काठमाडौं– नक्कली डाक्टर र डीएसपी बनेर ठगी धन्दा चलाउँदै आएका युवाविरुद्ध जिल्ला अदालत काठमाडौंमा मुद्दा दायर भएको छ। नक्कली डाक्टर र डीएसपी बनेर ठगी गर्ने कञ्चनपुर घर भएका बलराम भनेर चिनिने २७ वर्षीय मातृका प्रसाद जैसीविरुद्ध ठगी मुद्दा दायर भएको हो।
विभिन्न युवती तथा युवाहरुबाट उनले १ करोड ७ लाख ३८ हजार रुपैयाँ ठगी गरेको भन्दै सोहीअनुसार बिगो कायम गर्दै अदालतमा मुद्दा दायर भएको छ। जैसीलाई ठगी आरोपमा जिल्ला प्रहरी परिसर काठमाडौंको टोलीले गत असार ७ गते पक्राउ गरेको थियो।
उनले ललितपुरमा क्लिनिक सञ्चालन गर्ने एक युवतीलाई नक्कली डाक्टर बनेर ठगी गरेका थिए। आफू वीर अस्पतालको १२औं तहको डाक्टर भएको बताउँदै एप्रोन लगाएर युवतीसँग भिडियो कलमा कुराकानी गरेर विश्वास दिलाउने गरेका थिए।
‘तिमी एकदमै मन पर्यो। प्रेम गरौं। विवाह गरौं,’ ती युवतीलाई झुक्याएर नक्कली डाक्टर जैसीले प्रेम समेत गरेका थिए। उनीहरुबीच विवाह हुने समेत कुराकानी भइसकेको थियो। यसैबीच ती युवतीलाई नक्कली डाक्टरले कौशलटारस्थित आफ्नो कोठामा लैजाने माया प्रेम गरेजस्तो गर्ने समेत गरेका थिए।
प्रेम सम्बन्धमा रहेको केही समयपछि आफूलाई केही रकम चाहिएको भन्दै पटक पटक गरेर ४० लाख रुपैयाँ ती युवतीबाट नक्कली डाक्टर जैसीले लिएका थिए। उनले मिटररब्याजमा रकम लिएर व्यवसाय गरेकाले तिर्नुपर्यो भन्दै रकम मागेपछि पटक पटक गरेर ती युवतीले जैसीलाई ४० लाख रुपैयाँ दिएकी थिइन्।
पैसा पाएपछि पनि उनीसँग तस्बिर, भिडियो खिच्ने, शारीरिक मानसिक यातना दिन थालेपछि जैसीको बारेमा सोधपुछ गर्दा उनी नक्कली डाक्टर भएको ती युवतीले थाहा पाएकी थिइन्। आफूले भनेको नमाने आत्महत्या गरी मरिदिन्छु भन्दै युवतीलाई ब्ल्याकमेलिङ समेत गर्न थालेपछि उनले प्रहरीमा जाहेरी दिएकी थिइन्। त्यसपछि नक्कली डाक्टर जैसी पक्राउ परेका थिए।
जैसी पक्राउ परेको जानकारी पाएपछि उनीबाट ठगिएको भन्दै प्रहरीमा थप पीडित पुगेका थिए। प्रहरीका अनुसार जैसीले ती युवतीसँगै अर्का युवक जगदीश बमलाई समेत यसैगरी ठगी गरेका थिए। बमलाई जैसीले आफू वीर अस्पतालको ११औं तहको सहसचिव स्तरको डाक्टर भएको र नर्भिकसँगै अरु अस्पतालमा पनि गाइनो (प्रसूति र स्त्री रोग)सम्बन्धी हेर्छु भन्दै विश्वासमा पारेका थिए।
प्रहरीका अनुसार उनले सानो उमेरै मेहनत गरेकाले सहसचिव भएको र अब चाँडै नै स्वास्थ्य मन्त्रालयको सचिव हुन्छु समेत भनेर नक्कली परिचय दिएर विश्वासमा पार्ने काम गरेका थिए। बंगलादेशबाट एमबीबीए र एमडी गरेको गाइनो स्पेसलिस्ट भएको बताउँदै उनले सापट भन्दै पटक–पटक गरेर २ लाख रुपैयाँ लिएर ठगी गरेको पाइएको छ।
अर्की एक युवती शान्ति श्रेष्ठलाई पनि जैसीले यसैगरी ठगी गरेको पाइएको छ। शान्तिलाई जैसीले आफू झापामा औषधि उद्योग चलाउने व्यक्ति भएको र डाक्टर समेत भएको भन्दै नक्कली परिचयपत्र समेत देखाएर ठगी गरेको पाइएको छ। शान्तिबाट जैसीले ५७ लाख ७ हजार रुपैयाँ ठगी गरेको पाइएको छ। उक्त रकम जैसीले आफ्नो सँगै पुण्यप्रसाद जैसीको खातामा हालिलिएका थिए।
