काठमाडौं– भिजिट भिषामा युरोप छिरेर रसियन आर्मीमा भर्ती हुने गरेको पाइएको छ। पोर्चुगल लगायतका देशमा भिजिट भिषामा जाने र त्यहाँबाट रुस पुगेर रसियन आर्मीमा भर्ती हुने गरेको पाइएको हो।
पछिल्लो समय युक्रेन–रुस युद्धका कारण नेपाली युवाहरु रुस पुगेर रसियन आर्मीमा भर्ती हुने गरेको पाइएपछि प्रहरीले भिजिट भिषामा कडाइ गरेको छ। भिजिट भिषामा युरोपका विभिन्न देश हुँदै रुस पुगेर आर्मीमा भर्ती हुने गरेको पाइएपछि मानव बेचबिखन अनुसन्धान ब्यूरोले त्रिभुवन अन्तर्राष्ट्रिय विमानस्थलमा कडाइ गरेको हो।
२४ सैं घण्टा ब्यूरोका सादा पोसाकका प्रहरी खटाएर कडाइ गरिएको ब्यूरोका प्रमुख तथा एसएसपी जीवन श्रेष्ठले नेपाल लाइभलाई जानकारी दिए। ‘भिजिट भिषामा सिधै रुस जानेभन्दा पनि युरोपका अन्य देश हुँदै रुस पुगेर रसियन आर्मीमा भर्ती हुने गरेको सूचना पाएपछि हामीले युरोपका भिजिट भिषामा विशेष निगरानी राखेका छौं’, एसएसपी श्रेष्ठले नेपाल लाइभसँग भने।
भारत र बेलायतबाहेक अन्य देशसँग नेपालले सैन्य भर्नामा सम्झौता गरेको छैन। नीतिगत रुपमा रसियन सेनामा भर्ती हुन नेपालीले मिल्दैन। तर अध्ययन तथा भिजिट भिषामा रुस पुगेर सेनामा भर्ती हुने र युक्रेनविरुद्ध लड्ने मोर्चामा नेपाली युवाहरु देखिन थालेका छन्।
रसियन सेनामा भर्ती हुनका लागि रुसले अह्वान गर्दै प्रचारप्रसार समेत गरेको छ। सेनामा भर्ती हुन चाहिने न्यूनतम योग्यता पूरा गरेपछि स्वास्थ्य परीक्षण हुन्छ। त्यसमा पास भएपछि ३ महिनादेखि ६ महिनासम्म तालिम दिइन्छ।
तालिम अवधिभर नेपालीहरुलाई मासिक ६० हजार रुपैयाँ बराबरको तलब र तालिम सकिएपछि मासिक ३ लाखको हाराहारीमा तलब दिने गरेको पाइएको छ। एक वर्ष रसियन आर्मीमा काम गरिसकेपछि रुसी पासपोर्टसमेत उपलब्ध हुने बताइन्छ। युक्रेनविरुद्ध सैन्य कारबाही सुरु गरेपछि रुसी सेनाले पनि ठूलो क्षति व्यहोर्दै आएको छ। जसकारण रुसी सेनामा भर्ना अभियान चलाएर विदेशी मूलका मान्छेहरुलाई भर्ना गरिएको पाइन्छ।
एक महिनामै एक हजार फर्काइए
रुसी सेनामा भर्ना हुने उद्देश्यले भिजिट भिषामा युरोप जान लागेका तथा अन्य देशमा जान लागेका गरेर एक महिनाको अवधिमा प्रहरीले ९८८ जनालाई विमानस्थलबाटै फर्काएको छ। जसमा महिला ५६० र पुरुष ४२८ छन्।
उनीहरुमध्ये केही भिजिट भिषामा युरोप जाने तथा केही दुबई लगायतको देश जाने योजनामा रहेको पाइएको छ। केही थाइल्याण्ड जान लागेकाहरु पनि फर्काइएका छन्। थाइल्याण्ड जान खोज्नेहरु त्यहाँबाट म्यानमार, कम्बोडिया छिर्ने र स्क्याममा पर्ने गरेको पाइएको एसएसपी श्रेष्ठले बताए।
दुबईमा जान लागेकाहरुमध्ये केहीको उद्देश्य अमेरिका छिर्ने र केही घरेलु कामदारमा जान खोज्नेहरु रहेको पाइएको छ। यसैगरी करिब ६ महिनाको अवधिमा भिजिट भिषामा विदेश जान लागेका ४ हजार २ सय ७९ जनालाई ब्यूरोको टोलीले विमानस्थलबाट फर्काएको छ।
गत माघदेखि असार २० गतेसम्म उक्त संख्यामा मान्छेहरु फिर्ता गरिएको हो। माघमा प्रहरीले २८९ जनालाई फर्काएको थियो। जसमा त्रिभुवन अन्तर्राष्ट्रिय विमानस्थलबाट महिला ३३१ र पुरुष ५९ गरी २५५ र गौतमबुद्ध अन्तर्राष्ट्रिय विमानस्थलबाट महिला ६ र पुरुष २८ गरी ३४ जनालाई फर्काइएको तथ्यांक ब्यूरोसँग छ।
फागुनमा ५५७, चैतमा ६५३, वैशाखमा ३१४, जेठमा ९८८ र असार २० गतेसम्म ५१६ जनालाई फिर्ता गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
