काठमाडौं जिल्ला अदालत (फाइल तस्बिर)
काठमाडौं– नक्कली भुटानी शरणार्थी बनाएर अमेरिका पठाइदिने भन्दै नेपाली नागरिकबाट पैसा उठाएर भएको ठगी प्रकरणको मुद्दामा काठमाडौं जिल्ला अदालतमा थुनछेक बहस जारी छ। काठमाडौंका जिल्ला न्यायाधीश प्रेमप्रसाद न्यौपानेको इजलासमा मुद्दाको अभियोजन पक्ष (सरकारी वकिल)ले गरिरहेका छन्।
प्रतिवादीका कानुन व्यवसायीहरुले ९ दिन लगाएर गरेको बहसका क्रममा उठाएका प्रश्नमा सरकारी बकिलले जवाफ दिइरहेका हुन्।
शुक्रबार सुरुमा जिल्ला सरकारी वकिल कार्यालय काठमाडौंका सहन्यायाधिवक्ता लक्ष्मण घिमिरेले बहस गरे। उनले नक्कली भुटानी शरणार्थी प्रकरणमा संविधानअनुसार नै सरकारी पक्षले मुद्दा चलाइएको दाबी इजलासमा गरे। मुद्दा कसलाई चलाउने र कुन अभियोगमा चलाउने भन्ने निर्णय गर्ने अधिकार संविधानले सरकारी वकिललाई दिएको उल्लेख गर्दै घिमिरेले सोही अधिकारअन्तर्गत रहेर मुद्दा दायर भएको बताए।
प्रतिरक्षा बहसका क्रममा सरकारी वकिल र अनुसन्धानमाथि उठाएको प्रश्नले चित्त दुखेको संकेत गर्दै घिमिरेले मुद्दा चलाउने अधिकारमाथि प्रश्न आउनु दु:खद भएको बताए।
प्रतिरक्षा बहसका क्रममा पूर्व गृहमन्त्री बालकृष्ण खाणसहितलाई फसाउने गरी मुद्दा अघि बढाएको भन्दै उनका कानुन व्यवसायीहरुले प्रश्न उठाएका थिए। उनीहरुले ‘निर्दोष’लाई फसाउने गरी भएको अभियोगपत्र तयार गर्ने सरकरी वकिलहरुलाई कारबाही गर्नुपर्ने तर्क अघि सारेका थिए।
प्रतिवादीका कानुन व्यवसायीको उक्त प्रश्नमा जवाफ दिँदै सहन्यायाधिवक्ता घिमिरेले यो प्रकरणलाई अदालतसम्म ल्याएकोमा जेल जानुपरे पनि आफूहरु तयार रहेको बताए।
‘यहाँ विद्वान मित्रहरुले सरकारी वकिलहरुले गलत अभियोग लगाएका छन्, यिनीहरुलाई कारबही हुनुपर्छ भनेर बहस गर्नु भएछ,’ घिमिरेले भने, ‘हामीले गलत अभियोग लगाएको होइन। संविधानले लगाएको हो, उहाँहरुलाई संविधानअनुसार मुद्दा चलाउँदा हामी जेल जानुपर्छ भने तयार छौँ श्रीमान्।’
उनले नक्कली शरणार्थी प्रकरणमा आफूहरुले अनुसन्धानका क्रममा प्राप्त प्रमाण र बयानहरुका आधारमा मुद्दा दायर गर्ने र प्रतिरक्षा गर्ने कार्य गरेको दाबी गर्दै यसमा गलत भएको भए कारबाही भोग्न तयार रहेको जिकिर।
न्यायाधीश न्यौपानेलााई सम्बोधन गर्दै सरकारी पक्षले आरोपका लागि कानुन व्यवसायीले बहस गर्न नहुने भन्दै तथ्य र देशको प्रतिष्ठा नै दाउमा पर्ने गरी घटाइएको नक्कली भुटानी शरणार्थी प्रकरकणमा प्रमाणले पुगेसम्म कोही पनि धरौटीमा रिहा हुन नहुने दाबी गरे। घिमिरेले अहिलेसम्म अदालतमा पेस भएका प्रतिवादीलाई थुनामा पठाएर मुद्दाको पुर्पक्ष हुनुपर्ने दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
