मनग्य आम्दानीको प्रलोभनसहित नेटवर्किङ बिजेनशका लागि तालिम दिएर ठगी गर्ने गिरोह नियन्त्रणमा

सुरक्षा/अपराध

नेपाल लाइभ सोमबार, असार ४, २०८० २०:०६

काठमाडौं– स्थानीय उत्पादनलाई प्रोत्साहन तथा बढावा दिने उद्देश्य राखेर विभिन्न निकायहरुमा कम्पनी दर्ता गरी ठगी गर्ने गिरोहलाई प्रहरीले नियन्त्रणमा लिएको छ।

ती कम्पनीहरुमा धेरैलाई आवद्ध गराएर शुल्क लिने र मार्केटिङ स्किल्स तथा नेटवर्किङ बिजनेशसम्बन्धी तालिमहरु दिने र छोटो समयमा राम्रो कमाई हुने प्रलोभन दिँदै कम गुणस्तरका वस्तु बिक्री गराउने कार्यमा संलग्न गिरोहलाई प्रहरीले नियन्त्रणमा लिएको हो।

कम गुणस्तर तथा न्यून मुल्य पर्ने लत्ता कपडाहरु, झोला, जुत्ता लगायतका सामग्रीहरु बढी मूल्यमा खरिद गर्न लगाउने तथा जति धेरै मानिसहरुलाई कम्पनीमा आबद्ध गराइ सामग्रीहरु खरिद गराउन सकियो सोही अनुपातमा कम्पनीमार्फत् कमिसनसमेत प्राप्त हुने आश्वासन देखाएर ठगी भएको आरोपमा प्रहरीले चार जनालाई पक्राउ गरेको छ।

पक्राउ पर्नेहरुमा मोरङको विराटनगर महानगरपालिका–१० घर भइ काठमाडौं–२६ बस्ने २६ वर्षीय पवन मगर, सुनसरीको इटहरी उपमहानगरपालिका–१७ घर भई काठमाडौं–२६ बस्ने सोही कम्पनीका अर्का सञ्चालक ३० वर्षीय कुल चन्द्र बिक्की खत्री, काभ्रेपलाञ्चोको धुलिखेल–३ घर भइ काठमाडौं–१६ बस्ने मनिष श्रेष्ठ र उदयपुरको गाइघाट–७ घर भइ काठमाडौं–२६ वस्ने ३१ वर्षीय ताराबहादुर राई रहेका छन्।
मगर, खत्री र श्रेष्ठ क्रियटिभ मिसन प्रालिका सञ्चालक हुन् भने राई उक्त कम्पनीका व्यवस्थापक हुन्।

उनीहरुले राम्रो आम्दानी हुने र कमिशनको प्रलोभनमा पारी सयौं व्यक्तिहरुलाई तालिममा सहभागी गराई कम्पनीमा आबद्ध गराउन लगाउने तथा विभिन्न तालिमहरुमा सहभागी गराबापत प्रति व्यक्ति एक हजारसमेत संकलन गरी दैनिक लाखौं ठगी गर्ने गरे पाइएको प्रहरीले बताएको छ।

उनीहरुलाई करिब ३ सय जालाई तालिम गराइरहेको र उनीहरुलाई छोटो समयमै धेरै मुनाफा कमाउन सकिन्छ भन्ने प्रलोभन देखाएर नेटवर्किङ बिजनेशमा लाग्न प्ररित गरिरहेको अवस्थामा पक्राउ गरिएको हो।

उनीहरुले काठमाडौं महानगरपालिका–२६ रानीबारीमा फ्ल्याट भाडामा लिएर उक्त कम्पनीबाट तालिम गराइरहेका थिए। उनीहरुले ठगी गरिरहेको भन्ने मौखिक सूचनाका आधारमा प्रहरी वृत्त महाराजगंजबाट प्रहरी अधिकृतसहितको टोलीले सोही दिन वारदातमा संलग्नहरुलाई नियन्त्रणमा लिएको हो।

पक्राउ पक्राहरुको सम्बन्धमा मुलुकी अपराध संहिता, २०७४ परिच्छेद २१ को ठगी, आपराधिक विश्वासघात तथा आपराधिक लाभ (एक्सटर्सन) सम्बन्धी कसुरमा काठमाडौं जिल्ला अदालतबाट दिन सात म्याद थप अनुमति प्राप्त गरी प्रहरी वृत्त महाराजगंजबाट थप अनुसन्धान भइरहेको छ।

यस्तै जेठ ३२ गते काठमाडौंको टोखा नगरपालिका– ५ बाट चार जनालाई पक्राउ गरिएको छ। घर भाडामा लिएर ओपन सेलिङ प्रालि नामक कम्पनी सञ्चालन गरी ठगी गरिरहेको छ सूचनाका आधारमा उनीहरुलाई पक्राउ गरिएको हो।

पक्राउ पर्नेहरुमा खोटाङको ऐसेलुखर्क–३ का श्याम बहादुर निरौला, सिन्धुपालचोकको साँगाचोक गढी चौतरा नगरपालिका–२ का जीवन तामाङ, डोल्पाको त्रिपुरासुन्दी–१० का ओमबहादुर रोकाय र ताप्लेजुङको मेरिङदेन–१ का बबिन शेर्पा रहेका छन्। उनीहरु सबै उक्त कम्पनीका सञ्चालक रहेको प्रहरीले जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

पूर्वप्रधानमन्त्री खनालको ‘क्षितिजबाट घाम’ सार्वजनिक

भारतको तमिलनाडुमा साँढे जुधाई क्रममा सात जनाको मृत्यु, ४०० घाइते

इजरायली सैन्य कारबाही स्थग्ति गर्न संयुक्त राष्ट्र प्रमुखको आह्वान