काठमाडौं– गणतन्त्र दिवसको अवसर पारेर कैलालीको टीकापुर घटनामा जन्मकैद सजाय भोगिरहेका रेशम चौधरीलाई राष्ट्रपति रामचन्द्र पौडेलले सोमबार आम माफी दिए। आइतबार भएको मन्त्रिपरिषद्को निर्णय अनुसार राष्ट्रपति पौडेलले आममाफी दिएपछि चौधरी जेलमुक्त भएका छन्।
चौधरीलाई जेलमुक्त गर्नु भनेको जघन्य अपराध भएको टीकापुर घटनामध्येकी पीडित प्रहरी निरीक्षक केशव बोहराकी श्रीमती शारदा कडायत बोहरा बताउँछिन्। चौधरीलाई जेलमुक्त गर्ने निर्णय थाहा पाएपछि उनी आइतबार मन्त्रिपरिषद्को कार्यालयमा पुगेकी थिइन्।
सञ्चारमाध्यमहरुमा मन्त्रिपरिषद्ले चौधरीलाई आममाफीका लागि सिफारिस गरेको खबरहरु आएपछि उनी निवेदन लिएर सर्वोच्च पुगिन्।
‘रेशम चौधरी थुनामुक्त हुने निर्णय मन्त्रिपरिषद्बाट भएको मिडियाहरुबाट थाहा पाएँ। म त निर्णय माग्न मन्त्रिपरिषद्को कार्यालयमा पनि गएकी थिएँ। निर्णयको फोटो कपी चाहियो भनेर। तर निर्णय आउन समय लाग्ने भएको खबर पाएपछि म फर्किएँ,’ उनले भनिन्, ‘एउटा निवेदन लेखेँ। निवेदन र मिडियाहरूमा आएको निर्णयको आधारमा सर्वोच्चमा रिट दर्ता गराउन गएँ। तर दर्ता गराउन ढिलो भयो। अदालतले दर्ता हुन्छ तर समय अभाव भयो भनेर पठायो। २०७२ साल भदौ ७ गते कालो दिन भएको थियो। फेरि रेशम चौधरी रिहा हुने भनिएको दिन ‘जेठ १४ गते’ कालो दिन भएको छ।’
तर, सोमबार चौधरी रिहा भएपछि उनी आक्रोशित भएकी छन्। ‘चौधरीलाई माफी दिएर रिहा गरिनु कानुनी राज्यका लागि नकारात्मक सन्देश हो। माफी मिनाहा कार्यविधि लेखन अनुसार माफी दिन नमिल्ने जघन्य अपराधको मुद्दामा मुछिएकालाई पनि तत्कालिन प्रधानमन्त्री पुष्पकमल दाहाल ‘प्रचण्डको नेतृत्वको सरकारले कार्यविधिमन्दा विपरीत भएर गरेको निर्णय राष्ट्रपतिकहाँ पठाएको राष्ट्रपतिले सदर गरेर आममाफी दिनुभएको छ। अब योभन्दा ठूलो के होला गणतन्त्रको उपहास?, उनले भनिन्।
कानुन र न्यायलाई नै पनि चुनौदी दिएर चौधरीलाई आममाफी दिएको उनले बताइन्। आफूलाई न्यायालयले गरिसकेका फैसलामा सरकारले हस्तक्षेप नगर्ला भन्ने लागे पनि सरकारले न्यायालयलाई नै हस्तक्षेप गरेको बताइन्।
‘सरकार पनि एउटा विधि र कानुनअनुसार चल्छ भन्ने लाग्थ्यो तर उहाँहरुका क्रियाकलपा हेर्दा उहाँहरुले आफ्नो स्वार्थका लागि जे गरे पनि अनुकूल हुनेरहेछ। सत्ता टिकाउनका लागि अदालतको फैसला पनि लत्याउँन उहाँहरुको लागि ठूलो कुरा होइन रहेछ ,’ उनी भन्छिन्, ‘टीकापुर घटनामा साहदत भएका ८ जना प्रहरी र एउटा नाबालक पो अपराधी रहेछन् अहिले अनुभव हुँदै गयो। निर्दोष चाहिँ रेशम चौधरी नै रहेछन्। त्यसो हो भने त्यतिकै ६ वर्षसम्म उनलाई कैदमा किन राखियो होला?’
चौधरी रिहा भएपछि उनी फेरि मंगलबार अदालतमा रिट दायर गर्न गएकी छन्। उनको रिट मंगलबार दर्ता भएको छ। ‘अहिले विषय फरक परिसकेको छ। अस्तिसम्मको प्रकृति फरक थियो। मन्त्रिपरिषद्को निर्णय भइसकेको हुनाले उक्त निर्णय रोकिपाउँ भन्ने थियो। अब त्यो निवेदनको औचित्य छैन। अहिले निवेदनलाई परिवर्तन गराएकी छु,’ उनले भनिन्।
अदालतबाट आफूले न्याय पाउनेबारे उनी विश्वस्त छिन्। साथै न्यायको लडाइँ पनि नछाड्ने उनको भनाइ छ। ‘पहिलो निवेदन बुझाउन जाँदा उहाँहरु सकारात्मक नै हुनुहुन्थ्यो। समय अभावका कारण छलफलपछि दर्ता गर्छु भन्नुभएको थियो। अन्तिम अवस्थासम्म पनि म न्यायका लागि लडाइँ लडिरहन्छु। अदालतले पहिला पनि न्यायपूर्ण तरिकाले फैसला गरेकाले फेरि पनि हार मान्ने छैन। सधैं अपराधिबाटै मुलुक चलिरहने त हैन होला?’ उनको प्रश्न छ।
यसअघि बालकृष्ण ढुंगेको विषयमा पनि राष्ट्रपतिले दिएको आममाफी विवादित भएपछि फिर्ता लिइएको थियो। रेशम चौधरीको हकमा पनि फिर्ता हुनसक्ने उनी बताउँछिन्। आफूले देशभित्र न्याय नपाए अन्तर्राष्ट्रिय अदालतसम्म धाउने उनको भनाइ छ।
‘राष्ट्रपति र प्रधानमन्त्री पनि त हाम्रै संविधानका धाराहरूमा टेकेर, नीति नियम अनुसार नै यी पदमा पुगेका हुन्। संविधानलाई नै मान्दैनौं भन्छन् भने, लड्न जानलाई त्यो भन्दा अन्य ठाउँ पनि त छन्। न्याय पाएनौं भने अन्तर्राष्ट्रिय अदालतसम्म जान्छौं। म त्यो प्रक्रियामा पनि हिँडिरहेको छु। तर अझै पनि नेपालकै न्यायालयबाट न्याय पाउँछु भन्नेमा विश्वस्त छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
