काठमाडौं- नेपालले चालु आर्थिक वर्ष २०७९/०८० को ९ महिनामा (चैत मसान्तसम्म) कुल १३ खर्ब १९ अर्ब रुपैयाँ बराबरको वैदेशिक व्यापार गरेको छ। जसमा १२ खर्ब १ अर्ब ५० करोड ८९ लाख ९१ हजार रुपैयाँको वस्तु आयात र १ खर्ब १८ अर्ब २७ करोड ९९ लाख ६२ हजार रुपैयाँको निर्यात गरेको भन्सार विभागको तथ्यांकमा उल्लेख छ।
विभागको तथ्यांक हेर्दा यो ९ महिनाको अवधिमा नेपाललाई १० खर्ब ८३ अर्ब २२ करोड ९० लाख २९ हजार व्यापार घाटा भएको देखिन्छ। व्यापार घाटा गत आर्थिक वर्षको ९ महिनाको तुलनामा १७.०६ प्रतिशत कम हो। आयात गत आर्थिक वर्षको यसै अवधिको तुलनामा १८.०८ प्रतिशतले कमी आएको छ। निर्यात २६.३४ प्रतिशत कम हो। कुल वैदेशिक व्यापारमा समेत १८.८९ प्रतिशत कमी आएको छ।
गत आर्थिक वर्षको यसै अवधिमा १४ खर्ब ६६ अर्ब ६६ करोड २० लाख एक हजार रुपैयाँको वस्तु आयात भएको थियो। निर्यात १ खर्ब ६० अर्ब रुपैयाँको हुँदा कुल वैदेशिक व्यापारको आकार १६ खर्ब २७ अर्ब २३ करोड पुगेको थियो। चैतसम्म नेपालको वैदेशिक व्यापारमा आयातको हिस्सा ९१.०४ रहँदा निर्यातको हिस्सा ८.९६ प्रतिशत छ। निर्यात घट्दा वैदेशिक व्यापार समेत ९.१८ प्रतिशतले खस्किएको छ।
चैतमै झण्डै डेढ खर्ब बाहिरियो
विभागको तथ्यांकअनुसार चालु आर्थिक वर्षको चैत महिनामा आयात गर्दा सबैभन्दा धेरै रकम बाहिरिएको छ। चालु आर्थिक वर्षको चैत मसान्तसम्म कुल १२ खर्ब १ अर्ब ५० करोड रुपैयाँ बराबरको वस्तु आयात भएको छ। फागुन मसान्तसम्म १० खर्ब ५८ अर्ब ३८ करोड रुपैयाँ बराबरको वस्तु आयात भएको थियो।
फागुनको तुलनामा चैतमा १ खर्ब ४३ अर्ब १२ करोड ३४ लाख रुपैयाँ बराबरको वस्तु आयात भएको देखिन्छ।
राजस्व घटेको भन्दै सरकारले आयात प्रतिबन्ध हटायो। गत पुस १ पुसदेखि प्रतिबन्ध हटाएपछि आयात बढ्दै गएको देखिन्छ। यस्तै, एलसी खोल्दा चाहिने नगद मार्जिनको प्रावधान गत माघ ५ गतेदेखि हटाइएको थियो। यी दुई प्रतिबन्धका कारण कमी आएको आयात माघपछि बढ्न थालेको छ। चैतमा यसको प्रभाव ह्वात्तै बढेको छ।
मंसिर महिनामा १ खर्ब ३१ अर्ब रुपैयाँ बराबरको वस्तु आयात भएकोमा पुसमा १ खर्ब २९ अर्ब रुपैयाँको आयात भएको थियो। माघमा भने १ खर्ब २६ अर्ब रुपैयाँको वस्तु आयात भएको विभागको तथ्यांक छ। फागुनमा आयात बढेर १ खर्ब ३९ अर्ब रुपैयाँ पुगेको थियो। चैत महिनामा मात्रै १ खर्ब ४३ अर्ब रुपैयाँ बराबरको वस्तु आयात भएको विभागको तथ्यांकमा उल्लेख छ।
पेट्रोलियम पदार्थमा मात्रै बाहिरियो २६१ अर्ब
चैत मसान्तसम्म पेट्रोलियम पदार्थको आयातबाट मात्र २ खर्ब ६१ अर्ब रुपैयाँ बढी बाहिरिएको छ। २ खर्ब ६१ अर्ब ९ करोड ४ लाख ६८ हजार रुपैयाँको पेट्रोलियम पदार्थ आयात भएको विभागको तथ्यांकमा छ। पेट्रोलियम पदार्थमा नेपाललाई शतप्रतिशत घाटा छ। यो बाहिरी मुलुकबाट आयात मात्रै हुन्छ।
स्टील र आइरनको आयातमा यो अवधिमा १ खर्ब बढी बाहिरिएको छ। यस्तै ९ महिनामा ३६ अर्ब ४४ करोड रुपैयाँ बढी सवारी साधन तथा यसको पार्टपुर्जामा बाहिरिएको छ। २५ अर्ब २५ करोड रुपैयाँ बढी तरकारी आयात गर्दा बाहिरिएको छ। १४ अर्ब ३४ करोड रुपैयाँ बढी फलफूल आयात गर्दा बाहिरिएको छ। विद्युतीय उपकरण र यसको पार्टपुर्जा आयातमा ७३ अर्ब ६७ करोड रुपैयाँ बाहिरिएको छ विभागले जनाएको छ।
पाम तेलबाट २६ अर्ब बढी भित्रियो
चालु आर्थिक वर्षको ९ महिनामा पाम तेल र प्रशोधित तेल निर्यात गरेको नेपालले २६ अर्ब ३ करोड बढी राकम भित्र्याएको छ। चिया-कफीबाट १० अर्ब ६१ करोड बढी रकम नेपाल भित्रिएको छ भने ९ अर्बको कार्पेट निर्यात भएको छ।
कपडा बुन्ने धागो (स्टेम्पल फाइबर) ८ अर्ब ८९ करोड रुपैयाँ बढीको निर्यात हुँदा ७ अर्ब ३० करोड रुपैयाँ बढीको स्टील तथा फलामका समाग्री निर्यात भएको विभागको तथ्यांकमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_3anZTthbso-1766484950.jpg)
-1764146706.png)
-1777595787.png)