अनिल श्रेष्ठ नाम गरेका व्यक्तिलाई पनि जैसीले वीर अस्पतालको डाक्टर भन्दै ठगी गरेको पाइएको छ। बेतलबी बिदामा बसेकाले तलव नआएको र स्वास्थ्य सामाग्री खरिद गर्न रकम चाहिने बताएका थिए। जैसीले आफू चित्रकला एक्सपोर्ट इम्पोर्ट प्रालि नामक कम्पनीको सञ्चालक तथा शेयरधनी समेत भएकाले कम्पनी सञ्चालनका लागि कोठा चाहिने भन्दै अनिलसँग मासिक साढे ३१ हजार रुपैयाँका दरले ४ वटा कोठा भाडामा लिएका थिए।
तर २ वर्षसम्म बस्दा समेत १ रुपैयाँ पनि कोठाभाडा नदिइ ५ लाख ३५ हजार ५ सय रुपैयाँ बराबर ठगी गरेको पाइएको जिल्ला प्रहरी परिसर काठमाडौंका एसपी तथा प्रवक्ता सीताराम रिजालले जानकारी दिए।
अर्का हरिश बहादुर चन्द नाम गरेका व्यक्तिलाई पनि जैसीले आफू वीर अस्पतालको १२औं तहको डाक्टर भन्दै ठगी गरेको खुलेको छ। हरिशबाट २ लाख ५३ हजार ६१५ रुपैयाँ ठगी गरेका थिए।
अर्का अमरबहादुर बिष्टलाई भने उनले डीएसपी नक्कली डीएसपीको परिचय दिँदै ठगी गरेको खुलेको छ। प्रहरी हवल्दारबाट अवकाश लिइ बसेका बिष्ट पठाओ राइडर बनेका थिए। पठाओ चलाउने क्रममा बिष्टले उनलाई कौशलटारबाट महाराजगञ्ज पुर्याएका थिए। सोही क्रममा उनीहरुबीच चिनजान भएको थियो। त्यतिबेला बिष्टलाई जैसीले आफू नेपाल प्रहरी अस्पतालको डाक्टर (प्रहरी निरीक्षक) भएको बताएका थिए।
केही समयपछि जैसीले अमरलाई फोन गरी आफू डीएसपीमा बढुवा भएको जानकारी समेत गराएका थिए। पछि बैंकको किस्ता तिर्नका लागि २५ हजार ९३० रुपैयाँ चाहिने भन्दै खातामा हाल्न लगाएर ठगी गरेको खुलेको छ।
यसरी ठगी गरेको पैसाले उनले ४० लाख रुपैयाँ हालेर बागमती प्रदेश ०२७ च २८८४ नम्बरको गाडी किनेर समेत चढेर हिँड्थे। जैसीले ६ जनाबाट १ करोड रुपैयाँ भन्दा बढी ठगी गरेको पाइएको प्रहरीले जनाएको छ। यो ठगी प्रकरणमा जैसीसँगै बिरबल तामाङ र पुण्यप्रसाद जैसी समेतको संलग्नता रहेको भन्दै उनीहरुलाई पनि प्रतिवादी बनाइएको छ। उनीहरुविरुद्ध मुलुकी फौजदारी अपराध संहिताको दफा २४९ को उपदफा (१) र उपदफा (२) बमोजिमको कसुरमा मुद्दा दर्ता गरिएको छ।
विष सेवनमार्फत् २ प्रेमिकाको आत्महत्या
अहिले ठगी आरोपमा मुद्दा चलेका जैसी यसअघि भने दुई प्रेमिकाको आत्महत्या दुरुत्साहनमा ६ वर्ष जेल बसेका व्यक्ति भएको खुलेको छ। प्रहरी अनुसन्धानबाट खुलेअनुसार यसअघि २०७० सालमा कैलालीको धनगढीमा कलेज पढ्दा जैसीले एकसाथ २ प्रेमिका बनाएका थिए। २ जनासँगको प्रेमबारे एक–अर्की प्रेमिकाले थाहा पाएपछि विवादले चरम रुप लियो। त्यसपछि जैसीले आइडिया निकालेछन्– तीनै जना सँगै विष पिएर आम्हत्या गरौं।
उनले दुई जनै प्रेमिकालाई विष सेवन गराए। तर आफूले भने नक्कली विष पिए। २ प्रेमिकाको विष सेवनबाट मृत्यु भयो। उक्त घटनामा जैसी ६ वर्ष जेल बसेर छुटेका व्यक्ति भएको परिसर काठमाडौंका एसएसपी दानबहादुर कार्कीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1687176507.jpg)
-1749208143.png)
-1749200817.png)
