काठमाडौं– चालू आर्थिक वर्षको १० महिनामा नेपालको वैदेशिक व्यापार १४ खर्ब ६६ अर्ब २२ करोड २४ लाख ९९ हजार रुपैयाँ रहेको छ।
जसमध्ये १३ खर्ब ३५ अर्ब ३२ करोड २४ लाख ६२ हजार रुपैयाँको आयात गरेको छ भने १ खर्ब ३० अर्ब ९० करोड ३७ हजार रुपैयाँको वस्तु निर्यात गरेको केन्द्रीय भन्सार विभागले जनाएको छ।
जसअनुसार देशको व्यापार घाटा १२ खर्ब ४ अर्ब ४२ करोड २४ लाख २५ हजार रुपैयाँ रहेको विभागले जनाएको छ। व्यापार घाटा गत आर्थिक वर्षको तुलनामा १७.५४ प्रतिशतले कमी हो।
गत वर्षको तुलनामा यस वर्ष १६.७८ प्रतिशतले आयातमा कमी आएको विभागले जनाएको छ। यस्तै २४.४९ प्रतिशतले निर्यातमा कमी आएको छ।
गत वर्षको सोही अवधिमा १७ खर्ब ७८ अर्ब ७ लाख २९ हजार रुपैयाँ बराबरको वैदेशिक व्यापार भएको थियो। यस्तै गत वर्ष १६ खर्ब ४ अर्ब ६५ करोड २५ लाख १७ हजार रुपैयाँको आयात गरेको थियो भने १ खर्ब ७३ अर्ब ३४ करोड ८२ लाख ८२ हजार रुपैयाँ बराबरको वस्तु निर्यात गरेको थियो।
पेट्रोलियम पदार्थमा ३ खर्ब बाहिरियो
विभागका अनुसार चालू आर्थिक वर्षको १० महिनामा पेट्रोलियम पदार्थमा मात्रै ३ खर्ब बाहिरिएको छ। सबैभन्दा बढी आयात हुने मध्येको पट्रोलियम पदार्थमा मात्रै २ खर्ब ९१ अर्ब ७२ करोड ४६ लाख ९८ हजार रुपैयाँ बाहिरिएको विभागले जनाएको छ।
यस्तै ५० अर्ब ९७ करोड ९८ लाख ६८ हजार रुपैयाँको प्लाष्टिकजन्य वस्तु आयात भएको छ। ३७ अर्ब ७३ करोड ८१ लाख ८८ हजार रुपैयाँको मेडिकलजन्य वस्तु आयात भएको छ। ३१ अर्ब ८७ करोड २० लाख मलमा बाहिरिएको विभागले जनाएको छ।
यस्तै विभागको तथ्यांक अनुसार ४७ अर्ब २९ करोड ८७ लाख ६१ हजार रुपैयाँको अनाज आयात भएको छ भने ७६ अर्ब ४८ करोड ५२ लाख ८ हजार रुपैयाँको प्रशोधित तथा पाम तेल, २७ अर्ब ५३ करोड ६७ लाख ५३ हजार रुपैयाँको तरकारीमा बाहिरिएको छ। १६ अर्ब ९४ करोड ५८ लाख १६ हजार रुपैयाँ फलफूलमा बाहिरीएको विभागले जनाएको छ।
पाम तेलबाट २७ अर्ब बढी भित्रियो
चालू आर्थिक वर्षको १० महिनामा पाम तेल र प्रशोधित तेल निर्यात गरेको नेपालले २७ अर्ब २८ करोड बढी रकम भित्र्याएको छ। चिया–कफीबाट १२ अर्ब ५ करोड बढी रकम नेपाल भित्रिएको छ भने १० अर्ब बढिको कार्पेट निर्यात भएको छ।
कपडा बुन्ने धागो (स्टेम्पल फाइबर) ९ अर्ब बढीको निर्यात हुँदा ८ अर्ब बढीको स्टील तथा फलामका समाग्री निर्यात भएको विभागले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
