काठमाडौं– निर्माण व्यवसायी शरदकुमार गौचनको सोमबार गोली हानी हत्या भएपछि प्रहरी हत्याको कारण खोज्न व्यस्त छ।
नयाँ बानेश्वर प्रयागचोकमा मोटरसाइकलमा आएका दुई जना व्यक्तिले पहिले गाडीमा इँटा प्रहार गरे । गाडी रोकियो, उनीहरु नजिकै गए र पेस्तोलबाट गोली प्रहार गरे । तीन राउन्ड गोली लागेका गौचनलाई नजिकैको निजामती अस्पताल लैजादै गर्दा बाटोमै मृत्यु भइसकेको थियो ।
बाहुन समूह समेत आशंकाको घेरामा
महानगरीय प्रहरी प्रमुख एआइजी जयबहादुर चन्दले गौचनमाथि गोली प्रहार गर्न कारागारमा रहेका गुन्डा नाइके रमेश बाहुन भन्ने सुजन पौडेल समूहको संलग्नता हुन सक्ने बताएका छन्।
ठेक्कापट्टामा अवैध असुली गर्दै आएको बाहुन समूहले तीन दिनअघि मात्र गौचनमाथि हातपात गरेको एआइजी चन्दले बताए।
‘बाहुन समूहले थप्पड हानेको भन्ने जानकारी आएको छ, त्यही समूह हो वा अन्य हो, खोजी भइरहेको छ’, चन्दले भने, ‘अहिले काठमाडौं उपत्यकामा नाका सिल गरेर खोजतलास भइरहेको छ।’
मृतक गौचन निर्माण व्यवसायी महासंघको नेतृत्वदायी भूमिकामा रहेकाले देशमा हुने साना–ठूला निजी तथा सरकारी ठेक्कामा उनको पहुँच र प्रभाव रहँदै आएको थियो । ठेक्कामा गुन्डाको प्रयोग नौलो विषय रहेन । ठेक्का कार्टेलिङ (मिलमतो) को निश्चित हिस्सामा दावेदार रहँदै आएको बाहुन समूहले गौचनको हत्या गरेको हुनसक्ने प्रहरी आशंकामा समेत बल मिलेको छ ।
बाहुन निर्माण व्यवसायी र रोडाढुंगा व्यवसायीसँग अवैध असुलीका लागि कुख्यात छन् । दुई वर्षअघि ललितपुरका मीनकृष्ण महर्जनलाई गोली हानेका बाहुन लागूऔषध मुद्दामा अहिले कारागारमा छन्।
पुन समूहले लियो जिम्मेवारी
डाँफे कन्स्ट्रक्सनका सञ्चालक रहेका गौचनको हत्याको केही मिनेटमै मनोज पुन समूहले प्रहरीका विभिन्न इकाइमा फोन गर्दै जिम्मेवारी लिएको छ । पुन समूह रुपन्देहीका एमाले कार्यकर्ता दुर्गा तिवारीको हत्यापछि चर्चामा आएको थियो।
मनोज पुन मगर, लोप्साङ भोटे, समिरमानसिंह बस्नेत र श्याम घले रहेको उक्त समूह प्रहरीको आँखा छलेर पछिल्लो करिब एक वर्षदेखि भारतमा छ।
‘लोप्साङ भन्ने व्यक्तिले फोन गरेर जिम्मेवारी लिएको भन्ने खबर छ, सो समूहका विषयमा समेत अनुसन्धान भइरहेको छ’, महानगरीय प्रहरी प्रमुख एआइजी जयबहादुर चन्द भन्छन्।
प्रहरीले गौचन हत्याको करिब २५ मिनेटपछि राजधानीको मनमैजुबाट तीन जनालाई एक थान हतियार र तीन राउन्ड गोलीसहित पक्राउ गरेपछि गौचनको हत्यामा यी तीन व्यक्तिको संलग्नताबारे समेत अनुसन्धान जारी छ । उनीहरुको साथबाट घरेलु पेस्तोल र तीन राउन्ड गोली बरामद भएको छ।
प्रहरीका अनुसार, पक्राउ पर्नेमा काभ्रेको रोशी गाँउपालिका ४ का छिरिङ तामाङ, सञ्जय तामाङ र दिलीप लामा छन्।
निर्माण व्यवसायी महासंघका अध्यक्ष गौचनको सोमबार अपराह्न नयाँ बानेश्वरको खरीबोटस्थित प्रयाग चोकमा गोली हानी हत्या भएको थियो । प्रहरीका अनुसार, उनलाई टाउको, बायाँ कोखा र छातीमा तीन गोली लागेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
