काठमाडौं– नेपाली नागरिकलाई भुटानी शरणार्थी बनाएर ठगी गरेको प्रकरणको अनुसन्धान फाइल बुझाउने अन्तिम तयारीमा प्रहरी जुटेको छ। दुई महिना लामो संगठित ठगी कसुरको अनुसन्धान सकेर प्रहरीले आइतबार नै फाइल पठाउने तयारी गरेको थियो।
तर, समय अभाव भन्दै प्रहरीले भोलि सोमबार मात्रै फाइल पठाउन लागेको छ। अनुसन्धान सकिएर फाइल पठाउन लाग्दा भीआईपीहरुसमेत जोडिएको यो प्रकरणमा प्रहरीमाथि भने अहिले तीव्र दबाब आएको पाइएको छ।
अनुसन्धानको जिम्मा पाएका कार्यालयका प्रहरी अधिकारीहरुमाथि अहिले दबाब आएको पाइएको छ। सुरुवाती क्रममा सरकारबाट पूर्ण समर्थन पाएको प्रहरीले भने पछिल्लो क्रममा भने खुट्टा कमाउन थालेको प्रहरी अधिकारीहरु नै बताउँछन्।
प्रधानमन्त्री पुष्पकमल दाहाल प्रचण्डदेखि उपप्रधान तथा गृहमन्त्री नारायणकाजी श्रेष्ठ, कांग्रेस नेतृत्वलेसमेत भुटानी शरणार्थी प्रकरणको विषयलाई चासो राख्दै प्रहरीसँग घटनाबारे जानकारी लिएका छन्। उनीहरुले प्रहरी नेतृत्वसँग यो विषय कहाँसम्म पुग्छ? अहिले पक्राउ परेकाहरु हकमा के कस्तो प्रमाण भेटिएको तथा कानुन आकर्षित हुनसक्छ भन्नेदेखि मुद्दा मिल्नेसम्म मिलाउनुपर्ने खालको दबाब दिएको स्रोतको भनाइ छ।
घटनाबारे माथिल्लो तहबाट निरन्तर दबाब आएपछि आइतबार बिहानै प्रहरी महानिरीक्षक आईजी बसन्तबहादुर कुँवर, उपत्यका प्रहरी कार्यालय रानीपोखरीका एआईजी श्यामलाल ज्ञवाली, काठमाडौं उपत्यका अपराध अनुसन्धान कार्यालयका प्रमुख तथा एसएसपी डा मनोज केसी जिल्ला प्रहरी परिसर टेकु पुगेका थिए।
उनीहरुले घटनाबारे ब्रिफिङ लिएका थिए। आइतबार बिहान ४ घण्टाभन्दा बढी उनीहरुले ब्रिफिङ लिएको परिसर स्रोतले जनाएको छ। घटनाबारे अश्वाभाविक चासो र दबाब आएपछि आइतबार जिल्ला सरकारी वकिल कार्यालयमा पठाउने भनिएको अनुसन्धान फाइलसमेत प्रहरीले पठाउन सकेन।
यही घटनाबारे महान्यायाधिवक्ता दिनमणि पोखरेलले जिल्ला प्रहरी परिसर टेकुका एसएसपी दानबहादुर कार्कीसहितका प्रहरी अधिकारीहरुसँग समेत जानकारी लिएको पाइएको छ।
महान्यायाधिवक्ता कार्यालयले पनि भेटघाट भएको विषयलाई स्वीकार गर्यो। ‘ठूलो र भीआईपी मुद्दा भएकाले चासो हुनु स्वाभाविक पनि हो। यसलाई अन्यथा लिनु हुन्न,’ महान्यायाधिवक्ता दिनमणि पोखरेलले नेपाल लाइभसँग भने।
भेटघाटमा के भयो भन्ने विषय कसैले खुलाउन नचाहे पनि सकेसम्म भीआईहरुमाथिको मुद्दा कमजोर बनाउनुपर्ने आसय रहेको स्रोतले जानकारी दियो। ‘हामी नदीमा हेलिसकेका छौं। अब ब्याक हुने अवस्था छैन। पार लगाउनुको विकल्प नरहेको भनेर प्रहरीले प्रष्ट जवाफ दिएको’ स्रोतको दाबी छ।
यो घटनामा नेपाली कांग्रेसका प्रभावशाली नेता तथा पूर्वगृहमन्त्री बालकृष्ण खाण, नेकपा एमालेका सचिव तथा पूर्वउपप्रधानमन्त्रीसमेत भइसकेका सांसद टोपबहादुर रायमाझी, नेपाल सरकारका सचिव तथा पूर्वगृहसचिव टेकनारायण पाण्डेसहितका हाईप्रोफाइल व्यक्तिहरु पक्राउ परेका छन्।
त्यसैगरी भुटानी शरणार्थीका नेता टेकनाथ रिजाल, नेपाली कांग्रेसका पूर्वसांसद आङटावा शेर्पा, तत्कालीन गृहमन्त्री तथा नेकपा एमालेका उपाध्यक्ष रामबहादुर थापा बादलका सुरक्षा सल्लाहकार इन्द्रजित राई, हज समितिका अध्यक्ष शमशेर मिया, एमाले सचिव रायमाझीका छोरा सन्दीपलगायत १६ जना व्यक्ति पक्राउ परेका छन्।
पक्राउ परेका १६ जनासँगै पक्राउ पुर्जी जारी भएर फरार १६ जनालाई प्रतिवादी बनाउँदै रायसहितको अनुसन्धान फाइल बुझाउने तयारी गरिएको परिसरका एसएसपी दानबहादुर कार्कीले बताए। ‘अहिलेसम्म ३२ जनाविरुद्ध मुद्दा चलाउनुपर्ने रायसहितको प्रतिवेदन पेस गर्ने तयारी गरेका छौं। भोलिसम्ममा यो संख्यामा केही बढ्न पनि सक्छ’ एसएसपी कार्कीले भने।
बयानमा नाम लिइएका तर अहिलेसम्म प्रमाण नजुटेका हाईप्रोफाइलको हकमा भने दोस्रो चरणमा अनुसन्धान हुने प्रहरीले दाबी गरेको छ। पक्राउ परेका आरोपीहरुले बयानमा एमाले नेता रामबहादुर थापा बादल, कांग्रेसकी सांसद तथा बालकृष्ण खाणकी श्रीमती मञ्जु खाण, पूर्वगृहसचिवद्वय प्रेमकुमार राई र महेश्वर न्यौपाने, एमाले अध्यक्ष केपी शर्मा ओलीका स्वकीय सचिव राजेश बज्राचार्य, एमालेकै नेता तथा पूर्व प्रदेश सांसद डा अजयक्रान्ति शाक्य, बादलकी श्रीमती नैनकला थापाकोसमेत नाम लिएका छन्।
भुटानी शरणार्थी समस्या समाधानका लागि भन्दै गृहमन्त्री बादलको पालामा २०७६ जेठ ३० मा एउटा कार्यदल गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्व गठित कार्यदलमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने थिए।
विचौलियाहरुकै सेटिङमा कार्यदलमा मान्छेहरु राखेर बादलकै पालामा ठगी प्रकरण सुरु भएको प्रहरी अनुसन्धानबाट खुलेको छ। पछि खाणको पालामा पन्थी कार्यदलको प्रतिवेदनमा अनसूची नै थपेर नक्कली नाम राख्दै ठगी भएको प्रहरीको निष्कर्ष छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
