काठमाडौं– त्रिभुवन विश्वविद्यालय, समाजशास्त्र संकायका उपप्राध्यापक प्रेम चलाउनेमाथि आक्रमण गर्नेविरुद्धको मुद्दा फिर्ता लिनेबारे काठमाडौं जिल्ला अदालतमा पेस भएको निवेदनमाथिको सुनुवाइ स्थगित भएको छ।
चलाउनेमाथि आक्रमण गर्ने नेपाली कांग्रेसनिकट विद्यार्थीहरुविरुद्धको मुद्दा फिर्ता लिने निर्णय गर्दै सरकारले काठमाडौं जिल्ला अदालतमा निवेदन पेस गरेको थियो। कानुन, न्याय तथा संसदीय मामिला मन्त्रालयको पत्राचारपछि महान्यायाधिवक्ताको कार्यालयले मुद्दा फिर्ताको लागि जिल्ला सरकारी वकिलको कार्यालय काठमाडौंमार्फत् जिल्ला अदालतमा निवेदन दिएको थियो।
तर, काठमाडौं जिल्ला अदालतले मुद्दा फिर्ताको प्रक्रिया नमिलेको भन्दै निवेदनमाथि सुनुवाइ गर्न अस्वीकार गरिदिएको हो।
उक्त निवेदन जिल्ला न्यायाधीश राजेन्द्रकुमार श्रेष्ठको इजलासमा पेस गरिएको थियो। पेसीमा नचढाइ निवेदन सोझै इजलासमा पेस गरिएको भन्दै सुनुवाइ स्थगित भएको हो। न्यायाधीश श्रेष्ठले उक्त निवेदन पेसीमा चढाएर मात्रै पेस गर्न आदेश दिएका छन्।
मुद्धा फिर्ताको तयारीबारे थाहा पाएपछि चलाउनेको पक्षबाट बहस गर्ने कानुन व्यवसायीहरुले सरकारको निर्णय प्रक्रियासम्मत नभएको भन्दै मुद्दा फिर्ताको लागि अनुमति नदिन माग गरेका थिए। उक्त मागपछि इजलासले अर्को पेसी तोक्न आदेश दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
