अविरल वर्षाका कारण महोत्तरीको बर्दिबास नगरपालिका क्षेत्रमा मंगलबार डुबानमा परेको बस्ती। (तस्बिर : गोपालप्रसाद बराल/रासस)
काठमाडौं– केही दिन अगाडिसम्म तराईका जिल्लामा खडेरी थियो। पानी नपर्दा किसानहरुले रोपाइँ गर्न सकेका थिएनन्। साउनको तेस्रो साता लाग्दा समेत रोपाइँ गर्न नपाएर किसान चिन्तित थिए। धानको बिउ ब्याडमै सुक्दै थियो।
सोमबार रातिदेखि भने देशभर नै वर्षा भइरहेको छ। खडेरीका कारण आक्रान्त तराईमा अहिले भारी वर्षाका कारण डुवान भइरहेको छ। सोमबारदेखिको वर्षाका कारण पश्चिम तराईको कैलालीदेखि पूर्वका जिल्लामा पनि डुवान भइरहेको छ।
कैलालीमा डुवानका कारण साढे ४०० भन्दा धेरै परिवार प्रभावित भएका छन्। लुम्बिनी प्रदेशको दाङ, बाँके र बर्दियामा पनि डुवान भएको छ। यस्तै, चितवनको नारायणी र राप्ती नदीमा जलसतह बढेको छ। मध्य तथा पूर्वी तराईका जिल्ला भएर बहने साना–ठूला नदीहरुमा पानीको बहाव र जलसतह बढेको छ।
मंगलबार दिउँसो सर्लाही, रौतहट, सिन्धुली, झापा, इलाम, मोरङ, सुनसरी, सप्तरी, सिराहा, धनुषा, महोत्तरी, बारा, पर्सा, चितवन, मकवानपुर, धादिङ, काठमाडौं ललितपुर, भक्तपुर, नुवाकोट नवलपरासी (पूर्व), नवलपरासी (पश्चिम), तनहुँ, स्याङजा, रुपन्देही, पाल्पा, कपिलवस्तु, दाङ, बाँके, बर्दिया, कैलाली कञ्चनपुर र आसपास भइ बहने केही स-साना नदीहरूमा आकस्मिक बहावको जोखिम रहने बाढी पूर्वानुमान महाशाखाले जनाएको छ।
जल तथा मौसम विज्ञान विभागका मौसमविद् मनसुनको न्यून चापीय रेखा सरदर स्थानभन्दा उत्तरतिर (नेपाल नजिक) भएका कारण अहिले देशभर नै वर्षा भइरहेको बताउँछन्।
मौसमविद् गोविन्द झा अझै ३ दिनसम्म देशभर नै वर्षा हुने सम्भावना रहेको बताउँछन्। मधेस र कोशी प्रदेशमा सबैभन्दा धेरै (भारी) वर्षाको सम्भावना रहेको झाले जानकारी दिए।
‘तराई क्षेत्रमा हिजो (सोमबार)देखि वर्षा भएको छ। अस्तिसम्म खडेरीले सुख्खा लागेको थियो। अहिले चाहिनभन्दा बढी पानी परेको छ,’ झाले भने।
मौसम पूर्वानुमान महाशाखाका अनुसार आज (मंगलबार) दिउँसो कोशी, मधेस, बागमती, गण्डकी र लुम्बिनी प्रदेशका धेरै र बाँकी प्रदेशको केही स्थानहरूमा हल्कादेखि मध्यम वर्षाको सम्भावना रहेको छ। मधेस, बागमती र गण्डकी प्रदेशका थोरै तथा कोशी र लुम्बिनी प्रदेशका एक-दुई स्थानमा मेघ गर्जन तथा चट्याङसहित भारी वर्षाको सम्भावना रहेको छ। मधेस र बागमती प्रदेशका एक-दुई स्थानमा धेरै भारी वर्षाको पनि सम्भावना रहेको छ।
मंगलबार राति कोशी, मधेस, गण्डकी र लुम्बिनी प्रदेशका धेरै र बाँकी प्रदेशहरुको केही स्थानहरूमा हल्कादेखि मध्यम वर्षाको सम्भावना रहेको छ। मधेस, गण्डकी, लुम्बिनी प्रदेशका थोरै स्थानहरुमा मेघ गर्जन/चट्याङ्ग सहित भारी वर्षाको सम्भावना रहेको छ। कोशी प्रदेशका थोरै स्थानहरूमा हावा हुरीको पनि सम्भावना रहेको छ।
बुधबार र बिहीबार पनि देशका केही ठाउँमा भारी तथा अत्यधिक वर्षाको सम्भावना छ। बुधबार दिउँसो बागमती, गण्डकी र लुम्बिनी प्रदेशका एक-दुई स्थानमा मेघ गर्जन तथा चट्याङसहित भारी वर्षाको सम्भावना छ। बिहीबार कोशी, गण्डकी र लुम्बिनी प्रदेशका एक-दुई स्थानमा मेघ गर्जन तथा चट्याङसहित भारी वर्षाको सम्भावना छ।
मौसमविद् झा ३ दिनपछि मौसम सामान्य बन्दै जाने बताउँछन्। ‘अहिले नेपालमा मनसुनी वायुका साथै बंगलादेशको उत्तरी भू–भाग तथा आसपासमा रहेको न्यून चापीय प्रणालीको प्रभाव छ। मनसुनको न्यून चापीय रेखा नेपाल नजिक रहेको छ। त्यसकारण भारी वर्षात भइरहेको हो। न्यून चापीय रेखा तीन दिनपछि विस्तारै सरेर जान्छ,’ मौसमविद् झाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
