काठमाडौं– काठमाडौंको बालुवाटारस्थित ललिता निवासको सरकारी जग्गा हिनामिना प्रकरणमा अहिलेसम्म १९ जना आरोपी प्रहरी हिरासतमा पुगेका छन्। गत असार १२ गतेबाट पक्राउ गर्न सुरु गरेको केन्द्रीय अनुसन्धान ब्यूरो (सीआईबी)ले अहिलेसम्म यो प्रकरणमा संलग्न भएको आरोपमा २० जनालाई पक्राउ गरेकोमा १९ जना हिरासतमा छन्।
पछिल्लो समय आइतबार जोरपाटी क्षेत्रको नयाँबस्तीस्थित आफ्नै निवासबाट नापी विभागका तत्कालीन कर्मचारी तथा अमिन अरुण कुमार श्रेष्ठलाई सीआईबीले पक्राउ गरेसँगै पक्राउ पर्नेको संख्या १९ पुगेको हो। सञ्चार मन्त्रालयका सचिव कृष्णबहादुर राउत पनि पक्राउ परे पनि उनलाई हिरासत बाहिर राखेर अनुसन्धान गर्नुभनेपछि उनी हिरासतमुक्त छन्। अहिले भने १९ जना प्रहरी हिरासतमा छन्।
सरकारी जग्गा व्यक्तिको कायम गर्दा सरकारी दस्तखत तथा कागजात कीर्ते प्रकरणमा अनुसन्धान सुरु गरेको सीआईबीले ४०६ जनालाई पक्राउ गर्न अनुमति लिएको छ। जसमध्ये पक्राउ १९ जना अहिले हिरासतमा रहेका हुन्।
को–को छन् प्रहरी हिरासतमा ?
| १ |
अरुणकुमार श्रेष्ठ |
तत्कालीन अमिन |
| २ |
मीनबहादुर गुरूङ |
भाटभटेनी सुपरमार्केटका सञ्चालक |
| ३ |
सुधीरकुमार शाह |
निर्वाचन आयोगका पूर्व आयुक्त |
| ४ |
धर्मप्रसाद गौतम |
कर्मचारी |
| ५ |
लोकहरि घिमिरे |
समरजंग कम्पनीका तत्कालीन प्रमुख |
| ६ |
रमेशकुमार पोखरेल |
समरजंग कम्पनीका तत्कालीन प्रमुख |
| ७ |
देवनारायण महर्जन |
नक्कली मोही |
| ८ |
ध्रुव अर्याल |
तत्कालीन नापी अधिकृत |
| ९ |
गोपाल कार्की |
तत्कालीन नापी अधिकृत |
| १० |
शिवजी भट्टराई |
कामनपा–५ का तत्कालीन वडा सचिव |
| ११ |
बाबुराजा महर्जन |
नक्कली मोही |
| १२ |
घमानकुमार कार्की |
नापी कार्यालयका तत्कालीन कर्मचारी |
| १३ |
विनोद पौडेल |
समरजंग कम्पनीका तत्कालीन सहायक लेखापाल |
| १४ |
बालकृष्ण श्रेष्ठ |
भौतिक योजना मन्त्रालयका तत्कालीन सिनियर डिभिजन इन्जिनियर |
| १५ |
रूद्रप्रसाद श्रेष्ठ |
भूमि व्यवस्था विभागका तत्कालीन महानिर्देशक |
| १६ |
योगराज पौडेल |
मालपोत कार्यालयका तत्कालीन नायब सुब्बा |
| १७ |
नारायणदास मिश्र |
मालपोत कार्यालयका तत्कालीन खरिदार |
| १८ |
केशव तुलाधर |
बिचौलिया |
| १९ |
कलाधर देउजा |
मालपोत कार्यालय डिल्लीबजारका तत्कालीन प्रमुख |
पक्राउ परेकासहितहरुको समूहले विभिन्न ४ चरणमा ललिता निवासको सरकारी जग्गा व्यक्तिको नाममा पुर्याएर हत्याएको सीआईबीले जनाएको छ।
