काठमाडौं – राजधानीको नयाँ बानेश्वरमा सोमबार गोली हानी हत्या गरिएका निर्माण व्यवसायी शरदकुमार गौचनको हत्याका विषयमा सांसदहरुले गृहमन्त्रीको जवाफ मागेका छन्।
सरकारको सुरक्षा व्यवस्थामाथि आलोचना गर्दै सांसदहरुले गृहमन्त्री जर्नादन शर्मासँग जवाफ मागेका हुन् । नेपाली कांग्रेसका सांसद दीपक गिरीले राजधानीको मुख्य ठाउँमा दिनदहाडै हत्याको घटना कसरी भयो भन्दै त्यसको जवाफ सदनमा दिन गृहमन्त्री शर्मासँग माग गरे।
यस्तै, नेकपा एमालेका सांसद जनार्दन ढकालले सुरक्षा व्यवस्था कमजोर रहेको भन्दै गौचन हत्याकाण्डका दोषी तत्काल पत्ता लगाउन माग गरे । नेकपा माओवादी केन्द्रका सांसद रामनारायण विडारीले पनि घटनाको भत्र्सना गर्दै तत्काल व्यवसायीलाई सुरक्षा दिन माग गरे ।
यस्तै, फोरम लोकतान्त्रिकमा सांसद योगेन्द्र चौधरी गौचन हत्याकाण्डबारे छानबिन गर्न उच्चस्तरीय छानबिन समिति गठन गर्न माग गरे । दिनदाहडै यसरी व्यवसायीको हत्या हुँदा मुलुकुमा व्यवसाय गर्ने वातावरणमा असर परेको उनले बताए।
कांग्रेसका सांसद रोमी गौचनले भने, ‘यस्ता घटनाहरु किन भइरहेका छन् ? अपराधीहरु किन खुलेआम हिँड्ने गरेका छन् ? यी सबैको जवाफ गृहमन्त्रीले सदनमा दिनुपर्छ।’
सांसद गौचनले प्रहरी अनुसन्धान प्रभावकारी बनाउन र अपराधी जहाँसुकैको भए पनि संरक्षण नदिई कारबाहीको दायरामा ल्याउन समेत माग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
