नक्कली उपसचिवको धन्दा : मासिक २ लाख घर भाडामा 'डब्लूएफपी' को कार्यालय, राष्ट्रिय दैनिक पत्रिकामा विज्ञापन निकाल्दै ठग्दै

सुरक्षा/अपराध

नेपाल लाइभ सोमबार, साउन ८, २०८० १६:५८

काठमाडौं- विश्व खाद्य कार्यक्रम (डब्लूएफपी)को कार्यालय खोलेर ठगी धन्दा चलाएको आरोपमा प्रहरीले दुई जनालाई पक्राउ गरेको छ।

पक्राउ पर्नेहरुमा नक्कली उपसचिव बनेका सिन्धुपाल्चोकको मेलम्ची नगरपालिका–९ घर भई काठमाडौंको गोकर्णेश्वर–८ बस्दै आएका ४७ वर्षीय घनश्याम कटुवाल र मकवानपुरको बागमती गाउँपालिका–९ घर भइ काठमाडौं बुढानीलकण्ठ नगरपालिका–५ बस्ने लिलाबहादुर भोलोन छन्।

पक्राउ परेका यी दुई जनासहितको समूहले बढुानीलकण्ठमा घर भाडामा लिएर डब्लूएफपीको अवैध कार्यालय खोलेर ठगी गरेको पाइएको छ। उक्त कार्यालयको नाम 'अन्तर्राष्ट्रिय खाद्य सुरक्षा नेपाल' राखिए पनि अंग्रेजीमा भने WFP लेखिएको थियो। यसरी अन्तर्राष्ट्रिय संस्थाको नाममा कार्यालय खोल्नु गैरकानूनी मानिन्छ।

हाल पक्राउ परेका कटुवालले आफू उपसचिव जयराम केसी भएको बताउँदै सोही अनुसारको परिचयपत्र बनाउने, बोर्ड राख्ने गरेका थिए। उनी आफू कार्यालय प्रमुख भएको समेत बताउँथे।

कार्यालय सञ्चालक तथा शाखा अधिकृतमा पेम्बा तामाङ, जनसम्पर्क अधिकृतमा आकाश राई र प्राविधिक इन्जिनियरमा दीपेश गुरुङको नाम भएको बोर्ड राख्ने र सर्वसाधारणलाई विश्वासमा पारेर ठगी गर्ने गरेको जिल्ला प्रहरी परिसर काठमाडौंका एसएसपी दानबहादुर कार्कीले बताए।

उनीहरुले डब्लुएफपीका नक्कली छाप तथा लेटरप्याण्ड समेत बनाएर काम गरेको खुलेको छ। राजधानी दैनिक पत्रिकामा समेत गत जेठ २९ गते टेण्डर आह्वान भन्दै विज्ञापन छापेर विश्वासमा पार्दै ठगी गरेको खुलेको छ।

यसरी यो समूहले गत जेठ १ गतेदेखि कार्यालय नै खोलेर ठगी धन्दा सुरु गरेको थियो। कार्यालयका लागि चाहिने फर्निचर, खाद्य सामग्रीहरु गरी ६ करोड रुपैयाँ बराबरको सामानका लागि भन्दै गत जेठ ६ गते बोलपत्र आह्वान गरेका थिए।

बोलपत्र तथा विज्ञापन आह्वान भएपछि शंखर अर्यालले स्कार्पियो गाडी भाडामा दिएका थिए भने उनीबाट नगद ६ लाख १२ हजार ५ सय रुपैयाँ समेत यो समूहले ठगी गरेको थियो। उनीहरुले अफिसका लागि भन्दै विश्वबहादुर गुरुङसँग मासिक १ लाख ८० हजार भाडाका दरले घर भाडामा लिएर रकम नै नदिई ठगी गरेको खुलेको छ।

बोलपत्र आह्वानपछि हरिप्रसाद अर्यालले आसयपत्रलाई स्वीकृत गर्दै उनीबाट ४८ लाख ठगी गरेको खुलेको छ। डेस्कटप, कम्प्युटर, ल्यापटप लगायतका सामान गरी ८ लाख ३६ हजार सामान समेत अर्यालबाट नक्कली उपसचिवले लगेर ठगी गरेको प्रहरी वृत्त महाराजगञ्जका डीएसपी अंगुर जिसीले बताए।

नवराज पाण्डेबाट ८५ हजार रुपैयाँ बराबरको स्टेसनरी सामान लगेर ठगी, दीपेन्द्र धरेलबाट कार्यालय स्थापनका लागि भन्दै कार्पेट, पर्दा, कुर्सी, टेवल, दराज लगायतका सामान गरेर १५ लाख ६० हजार रुपैयाँ बराबर ठगी गरेको खुलेको छ।

त्यसैगरी गणेश शाहबाट युनिफमको कपडा र खाद्यान्न टेन्डरको धरौटी रकम वापत ११ लाख २७ हजार ९५० रुपैयाँ लिएर ठगी गरेको पाइएको छ। नक्कली उपसचिवले आफूलाई चढ्न भन्दै विष्णु अर्याल नाम गरेका व्यक्तिसँग कार समेत भाडामा लिएर ठगी गरेका थिए।

नक्कली उपसचिव बनेर ठगी गरेको आरोपमा पक्राउ परेका कटुवाल यसअघि पनि ठगी सम्बन्धी कसुरमा ३ वर्ष जेल बसेर छुटेको पाइएको छ। यसअघि उनले पूर्वका विभिन्न जिल्लाहरुमा आफू सीडीओ, पूर्वआईजीपी, पूर्वसचिव, पूर्वउपसचिव भएको भन्दै ठगी गरेको खुलेको छ।

पक्राउ परेका दुवै जनाविरुद्ध ५ दिनको म्याद थप भई अनुसन्धान सुरु गरिएको परिसरले जनाएको छ।

यो प्रकरणमा तीन जना फरार छन्। प्राविधिक इन्जिनियर बताउने मकवानपुर घर भएका दीपेश गुरुङ भनिने भीम भोलोन, जनसम्पर्क अधिकृत बताउने मकवानपुर नै घर भएका आकाश राई भनिने मिलन तामाङ र कार्यालय सञ्चालक तथा शाखा अधिकृत बताउने पेम्बा तामाङ भन्ने व्यक्ति अहिलेसम्म फरार छन्।

उनीहरुको कार्यालयबाट प्रहरीले विभिन्न दर्जाका टेबल नेम प्लेट, राष्ट्रिय झण्डा, घर भडामा सम्झौता पत्र, विभिन्न स्टेसनरीका सामानहरु, फर्निचरका सामानहरु, प्रिन्टर, कम्प्युटर, खरिद आदेश प्राप्त भएको कागज बरामद गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

राष्ट्रिय स्वार्थ र आर्थिक कूटनीतिलाई उच्च प्राथमिकतामा राख्न मिसन प्रमुखहरूलाई परराष्ट्रमन्त्रीको निर्देशन

पाकिस्तानमा सैन्य कारबाहीमा २२ आतङ्ककारी मारिए

भाषा, थर र जातजाति छुट्याउन उच्च्चस्तरीय आयोग गठन गर्न संसदीय समितिलाई सुझाव