काठमाडौं। बंगालको खाडीमा विकसित न्यून चापीय प्रणालीका कारण असोज ८ देखि ११ गतेसम्म देशभर भएको भारी तथा अति भारी वर्षा पश्चात देशका विभिन्न स्थानमा आएको बाढी तथा पहिरोका कारण २१ जनाको ज्यान गएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले जारी गरेको विज्ञप्ति अनुसार वर्षाजन्य विपद्मा परी ५ जना बेपत्ता भएका छन् भने ५ जना घाइते भएका छन्। यस प्राकृतिक विपत्तिबाट ७४७ परिवार प्रत्यक्ष रूपमा प्रभावित भएका छन्।
प्राधिकरणले विपद् प्रतिकार्यका लागि सबै सरकारी संयन्त्रहरू परिचालित गरिएको जनाएको छ। बाढी तथा पहिरोको उच्च जोखिममा परेका प्रभावित जिल्लाहरूबाट करिब २ हजार नागरिकलाई सुरक्षित स्थानमा स्थानान्तरण गरिएको छ। उद्धार गरिएका नागरिकका लागि स्थानीय तह र जिल्ला प्रशासन कार्यालयको समन्वयमा आवश्यक राहत तथा बन्दोबस्तीको व्यवस्था मिलाइएको छ।
जाजरकोट, म्याग्दी र बागलुङलगायतका जिल्लामा नेपाली सेना तथा सुरक्षा निकायको हेलिकोप्टर परिचालन गरी बाढी–पहिरोमा फसेका व्यक्तिहरूको उद्धार गरिएको प्राधिकरणले जनाएको छ। मौसम विज्ञान विभागको पूर्वानुमानका आधारमा प्राधिकरणले दैनिक तीन पटक अद्यावधिक सूचना र सतर्कता सन्देश जारी गरेको थियो। प्राधिकरणको सिचुएसन रूमबाट असोज ८ गते बिहान ९ देखि ११ गते दिउँसो १ बजेसम्म निरन्तर ७६ घण्टा मौसम अनुगमन, समन्वय तथा सूचना सम्प्रेषण गरिएको थियो।
यस अवधिमा अग्रपंक्तिमा खटिने उद्धारकर्मीहरूलाई ५ हजारभन्दा बढी र जल तथा मौसम विज्ञान विभागमार्फत जोखिम क्षेत्रका बासिन्दालाई ८ लाख १४ हजार सतर्कता सम्बन्धी एसएमएस पठाइएको जनाइएको छ। साथै, देशका विभिन्न भागमा रहेका करिब ९ हजार विदेशी पर्यटक तथा पदयात्रीहरूको सुरक्षालाई ध्यानमा राखी अङ्ग्रेजी भाषामा समेत सतर्कता सूचना जारी गरिएको थियो। जोखिमयुक्त सडकखण्डहरूमा सवारी आवागमन रोक्न निर्देशन दिनुका साथै प्रभावित जिल्लाहरूमा विद्यालय बिदा दिइएको थियो।
विगत ४ दिनको अवधिमा देशभरका १८६ वटा वर्षा मापन केन्द्रहरूमा १०० मिलिमिटरभन्दा बढी वर्षा रेकर्ड भएको छ। जसमध्ये सबैभन्दा बढी नवलपरासी (बर्दघाट सुस्ता पूर्व) को डेडगाउँमा ५४४.२ मि.मि. वर्षा मापन गरिएको छ। त्यसैगरी कास्कीको पञ्चासेमा ५००.२ मि.मि. र तनहुँको अत्रौलीटारमा ४७२ मि.मि. वर्षा रेकर्ड भएको प्राधिकरणको विज्ञप्तिमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821304.jpg)
-1786602170.png)