अनुसन्धानबाट खुलेअनुसार २०४९, २०६२, २०६७ र २०६९ सालमा गरी ४ पटकमा सरकारी जग्गालाई व्यक्ति र गुठीको नाममा ल्याएर हत्याइएको देखिएको छ। २०१८ सालमा तत्कालीन श्री ५ को सरकारले राज्यविरुद्ध गतिविधि गरेको भन्दै सुवर्ण शमशेर राणा र उनको परिवारको जग्गा जफत गरेको थियो। त्यसपछि २०२१ सालमा सरकारलाई जग्गा आवश्यक रहेको भन्दै ६ वटा दरबार अधिग्रहण गरिएको थियो।
सरकारी प्रयोगमा आवश्यक हुने भन्दै २०२१ मंसिर १७ गते भरत समशेर, सुवर्ण समशेर लगायतको नामको घरजग्गा क्षतिपूर्ति दिएर तत्कालीन गृह पञ्चायत मन्त्रालयले अधिग्रहण गरेको थियो।
२०१८ मा जफत र २०२१ मा अधिग्रहण गरिएको जग्गामध्ये केही जग्गा नै २०४७ सालपछि व्यक्तिको नाममा लगेर हत्याएको पाइएको छ। २०४७ सालको अन्तरिम सरकारका प्रधानमन्त्री कृष्णप्रसाद भट्टराई नेतृत्वको सरकारले जफत गरिएका जग्गामध्ये प्रजातन्त्र ल्याउन लड्ने, हदबन्दीभित्र पर्ने र गृह मन्त्रालयको टोलीले छानबिन गरेपछि फिर्ता गर्नुपर्ने देखिएमा फिर्ता गर्ने निर्णय गरेको थियो। त्यही निर्णयलाई देखाउँदै तत्कालीन सरकारले तोकेका तीनवटै मापदण्ड पूरा नगरी व्यक्ति तथा गुठीको नाममा ल्याएर १४० रोपनी भन्दा बढी सरकारी जग्गा हत्याइएको पाइएको सीआईबीको निष्कर्ष छ।
अन्तरिम सरकारको उक्त निर्णयपछि मालपोतमा लेखनदासको काम गर्दै आएका रामकुमार सुवेदी र शोभाकान्त ढकालको योजनामा नक्कली मोही खडा गरेर २०४९ सालदेखि सरकारी जग्गा व्यक्तिको नाममा ल्याइएको खुलेको छ। यसको मुख्य योजनाकार नै सुवेदी दम्पत्ति र ढकाल रहेको सीआईबीले बताएको छ।
त्यसपछि २०६२ सालमा सुनिती राणा र हेमाद्री शमशेर राणाको नाममा जग्गा ल्याइएको थियो। त्यसबेला सुनितीको नाममा १२ आना जग्गा छुट भन्दै दर्ता गराइएको खुलेको छ।
२०६७ सालमा भने सभामुख, मुख्यसचिव निवासमा बाटो निकाल्ने नाममा २७/२८ रोपनी सरकारी जग्गा मासिएको खुलेको छ। २०६९ सालमा भने सरकारी जग्गा गुठीको नाममा ल्याएर हत्याइएको पाइएको सीआईबीको अनुसन्धानले देखाएको छ। यसरी ४ पटकमा १४३ रोपनी सरकारी जग्गा व्यक्तिको नाममा ल्याइएको अनुसन्धानले देखाएको छ।
ललिता निवास जग्गा प्रकरणमा अख्तियार दुरुपयोग अनुसन्धान आयोगले २०७६ माघमा १७५ जनालाई प्रतिवादी बनाउँदै भ्रष्टाचार मुद्दा दायर गरिसकेको छ। ४ पटकमा गरी सरकारी जग्गा व्यक्तिको नाममा ल्याइएको पाइएकाले लिखतसम्बन्धी चार वटा कीर्ते कसुरमा मुद्दा चलाउने तयारी सीआईबीको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
