काठमाडौं– अचार भनेर टुरिष्ट बसमा पठाएको कार्टुनबाट ५२ लाख ७५ हजार नक्कली रुपैयाँ बरामद भएको छ। नक्कली रकम कारोबारमा संलग्न भएको आरोपमा ९ जनालाई प्रहरीले पक्राउ गरेको छ।
जिल्ला प्रहरी परिसर काठमाडौं, भक्तुर र प्रहरी वृत्त थानकोटको टोलीले उक्त रकम बरामद गर्दै पक्राउ परेका ९ जनालाई शुक्रबार सार्वजनिक गरेको छ।
पक्राउ पर्नेहरूमा सिन्धुपाञ्चोक कोठे बस्ने २५ वर्षीय सुशील कार्की, सिन्धुपाञ्चोक सुनकोशी गाउँपालिका–६ बस्ने २३ वर्षीय शिव भण्डारी, सिन्धुपाञ्चोक बलेफी गाउँपालिका–७ बस्ने ४० वर्षीय अर्जुन सुवेदी, सिन्धुपाञ्चोक सुनकोशी गाउँपालिका–६ बस्ने २३ वर्षीय मिलन भण्डारी, सुनकोशी गाउँपालिका–६ बस्ने २४ वर्षीय श्रीकृष्ण भण्डारी छन्।
त्यसैगरी झापा कमल गाउँपालिका–३ बस्ने २९ वर्षीय युवराज राई, अछाम मेल्लेख गाउँपालिका–३ बस्ने २१ वर्षीय अर्जुन बुढा, गुल्मी वाडागाउँ गाउँपालिका–२ बस्ने ३४ वर्षीय सागर आचार्य र नवलपरासी सरावल गाउँपालिका–१ बस्ने ५३ वर्षीया पार्वती नेपाली रहेका छन्।
उनीहरूमध्ये अर्जुन सुवेदी उपर चोरी, बैंकिङ कसुर, ठगी तथा ठगी र एक्सटर्सन गरी ७ वटा मुद्दासमेत चलेको खुल्न आएको छ। चन्द्रागिरी नगरपालिका–२ नागढुङ्गास्थित चेकप्वाइन्टमा लुम्बिनीबाट काठमाडौंतर्फ आउँदै गरेको लु १ प ५ नम्बरको पर्यटक बसबाट उक्त रकम बरामद भएको हो।
प्रहरी प्रभाग नागढुङ्गाबाट खटिएको प्रहरीले जाँच गर्दा ढोका छेउको सामान राख्ने डिक्कीमा र्याप गरी राखिएको चाउचाउको कार्टुनभित्र एक हजार दरका ३ हजार ५ सय ७३ थान गरी जम्मा ३५ लाख ७३ हजार नक्कली रूपैयाँ फेला परेको थियो।
उक्त बसका चालक तथा सह–चालकलाई नियन्त्रणमा लिई थप सोधपुछको क्रममा उक्त कार्टुन लुम्बिनी बसपार्कबाट एक जना मानिसले अचार हो काठमाडौं लगिदिनु काठमाडौं बसपार्कमा रिसिभ गर्न मानिस आउँछ भनी पठाएको खुल्न आएको परिसर काठमाडौंका एसपी तथा प्रवक्ता कुमोध ढुंगेलले जानकारी दिए।
त्यसपछि प्रहरी वृत्त थानकोटसमेतबाट खटिएको प्रहरी टोलीले काठमाडौं गोंगबु बसपार्क र भक्तपुर चाँगुनारायण नगरपालिका–४ बुढाथोकी गाउँबाट थप नक्कली जस्तो देखिने एक हजार दरका १ हजार ७ सय २ थान गरी जम्मा १७ लाख २ हजार रूपैयाँसहित उनीहरूलाई पक्राउ गरेको हो।
उनीहरुबाट कम्प्युटर सेट एक थान, पेपरकटर मेसिन एक थान, कलर प्रिन्टर एक थान, प्रिन्ट पेपर एक रिम, खुला पेपर २ सय पेज, विभिन्न रङका मसी, कलर केमिकल प्लाष्टिकको बोतल २ वटा केमिकल बरामद भएको छ।
त्यसैगरी डेकोरेटिङ पाउडर ४ पत्ता, र्यापलिङ टेप एक बण्डल, एक हजार दरको नोटको साईजको पेपर ९ थान, बा ६३ प २०७५ नम्बर, बा प्र ०२–०३९प ९४०७ नम्बर, बा प्र ०२–०३८ प ५६४२ नम्बरको मोटरसाइकल, बा प्र ०२–०२८ प १३०६ नम्बरको स्कुटर, मोबाइल १२ थान र अर्जुन सुवेदीको नाममा जिल्ला अदालत चितवनको तारेख पर्चा एक थान प्रहरीले बरामद गरेको छ।
उनीहरू उपर मुद्रासम्बन्धी कसुरमा जिल्ला अदालत काठमाडौंबाट ५ दिन म्याद थप अनुमति लिई प्रहरी वृत्त थानकोटबाट थप अनुसन्धान भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
