काठमाडौं- स्वतन्त्र विद्यार्थी युनियन नेपाल ल क्याम्पसको नवनिर्वाचित कार्यसमितिको पहिलो बैठकले क्याम्पसमा तालाबन्दी गर्न निषेध गर्ने निर्णय गरेको छ। तालाबन्दीको गलत संस्कृतिले विश्वविद्यालय प्रशासनदेखि विद्यार्थीहरुलाई प्रत्यक्ष असर पर्ने भएकाले तालाबन्दीलाई निषेध गर्ने निर्णय गरेको हो।
विद्यार्थी आन्दोलनलाई रचनात्मक पुनर्जीवन दिन तथा विद्यार्थी र प्रशासनबीचमा आपसी सहयोगलाई थप मजबुत गराउन यो निर्णयले टेवा पुर्याउने स्ववियु अध्यक्ष विष्णु ढुङ्गेलले बताए।
अध्यक्ष ढुङ्गेलले भने, ’उपकुलपति कार्यालयदेखि विभागीय कार्यालयसम्म सानातिना विषयहरुलाई लिएर शक्तिको आडमा तालाबन्दी गर्नाले विश्वविद्यालयको नियमित परीक्षादेखि नतिजा प्रकाशन र दैनिक कामकारबाहीमा प्रत्यक्ष असर गरेको हामीले ठान्यौँ। सोही कारण आपसी सम्झदारी नै समस्याको हलको विकल्प हुँदा तालाबन्दीलाई निरुत्साहित गर्ने जमर्को गरेका हौं।’
समस्या हल गर्न सकेसम्म सहमति नसके धर्ना, सिठी जुलुस लगायतका आन्दोलनका अन्य विकल्प पनि प्रशस्त हुने भएकोले तालाबन्दीको विकल्पलाई पहिलो बैठकबाट निरुत्साहित गर्ने निर्णय गरेको स्ववियु सचिव मनोज सिंहले बताए।
चैत ५ गते भएको नेपाल ल क्याम्पसको स्ववियु निर्वाचनमा अखिल क्रान्तिकारीका विष्णु ढुंगेल, सचिवमा नेविसंघका मनोज सिंह र कोषाध्यक्षमा अनेरास्ववियुका संज्योति नेम्वाङ विजयी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
