काठमाडौं– एलएसडी ड्रग्स लगायत विभिन्न लागु औषध कारोबारमा संलग्न भएको आरोपमा प्रहरीले ५ जना विदेशी नागरिकसहित १२ जनालाई पक्राउ गरेको छ। लागु औषध नियन्त्रण ब्यूरोको टोलीले विभिन्न ठाउँबाट १२ जनालाई पक्राउ गरेको हो। पक्राउ गरिएकाहरुलाई ब्यूरोले पत्रकार सम्मलेन गरेर सार्वजनिक गरेको छ।
ब्यूरोको टोलीले असार ५ गते काठमाडौंको ठमेलस्थित सातघुम्ती सडकबाट काठमाडौंको चन्द्रागिरी घर भएका २९ वर्षीय सुगम मैनालीलाई ७ पिस एलएसडी ड्रग्ससहित पक्राउ गरेको थियो। त्यसपछि एलएसडीविरुद्ध अपरेशन चलाएको प्रहरीले थप व्यक्तिहरु पक्राउ गर्यो।
असार ५ गते नै ३ ग्राम ७०० मिलिग्राम कोकिन र २६ पिस एलएसडीसहित १ विदेशी र ३ नेपाली गरी ४ जना पक्राउ परे। ठमेलबाटै ४२ वर्षीय मुखिया गुरुङ कोकिनसहित पक्राउ परेका थिए।
उनीमाथिको अनुसन्धानको क्रममा विराटनगर घर भएका २६ वर्षीय बच्चन भनिने राज गौतम पक्राउ परे। गौतमसँगै प्रहरीले चेक रिपब्लिक देशकी नागरिक ३२ वर्षीया मार्टिना शेरेनालाई एलएसडी २६ पिससहित पक्राउ गरिएको थियो। उनीहरुबाट एम्फेटामाइन ४०० एमजीको पनि बरामद भएको थियो। उनीहरुलाई पोखराको एक होटलबाट पक्राउ गरिएको थियो। पक्राउ परेका दुवै जनालाई जिल्ला प्रहरी कार्यालय पोखराको जिम्मा लगाइएको प्रहरीले जनाएको छ।
त्यसपछि अर्का एक इटालियन नागरिकलाई प्रहरीले एलएसडीसहित पक्राउ गर्यो। इटालियन नागरिक ३४ वर्षीय डेभिड मिनाडिओ ठमेल सातघुम्तीबाट ६ ग्राम चरेशसहित पक्राउ परेका थिए। उनीमाथि थप अनुसन्धान गर्दा उनी बस्ने होटलबाट एलएसडी स्टिकर १० हजार ९८ थान, एम्फेटामाइन ३८ ग्राम, भारतीय रुपैयाँ १ लाख ३९ हजार, युरो ७००, टर्किस ५३० रुपैयाँ र थाई भाट ५० बरामद भएको ब्यूरोका एसपी चक्रराज जोशीले बताए।
त्यसैगरी लागु औषध एम्फेटामाइन २ ग्राम ४५० मिलिग्रामसहित २ जना नेपाली नागरिक पक्राउ परेका छन्। बालाजु बसपार्क एरियाबाट धादिङको रुबीभ्याली गाउँपालिका–२ घर भएका ४२ वर्षीय दावा तामाङ र सोही गाउँपालिका–४ का ३३ वर्षीय नरबहादुर तामाङ पक्राउ परेका हुन्।
ब्यूरोको टोलीले नै ४ किलो ७५० ग्राम गाँजाको धुलोसहित एक नेपाली नागरिकलाई पक्राउ गरेको छ।
काठमाडौंबाट इन्डियन एअरलाइन्समार्फत दिल्ली हुँदै ओमनको मस्कट जान लागेका भद्रपुर–४ घर भएका २५ वर्षीय सुमन लिम्बूलाई पक्राउ गरेको छ। उनलाई विमानस्थलको प्रस्थान कक्षबाट ब्यूरोको टोलीले पक्राउ गरेको हो।
खैरो हेरोइन १०० ग्रामसहित २ जना भारतीयहरु पनि पक्राउ परेका छन्। जेठ २८ गते ब्यूरोको टोलीले गोली हानेर सिनामंगलबाट २७ वर्षीय भारतीय नागरिक हेमन्तकुमार भगतलाई पक्राउ गरेको थियो।
सो क्रममा अर्का १ जना भारतीय नागरिक राम भजन भनिने सञ्जिव कुमार फरार भएका थिए। उनलाई सुनसरीको धरानबाट असोज ६ गते पक्राउ गरिएको ब्यूरोले जनाएको छ।
काठमाडौंको विमानस्थलबाट चरेश लिएर टर्की हुँदै जर्मन जान लागेका जर्मन नागरिक पनि पक्राउ परेका छन्। जेठ २९ गते टर्किश एयरमार्फत इस्तानबुल हुँदै जर्मन जान लागेका उनलाई विमानस्थलको प्रस्थान कक्षबाट पक्राउ गरिएको हो। उनको सुटकेशबाट ६ किलो ८६० ग्राम चरेश बरामद भएको थियो।
त्यसैगरी लागु औषध कोडिनसहित एक नेपाली नागरिक पक्राउ परेका छन्। ललितपुरको युएन पार्कस्थित सडक किनारबाट चितवनको राप्ती नगरपालिका–७ घर भएका २९ वर्षीय महेश चौधरीलाई १६ बोतल कोडिनसहित नियन्त्रणमा लिइएको हो।
बरामद भएको लागु औषधको अवैध बजार मूल्य २ करोड ३३ लाख १५ हजार भन्दा बढी रहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749307650.png)
-1749200817.png)
