काठमाडौं– मंसिर ४ गते भएको निर्वाचनमा पहिलो पटक प्रतिनिधि सभा निर्वाचनमा भाग लिइरहेको राष्ट्रिय स्वतन्त्र पार्टीका सभापति रवि लामिछाने चितवन–२ बाट उम्मेदवार बने। उनी उम्मेदवार मात्र बनेनन् एमालेको पकड क्षेत्र मानिएको चितवन–२ बाट एमाले र कांग्रेसका उम्मेदवारलाई हराउँदै भारी मतसहित निर्वाचित भए।
एमालेका तत्कालीन सांसद कृष्णभक्त पोखरेल र नेपाली कांग्रेसका उमेश श्रेष्ठलाई ठूलो मतान्तरसहित पराजित गर्दै रवि प्रतिनिधि सभामा भित्रिए। चितवन–२ बाट ३४ हजारको मतान्तरले जित हात पारेका उनी एमालेसँगको गठबन्धन बनाउँदै प्रचण्ड नेतृत्वको सरकारमा उपप्रधान तथा गृहमन्त्री बने।
गृहमन्त्री भएका उनीविरुद्ध दोहोरो नागरिकता लिएको आरोपमा सर्वोच्च अदालतमा रिट दायर भयो। उनलाई विदेशी नागरिकता हुँदाहुँदै नेपाली नागरिकता लिएको र नेपाली नागरिकता लिँदा पूरा गर्नुपर्ने प्रक्रिया पालना नगरेको आरोप लागेको थियो। उक्त रिटमा संवैधानिक इजलासले फागुन २३ गते फैसला सुनाउँदै रवि नेपाली नागरिक नभएको ठहर गर्यो । योसँगै उनको सांसद पद गयो। उक्त क्षेत्र रिक्त भयो।
निर्वाचन आयोगले उक्त क्षेत्रमा वैशाख १० गते उपनिर्वाचन गर्ने निर्णय गर्यो। सर्वोच्चको फैसलापछि पुन: नागरिकता लिएका लामिछानेले दोस्रो पटक सोमबार चितवन–२ मा उम्मेवारी दर्ता गराएका छन्।
सबैका आ–आफ्नै दाबी
उक्त क्षेत्रमा लामिछानेलाई रोक्न नेपाली कांग्रेसले जितनारायण श्रेष्ठलाई अघि सारेको छ। उनलाई माओवादी केन्द्र र एकीकृत समाजवादी पार्टीले समेत साथ दिएका छन्।
त्यस्तै, नेकपा एमालेले यस पटक पोखरेललाई पछि हटाउँदै रामप्रसाद न्यौपानेलाई अघि सारेको छ। उनी अघिल्लो पटक चितवन–मा उम्मेदवार हुन चाहेका थिए। तर, पार्टीले उम्मेदवारी फिर्ता लिएर राप्रपालाई सर्मथन गर्ने निर्णय गरेपछि उनी पछि हटेका थिए। अन्तिम समयमा पछि हटेका न्यौपाने यस पटक क्षेत्र नम्बर २ मा उम्मेदवार भएका छन्। एमालेको बलियो संगठन भएकोले आफूले यस पटक जित्ने उनको दाबी छ। यो क्षेत्रमा त्रिपक्षीय प्रतिस्पर्धा हुने देखिन्छ। मनोनयन दर्ता गर्दै तीनै जना उम्मेदवारहरूले आफूले जित्ने दाबी गरेपनि कडा प्रतिस्पर्धा हुने देखिन्छ।
उम्मेदवारी दर्ता गराउँदै रास्वपाका सभापति लामिछाने भावि पुस्ताको भविष्य सुरक्षित गर्न, राजनीतिमा शुद्धता ल्याउन, नेपालमा नै रोजगारी सिर्जना गर्न केन्द्रित हुने दाबी गरे।
उनले आफूले यसपटक पनि जित्ने पूर्ण विश्वास रहेको भन्दै अन्तिमसम्म नतिजा कुर्नुपर्ने बताए। तपाईंको कारणले दोस्रो पटक राज्यलाई निर्वाचन गराउँदा आर्थिक भार पर्यो नि? भन्ने सञ्चारकर्मीको प्रश्नमा उनले आफ्नो भागमा पर्ने भार आफू लिन तयार रहेको बताए।
कांग्रेस उम्मेदवार जितनारायण श्रेष्ठले भने चितवनवासीको सेवाका लागि आफ्नो उम्मेदवारी भएको दाबी गरे। चुनावी सभालाई सम्बोधन गर्दै नेपाली कांग्रेसका उम्मेदवार श्रेष्ठले चितवन–२ का मतदाताले स्थानीय उम्मेदवार र सुखदुःखको साथी भएकाले आफूलाई निर्वाचित गराउने दाबी गरे।
त्यस्तै, नेकपा एमालेका उम्मेदवार रामप्रसाद न्यौपानेले पनि आफूले जित हात पार्ने दाबी गरे। उनले यसपटक चितवनका जनताले सबै कुरा बुझेको भन्दै संगठनको बल र जनताको मतबाट आफू निर्वाचित हुने बताए।
यस्तो छ अंकगणित
गत मंसिरमा सम्पन्न भएको मत हेर्दा चितवन–२ मा रास्वपा नै हाबी देखिन्छ। प्रत्यक्षतर्फ लामिछानेले ४९ हजार २ सय ६१ मत ल्याएर जित हात पारेका थिए। उनको प्रतिस्पर्धी कांग्रेसका उम्मेदवार उमेश श्रेष्ठले १५ हजार ९१ मत पाएका थिए। एमालेका उम्मेदवार कृष्णभक्त पोखरेलले १४ हजार ६ सय ४९ मत पाएका थिए।
समानुपातिकको मत हेर्दा पनि रास्वपा अगाडि देखिन्छ। समानुपातिक मतमा रास्वपाले ३५ हजार ९ सय ४५ मत पाएको थियो।
एमालेले १६ हजार ७ सय ८४ मत पाएको थियो भने कांग्रेसले १२ हजार १ सय ३२ मत प्राप्त गरेको थियो। त्यस्तै, माओवादी केन्द्र ८ हजार ४ सय ७, राप्रपा ३ हजार २ सय १८ र एकीकृत समाजवादी पार्टी ६१६ मत प्राप्त गरेका थिए। श्रेष्ठ हाल गठबन्धनको उम्मेदवार भएकाले गठबन्धनको मत २१ हजार बराबर देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
