मधेस प्रदेशमा एमालेका मन्त्रीलाई राजीनामा दिन ४ बजेसम्मको अल्टिमेटम

राजनीति

नेपाल लाइभ मंगलबार, चैत २१, २०७९ १४:३८

काठमाडौं- मधेस प्रदेशका मुख्यमन्त्री सरोज यादवले आफ्नो मन्त्रिपरिषदमा रहेका एमालेका मन्त्रीहरुले मंगलबार ४ बजेसम्म राजीनामा गरिसक्ने दाबी गरेका छन्।

‘आज चार बजेसम्म हेर्छु,’ मुख्यमन्त्री यादवले नेपाल लाइभसँग भने, ‘त्यस पछि मात्रै अन्य विकल्पबारे सोच्छु।’ मधेस प्रदेश सरकारमा रहेका एमालेका मन्त्रीहरुले आज राजीनामा नगरेमा मुख्यमन्त्रीले उनीहरुलाई पदमुक्त गर्ने तयारी छ। मुख्यमन्त्रीले जनमत पार्टीका मन्त्रीहरुलाई समेत पदमुक्त गर्ने तयारी गरिरहेको उनी निकट स्रोतको भनाइ छ।

एमाले मधेस सरकारबाट बाहिरिएपछि मुख्यमन्त्रीले नेपाली कांग्रेस, लोसपा र एकीकृत समाजवादीलाई सरकारमा ल्याउने तयारी गरेका छन्।

तर, नेपाली कांग्रेस मधेस प्रदेशका सभापति तथा संसदीय दलका नेता कृष्ण यादवले केन्द्रीय नेतृत्वले अहिलेसम्म प्रदेश सरकारमा सहभागी हुनेबारे आफूहरुलाई कुनै सूचना वा जानकारी नदिएको नेपाल लाइभलाई बताए।

‘मधेस सरकारबाट एमाले बाहिरिने कुरा हामीले पनि सुनेका छौं,’ कांग्रेस नेता यादवले भने, ‘तर हामी सरकारमा सहभागी हुनेबारे अहिले कुनै छलफल र सल्लाह भएको छैन।’

केही दिनअघि कांग्रेस मधेस प्रदेशका सभापति तथा दलका नेता यादवले बारा- २ को उपनिर्वाचनमा जसपा अध्यक्ष यादवलाई कांग्रेसले सघाउने हो भने प्रदेशको मुख्यमन्त्री कांग्रेसले पाउनुपर्ने माग अघि सारेका थिए। यद्यपि, कांग्रेसको केन्द्रीय कार्यसम्पादन समितिले बारा- २ को उपनिर्वाचनमा जसपालाई समर्थन गर्ने निर्णय गरिसकेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

बन्धकहरूलाई रिहा नगरिए युद्धविराम रद्द गर्नुपर्ने हमासलाई ट्रम्पको चेतावनी

प्रतिनिधिसभा बैठक बस्दै, यस्तो छ कार्यसूची

धरहरा प्रवेश शुल्कबाट एक करोड ५२ लाखको राजस्व संकलन, अब ५ बजेसम्म खुला रहने