काठमाडौं– मधेस प्रदेशका मुख्यमन्त्री सरोज यादवले प्रदेश सरकारमा हेरफेर गर्ने तयारी गरेका छन्। सुरुमा एमाले र माओवादीसहितको गठबन्धनबाट जसपा नेता सरोज यादव मधेस प्रदेशका मुख्यमन्त्री बनेका थिए। पछि केन्द्रमा एमाले सरकारबाट बाहिरिएपनि मधेस सरकारमा भने एमाले सहभागी नै थियो।
तर, बारा–२ मा आउँदो १० वैशाखमा हुने उपनिर्वाचनका लागि जसपा अध्यक्ष उपेन्द्र यादवले उम्मेदवारी दिएपछि उनलाई समर्थन गरेको कांग्रेसलाई सरकारमा ल्याउन मुख्यमन्त्रीले पहल थालेका छन्। मुख्यमन्त्री यादवले मंगलबार साझसम्म राजीनामा गरिसक्न एमालेका मन्त्रीहरूलाई निर्देशन दिएका छन्।
मधेस सरकारमा चार मन्त्रीसहित एमाले सहभागी थियो। एमालेका मन्त्रीहरूले राजीनामा गरेपछि त्यस ठाउँमा कांग्रेसको तर्फबाट मन्त्री थप्ने मुख्यमन्त्रीको तयारी छ। यसैगरी, बारामा जसपा अध्यक्ष यादवलाई कडा टक्कर दिने अनुमान गरिएको जनमत पार्टीलाई समेत प्रदेश सरकारबाट हटाएर लोसपालाई सरकारमा ल्याउने मुख्यमन्त्रीको तयारी छ। लोसपाले पनि बारा–२ मा उपेन्द्रलाई समर्थन गरेको छ। प्रदेश सरकारमा जनमत पार्टीका दुई मन्त्री छन्।
मुख्यमन्त्री यादवले एमाले र जनमतका मन्त्रीहररूले राजीनामा नगरे मंगलबार साझसम्म बर्खास्त गर्ने तयारी गरेका बताइएको छ। एमालेका मन्त्रीहरूले त्यसअघि नै राजीनामा गर्ने तयारी गरिरहेको बताएका छन्।
मधेश सरकारमा एमालेका संसदीय दलका नेता सरोजकुमार यादव भौतिक पूर्वाधार तथा विकास, राजकुमार लेखी कानुन, न्याय तथा प्रदेश सभा मामिला, शत्रुधनप्रसाद सिंह गृह तथा सञ्चार र मोहम्मद जयद आलम महिला, बालबालिका, युवा तथा खेलकुदमन्त्री छन्।
एमाले दलका नेता सरोज यादवले आफूहरू राजीनामा दिन आन्तरिक छलफलमा रहेको बताएका छन्।
मधेस प्रदेश सभामा १०७ सदस्य छन्। बहुमतका लागि ५४ सांसदको समर्थन आवश्यक पर्छ। प्रदेश सभामा एमालेका २३, नेपाली कांग्रेसका २२, जनता समाजवादी पार्टीका १६, जनमत पार्टीका १३, लोकतान्त्रिक समाजवादी पार्टी र नेकपा माओवादी केन्द्रका ९–९, नेकपा (एकीकृत समाजवादी) ७, नागरिक उन्मुक्ति, राप्रपा र नेपाल संघीय समाजवादीका एक–एकजना सांसद छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
