ओखलढुंगा– अविरल वर्षासँगै आएको पहिरोले घर पुरिँदा ओखलढुंगामा २ जनाको मृत्यु भएको छ। पहिरोमा परेर २ जना बेपत्ता भएका छन्।
बिहीबार राति जिल्लाको चम्पादेवी गाउँपालिका–८ विलन्दुका ३६ वर्षीय रणबहादुर गुरुङको घर पहिरोले पुरिँदा गुरुङसँगै उनकी २९ वर्षीया श्रीमती शिवमायाको ज्यान गएको हो। गुरुङका १० वर्षीय छोरा दिनेश र १८ महिनाकी छोरी कृतिका पहिरामा परी बेपत्ता भएका छन्।
जिल्ला प्रहरी कार्यालय ओखलढुंगाका प्रहरी निरीक्षक देवेन्द्र दासले बेपत्ताको खोजी भइरहेको जानकारी दिए।
बिहीबार राति करिब ११ बजेको समयमा बस्ती माथिबाट आएको पहिरोले गुरुङसँगै स्थानीय बलबहादुर गुरुङ र जरसिंह गुरुङको घर पुरिएको छ।
बलबहादुर र जरसिंहको घरमा बस्दै आएकाहरु भने भागेर ज्यान जोगाउन सफल भएका छन्।
पहिरोमा परेका २ जनाको खोजीका लागि नेपाल प्रहरी, सशस्त्र प्रहरी र स्थानीय बासिन्दा खटिएका छन्। पहिरोले धनमाल र पशु चौपायको क्षति भने यकिन हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775984983.png)
-1764146706.png)
-1775575666.png)
