पर्यटन-उड्डयन

लयमा फर्किँदै पर्यटन व्यवसाय, अप्रिलमै भित्रिए झण्डै १ लाख पर्यटक

कल्पना घिमिरे सोमबार, वैशाख २५, २०८० ०७:४६

तिलिचो ट्रेक रुटमा पर्यटक (फाइल तस्बिर)

काठमाडौं– अप्रिल महिनामै झण्डै १ लाख पर्यटक नेपाल भित्रिएका छन्। २०२३ को अप्रिल महिनामा मात्रै १ लाख पर्यटक भित्रिँदा कोभिड महामारीले थला परेको पर्यटन क्षेत्र पुरानै लयमा फर्किन थालेको नेपाल पर्यटन बोर्डले जनाएको छ।

अप्रिल २०२३ मा विभिन्न देशबाट ९८ हजार सात सय ७३ विदेशी पर्यटक नेपाल भ्रमणमा भित्रिएका छन्। यो संख्या कोभिड–१९ अघिको अप्रिल २०१९ को तुलनामा ९०.२८ प्रतिशत हो। २०१९ को अप्रिलमा १ लाख ९ हजार ३ सय ३९ पर्यटक भ्रमणका लागि नेपाल भित्रिएको पर्यटन बोर्डको तथ्यांक छ।

गतवर्षको अप्रिल सन् २०२२० सँग तुलनामा यसवर्षको सोही महिनामा ३७ हजारभन्दा बढी पर्यटक नेपाल भ्रमणमा आएको देखिन्छ। अप्रिल २०२२ मा ६१ हजार ५ सय ८९ पर्यटक नेपाल भ्रमणमा आएका थिए।

कोभिड महामारी सुरु भएपछि सन् २०२० पर्यटक आगमन स्वात्तै घटेको थियो। सो वर्षको अप्रिलमा १४ जना मात्र पर्यटक आएका थिए। कोभिडको प्रभाव कम हुँदै गएपछि अप्रिल २०२१ मा २२ हजार ७ सय ३२ पर्यटक आएका थिए। कोभिड महामारी कम हुँदै गएपछि २०२२ देखि नै विदेशी पर्यटक आगमन सुधार हुँदै गएको देखिन्छ। सन् २०२२ मा कूल ६ लाख १४ हजार पर्यटक आएको पर्यटन बोर्डले जनाएको छ।

अप्रिलमा कुन देशबाट कति भित्रिए?
अप्रिल २०२३ मा पनि सबैभन्दा बढी पर्यटक भारतबाट नै भित्रिएका छन्। एक महिनामा ३१ हजार ४ सय ३७ भारतीय नेपाल भ्रमणमा आएको तथ्यांक छ। अमेरिकाबाट ८ हजार ४ सय १३ पर्यटक भित्रिएका छन्।

अस्ट्रेलियाबाट ३ हजार ८ सय २८, जर्मनीबाट ३ हजार २ सय ४६, फ्रान्सबाट ३ हजार २ सय ११, रसियाबाट २ हजार ६ सय ६७, बंगलादेशबाट २ हजार २ सय १७ र थाइल्यान्डबाट २ हजार १ सय दुई पर्यटक नेपाल भ्रमणका लागि भित्रिएका छन्।

बेलायतबाट ५ हजार ४ सय ९ पर्यटक आएका छन्। चीनबाट ४ हजार ७ सय ७० पर्यटक भित्रिएका छन्। चीनले आफ्ना नागरिकलाई नेपाल भ्रमणका लागि खुला गरेपछि चिनियाँ पर्यटक आगमन बढ्दो रुपमा देखिएको छ। अघिल्लो महिना मार्चमा करिब २ हजार ६ सय चिनियाँ पर्यटक नेपाल भ्रमणका लागि आएका थिए।

६६ आरोहीले पाए सगरमाथा आरोहण अनुमति
अहिलेसम्म ८० देशका एक हजार ७९ आरोही सगरमाथासहित २४ हिमाल चढ्न अनुमति लिएका थिए। जसमध्ये सगरमाथा आरोहणका लागि मात्रै ६५ देशका ४ सय ६६ आरोहीले पर्यटन विभागबाट अनुमति पाएका छन्। यो संख्या सगरमाथा आरोहणको ७० वर्षे इतिहासमा अहिलेसम्मकै उच्च रहेको विभागले जनाएको छ।

सगरमाथा आरोहणका लागि सबैभन्दा धेरै चिनियाँ ९ हजार ९ सय ६० र अमेरिकी ९ हजार ८ सय ७० र भारतीय ४० जना अरोहीले अनुमति मागेका छन्। सगरमाथापछि लोत्से हिमाल आरोहण गर्न १४ टिमबाट एक सय २६ जनाले अनुमति लिएको विभागले जनाएको छ।

यस्तै नुप्त्से आरोहणका लागि ६३ जनाले अनुमति लिएका छन् भने अन्नपूर्ण फर्स्ट आरोहण गर्न ५४ जनाले अनुमति लिएका छन्। थोरोङ पिक आरोहण गर्न ४२, धौलागिरि आरोहण गर्न ३५, आमादब्लम आरोहण गर्न ७४, मकालु फर्स्ट आरोहण गर्न ५८, कञ्चनजंघा मेन आरोहण गर्न ४२ जनाले अनुमति लिएको विभागले जनाएको छ।

यस्तै, मनास्लु आरोहण गर्न १५, बरुनत्सेका लागि १८, हिमलुङ हिमालका लागि १६, अरनिको चुलीका लागि ९, पुमोरीका लागि १२, थापा पिक र जार्क्या पिकका लागि आठ–आठ, खातुङ खाङका लागि सात, रत्नचुलीका लागि ६, पोङ्ग्री गोल्डुम्बा आरोहणका लागि ६ जना आरोहीले अनुमति लिएका छन्।