काठमाडौं– अशोक शर्मा नेपाली चलचित्रमा निर्माता, निर्देशक, कलाकार, वितरकलगायत विधामा सक्रिय रुपमा काम गरिरहेका छन्। विसं २०५० चैतमा उनीद्वारा निर्मित चलचित्र ‘ट्रक ड्राइभर’ चर्चित भएपछि कलाकारसहित उर्लाबारीस्थित सूर्य टाकिजमा पुगे। पाँच सय सिट रहेको चलचित्र भवनमा एक हजार पाँच सयभन्दा बढी दर्शक थिए।
गर्मीको महिना भएकाले बेलाबखतमा दर्शक बेहोस पनि हुने गर्थे। ‘बेहोस भएर हलबाहिर ल्याएको दर्शक होसमा आउनासाथ पुनः चलचित्र हेर्न भित्र पस्थे। स्वास्थ्यभन्दा पनि चलचित्रको चिन्ता थियो’, निर्माता शर्माले एक अन्तरक्रियाका क्रममा स्मरण गरे, ‘त्यो समयमा कलाकारिता गर्न सक्नेलाई रोल दिने चलन थियो। चलचित्र प्रर्दशन भएको ५१औँ दिनभन्दा बढी भएपछि दर्शकसँग भेटघाट गर्थ्यौं।’
निर्माता शर्माले डिजिटल प्रविधिमा चलचित्र रूपान्तरण भएपछि ‘जय भोले’ र ‘रातो टीका निधारमा’ निर्माण तथा निर्देशन गरे। निर्माताका रुपमासमेत रुपान्तरण महसुस गरेका शर्माले प्रविधिले दिएको सहजताको विषयमा चर्चा गरे।
उनले भने, ‘पहिले म आफैं कलाकार बन्ने समयमा एउटा फाइल बोकेर हिँड्थेँ। त्यसमा मैले अभिनय गरेको नाटकको जानकारी हुन्थ्यो। अहिले आफ्नो क्षमतालाई सामाजिक सञ्जालमार्फत् प्रस्तुत गर्न सकिन्छ।’
निर्माता शर्माका अनुसार प्रविधिले सहजता दिए पनि दर्शक भने कम भइरहेका छन्। पचासको दशकमा चलचित्र बन्दाबन्दै लगानी उठेको प्रशस्तै उदाहरण छन्। अहिले वर्षमा मुस्किलले दश चलचित्रले मुनाफा पाउने गरेका छन्।
‘ऐना झ्यालको पुतली’ मार्फत् निर्देशनमा डेब्यु गरेका निर्देशक सुजित विडारीले दर्शकसँग चलचित्र हेर्ने माध्यम धेरै भएको बताए। उनले भने, ‘विश्वभरका चलचित्र हामीले सहजै हेर्न सक्छौं। यसले दर्शकको चलचित्र चेतनालाई बढाएको छ। त्यो चेतना हाम्रोभन्दा बाहिरको चलचित्रले दिएका कारणले पनि हामीले विश्वसनीयता गुमाइरहेका छौं।’
सामाजिक सञ्जालको प्रयोगले कलाकार र दर्शकको दूरी कम भएकाले चलचित्र प्रति आकर्षण घटेको निर्माता शर्माको भनाइ थियो। ‘पचासको दशकमा कलाकार हुन्थे। दर्शकसँग प्रत्यक्षरूपमा ५१औं दिन वा सोभन्दा बढी भएमा मात्र भेट हुन्थ्यो। सम्पर्क हुने अन्य माध्यम नै थिएन’, उनले भने, ‘अहिले हाम्रो दिनचर्या र सम्पर्क सामाजिक सञ्जालमार्फत प्रत्यक्ष जोडिएको छ। दर्शकमा कलाकारप्रतिको कौतुहलता नै छैन।’
निर्देशक विडारीले नेपाली दर्शकले हास्य विधाका चलचित्र बढी रुचाइएको पाएइए पनि त्यतिमै सीमित नभई फरक विधालाई दर्शकसम्म पुर्याउनु सर्जकको दायित्व रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
