पक्राउ परेका पाँच जना।
काठमाडौं– तिब्बती शरणार्थीलाई नेपाली नागरिकता दिलाएको प्रकरणमा पक्राउ परेका नासु देवराज गौतमबाट नयाँ तत्थ खुलेको छ। जिल्ला प्रशासन कार्यालय काठमाडौंमा कार्यरत नासु गौतमले तिब्बतीलाई नागरिकता दिलाउने क्रममा मुख्य भूमिका निभाएको देखिएको हो।
नासु घिमिरेले तिब्बतीलाई नेपाली नागरिकता दिलाउने क्रममा डकुमेन्टेसनको सम्पूर्ण काम गर्ने गरेको पाइएको प्रहरी स्रोतले जानकारी दियो।
‘तिब्बतीलाई नेपाली नागरिकता बनाउन आवश्यक पर्ने कागजातका विवरणहरू नासु घिमिरेमार्फत् नै संकलन हुने र शाखा अधिकृतसम्म पुग्ने गरेको देखिएको छ’ स्रोतले नेपाल लाइभसँग भन्यो।
योसँगै नासुले काठमाडौं जिल्ला प्रशासनमा क्यान्टिन चलाएर बसेका ललितपुरको गोदावरी नगरपालिका– ७ घर भएका ३० वर्षीय विजय लामासँग निरन्तर सम्पर्क हुने गरेको पनि देखिएको छ। लामाले तिब्बतीलाई नेपाली नागरिकता दिलाउन काम गर्ने गिरोहसँग सम्पर्क गर्ने र त्यसपछि नासुलाई सम्पर्क गरेर नेपाली नागरिकता बनाउने गरेको खुलेको प्रहरीले जनाएको छ। ‘फोन कल तथा अन्य विभिन्न प्रमाणहरूको अधारमा लामा र नासु घिमिरेबीच निरन्तर सम्पर्क भएको देखिन्छ। लामाले नै नागरिकता बनाउनका लागि चाहिने डकुमेन्ट नासु घिमिरेलाई दिने, उनले रुजु गरेर सम्बन्धित ठाउँमा पुर्याउने गरेको देखिएको छ’ प्रहरी स्रोतले भन्यो।
पक्राउ परेका घिमिरे लामो समयसम्म काठमाडौंको नागरिकता फाँटमा काम गरेका व्यक्ति हुन्। उनैले तयार पारेर लगेको डकुमेन्टको आधारमा तिब्बतीलाई नागकिरता बनाइदिएको खुलेको छ। नागरिकता फाँटमा नासु घिमिरेको जस्तो काम गर्ने अन्य व्यक्ति भए पनि गिरोहले भने हरेक पटक नासु घिमिरेमार्फत् नै काम गरेको समेत देखिएको छ।
दुई शाखा अधिकृत पनि निगरानीमा
नासु पक्राउ परेपछि दुई शाखा अधिकृत पनि अनुसन्धानको दायरामा तानिने भएका छन्। तिब्बतीलाई नागरिकता दिलाउने काममा भूमिका देखिएकाले पक्राउ परेका नासुको बयान तथा प्रमाणको आधारमा थप दुई शाखा अधिकृतमाथि पनि अनुसन्धान अघि बढाउनुपर्ने देखिएको प्रहरी स्रोतले जानकारी दियो।
‘अहिले हामीले प्रमाण जुटाउने काम गरिरहेका छौं। पहिला बिचौलियाहरू पक्राउ गर्यौं। उनीहरूमार्फत् नासुसम्म पुगियो। अब नासुमाथिको अनुन्धानबाट पनि हामी माथिसम्म पुग्छौं’ स्रोतले भन्यो।
प्रहरीले निरगानी बढाएका दुई शाखा अधिकृतमध्ये एक जना अहिले काठमाडौं उपत्यकामै रहेको र अर्का एक शाखा अधिकृत भने बाहिर रहेको पाइएको प्रहरी स्रोतले बतायो।
उनीहरूले जानिबुझी थाहा पाएर नै नागरिकता रुजु गर्ने तथा बनाउने काम गरेका हुन् वा अन्जानमा त्यस्तो भएको हो भन्ने पुष्टि गरेर पक्राउ गर्ने तयारी प्रहरीले गरेको छ। प्रहरीको प्रारम्भिक अनुसन्धानको क्रममा दुई शाखा अधिकृतको समेत मिलेमतो देखिएको खुलेको छ।
यसको अनुसन्धान प्रक्रिया अन्तिम बिन्दुसम्म पुग्ने गरी काम भइरहेको काठमाडौं उपत्यका अपराध अनुसन्धान कार्यालयका एसएसपी डा मनोज केसीले बताए।
