काठमाडौं– वैशाख १० गते हुने उपनिर्वाचनका लागि निर्वाचन आयोगले आज (बिहीबार) उम्मेदवारहरुको अन्तिम नामावली प्रकाशन गर्दै छ। आयोगले आजै उम्मेदवारहरुलाई निर्वाचन चिह्न समेत प्रदान गर्दै छ।
आयोगले बिहीबार बिहान ९ बजेदेखि १ बजेसम्मका लागि उम्मेदवारी फिर्ता लिने समय निर्धारण गरेको छ। इच्छुक उम्मेदवारले सो समयमा आफ्नो उम्मेदवारी फिर्ता लिन सक्नेछन्।
त्यसपछि उम्मेदवारको अन्तिम नामावली प्रकाशन हुने निर्वाचन आयोगका प्रवक्ता शालिग्राम शर्मा पौडेलले जानकारी दिए। अन्तिम नामावली प्रकाशन भएपछि उम्मेदवारहरुलाई चुनाव चिह्न प्रदान गरिनेछ।
वैशाख १० गते तनहुँ १, चितवन २ र बारा क्षेत्र नम्बर २ मा उपनिर्वाचन हुँदैछ। राष्ट्रपतिमा रामचन्द्र पौडेल निर्वाचित भएपछि तनहुँ १ र उपराष्ट्रपतिमा रामसहाय प्रसाद यादव निर्वाचित भएपछि बारा २ निर्वाचन क्षेत्र खाली भएको थियो। यस्तै, राष्ट्रिय स्वतन्त्र पार्टीका सभापति रवि लामिछाने नागरिकता विवादको मुद्दामा दोषी ठहर भएर उनको सांसद पद जाँदा चितवन २ को प्रतिनिधि सभा सदस्यको पद रिक्त भएको थियो।
उपनिर्वाचनका लागि चैत २० गते उम्मेदवारहरुको मनोनयन दर्ता भएको थियो। जसअनुसार तनहुँ १ मा ९ जना, चितवन २ मा २४ जना र बारा २ मा ३६ जनाले उम्मेदवारी दर्ता गराएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770205330.png)
-1764146706.png)
