुलुकका लागि गठन हुने संसदीय मैत्री समूहमा १५ जना सदस्य रहनेछन्।
नेपाल–अष्ट्रेलिया संसदीय मैत्री समूहको शुभारम्भ गर्दै सभामुख महराले मैत्री समूहले दुई देशबीच कूटनीतिक सम्बन्ध प्रगाढ तुल्याउन योगदान पुर्याउने विश्वास व्यक्त गरे।
उनले भने ‘संसदीय मैत्री समूहमा विभिन्न राजनीतिक दलका शीर्ष नेतृत्वको समेत सहभागिता होस् भन्ने हामी चाहन्छौं। यस्ता समूहको गठनबाट दुबै देशका संसदीय अभ्यासको अनुभव आदानप्रदान गर्न योगदान पुग्नेछ।’
अष्ट्रेलियाका लागि नेपाली राजदूत लक्की शेर्पाले नेपाल र अष्ट्रेलियाबीचको सम्बन्ध विस्तारमा संसदीय मैत्री समूह गठनको घोषणा नौलो र ऐतिहासिक क्षण भएको बताए। शेर्पाका अनुसार अष्ट्रेलियाको संसदले नेपालका लागि ३७ सदस्यीय संसदीय मैत्री समूह गठन गरिसकेको छ।
नेपालका लागि अष्ट्रेलियाका राजदूत पिटर बडले दुवै देशमा लोकतन्त्रको विकासका लागि भइरहेको अभ्यासबारे जानकारी गर्न, संसदीय अनुभव आदानप्रदान गर्न, विकासका क्षेत्र पहिल्याउन तथा पर्यटन प्रवद्धन गर्नसमेत मैत्री समूहले योगदान पुर्याउने विश्वास व्यक्त गरे।
उक्त घोषणा समारोहमा संघीय संसदमा प्रतिनिधित्व गर्ने राजनीतिक नेताहरु, संघीय संसद् सचिवालयका महासचिव तथा नेपालका लागि अष्ट्रेलिया दूतावासका प्रतिनिधिको सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