‘नागरिकताजस्तो गम्भीर विषयको अनुसन्धान अन्तिम बिन्दुसम्म पुगेर गर्छौं। यसमा बिचमै रोकिने भन्ने हुँदैन’, एसएसपी केसीले भने।
९ वर्ष क्यान्टिन चलाएका लामाले मिलाउँथे सीडीओ अफिसको सबै धन्दा
तिब्बतीलाई नेपाली नागरिकता दिलाएको आरोपमा अपराध अनुसन्धान कार्यालयले झापाको कचनाकवल गाउँपालिका–३ का ४७ वर्षीय कृष्णबहादुर कटुवाल, काठमाडौंको बबरमहल घर भइ भक्तपुर ठिमी बस्ने ७० वर्षीय न्युल्केश श्रेष्ठ, मोरङको सुन्दर हरैचा–३ घर भइ ललितपुरको धोबीघाट बस्ने ४९ वर्षीय हिरालाल शिवाकोटी, ललितपुरको गोदावरी नगरपालिका– ७ घर भएका ३० वर्षीय विजय लामा र तनहुँको शुक्लागण्डकी–८ दुलेगौँडास्थित तिब्बती शरणार्थी क्याम्पमा बस्दै आएका २५ वर्षीय लोब्साङ ठिल्लेलाई पक्राउ गरेर सार्वजनिक गरेको थियो।
उनीहरूले प्रतिव्यक्ति ५ लाखसम्म लिएर तिब्बतीलाई नागरिकता बिक्री गर्ने गरेको खुलेको थियो। यो गिरोहले नक्कली बुवा, नक्कली साक्षी खडा गरेर नागरिकता बनाउने गरेका थिए।
कटुवालले विगत १० वर्षदेखि लाइसेन्स र दर्ताबिना नै लेखापढी गर्ने कार्य गर्दै आएका थिए। पक्राउ परेका अर्का व्यक्ति हिरालाल शिवाकोटी समेतको सहयोगमा कटुवालले विभिन्न व्यक्तिहरूको नक्कली नागरिकता, विभिन्न शैक्षिक संस्थाको शैक्षिक प्रमाणपत्रहरू, सवारी चालक अनुमतिपत्र, जन्मदर्ता, बसाइसराइँ, विवाह दर्ता, सम्बन्ध बिच्छेद जस्ता वडा कार्यालयको सिफारिस लगायतका महत्त्वपूर्ण कागजात, छाप तथा दस्तखत समेत कीर्ते गर्दै आएका थिए।
पक्राउ परेका न्युल्केश श्रेष्ठ भने भाडामा नक्कली बाबु बन्ने व्यक्ति हुन्। न्युल्केश श्रेष्ठले हालसम्म गैरनेपाली तिब्बती शरणार्थीहरू सोनाम छोडेन, टासी शेर्पा, यशोदा शेर्पा, नाम्से शेर्पा लगायतको सक्कलै नागरिकता बनाउन नक्कली बाबु बनि सहयोग गरेको प्रहरी अनुसन्धानबाट खुलेको छ।
त्यसवापत उनले प्रतिव्यक्ति १० हजार रुपैयाँ लिने गरेको खुलेको छ। कृष्ण कटुवाल समेतले मिङछुङ शेर्पा नामको नक्कली नेपाली नागरिकता बनाएर प्रतिपटक १० हजार दिएर भाडामा नक्कली बाबुको रूपमा जिल्ला प्रशासन कार्यालय काठमाडौंमा उपस्थित गराइ सनाखत गर्ने गराउने गरेका थिए।
पक्राउ परेका कृष्ण कटवालले किर्ते कागजात तयार गरी गैरनेपाली सक्कली नेपाली नागरिकता दिलाउन प्रतिव्यक्ति ३ लाखदेखि ५ लाख रुपैयाँसम्म रकम लिने गरेको खुलेको छ। लोब्साङ ठिन्ले तिब्बेतियन शरणार्थी क्याम्पमा बस्दै आएका व्यक्ति हुन्।
विजय लामा विगत ९ वर्षदेखि जिल्ला प्रशासन कार्यालयको क्यान्टिनमा काम गर्दै आएका थिए। उनैले सीडीओ अफिसभित्रको सबै काम गर्ने गरेको खुलेको छ। त्यसवापत १ लाख ५० हजार रुपैयाँ लिएर नासुदेखि विभिन्न व्यक्तिसम्मलाई बाँड्ने गरेका थिए।
कृष्ण कटुवालले मात्रै विगत ५ देखि ६ वर्षको अवधिमा ५ सय भन्दा बढी व्यक्तिलाई यस्तै प्रक्रियाबाट नागरिकता दिलाएको प्रहरी अनुसन्धानबाट खुलेको छ।
सम्बन्धित समाचार :
प्रतिव्यक्ति ५ लाख रुपैयाँ लिएर तिब्बती शरणार्थीलाई सक्कली नेपाली नागरिकता
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
