धनगढी- ‘छिट्टै विश्वासको मत लिन्छु,’ माघ २५ गते मुख्यमन्त्रीमा नियुक्त हुँदै गर्दा नेपाली कांग्रेस सुदूरपश्चिमका नेता कमलबहादुर शाहले सञ्चारकर्मीसँग भनेका थिए। तर सुदूरपश्चिम सरकारको मुख्यमन्त्रीमा नियुक्त भएको दुई साता नाघिसघ्दा पनि उनले विश्वासको मत लिने टुङ्गो छैन।
नेकपा माओवादी केन्द्र र नागरिक उन्मुक्ति पार्टीको साथ खोजिरहेका शाहले दुवैबाट समर्थन नपाउँदा विश्वासको मत लिने मिति तय गर्न सकेका छैनन्। केन्द्रमा राष्ट्रपतिको उम्मेदवार तय भएपछि मात्रै उनले विश्वासको मत लिनसक्ने देखिन्छ।
मुख्यमन्त्री शाहले फागुन १६ देखि २० गतेको बीचमा प्रदेश सभामा विश्वासको मत पेस गर्ने तयारी गरेका छन्। नियुक्त भएको ३० दिनभित्र उनले विश्वासको मत लिनुपर्नेछ। तर उनी फागुन २५ को मितिसम्म कुर्ने अवस्थामा छैनन्। फागुन २५ गते राष्ट्रपति निर्वाचन भएकाले सबै प्रदेश सभा सदस्य काठमाडौंमा हुनेछन्। त्यसैले फागुन २० भित्रै उनले सभामा विश्वासको मत लिने प्रदेश सभा सदस्य प्रकाश बमले बताए।
उन्मुक्ति वा माओवादी केन्द्रले समर्थन गरेमा शाह प्रदेशको मुख्यमन्त्रीमा कायम रहनेछन्। तर माओवादी केन्द्रले समर्थन गर्ने वा नगर्नेबारे निर्णय गरेको छैन।
माओवादी केन्द्रका प्रदेश सभा सदस्य रमेश धामीले समर्थन गर्ने वा नगर्नेबारे केन्द्रको निर्णय कुरिरहेको बताए । ‘मुख्यमन्त्रीलाई विश्वासको मत दिने वा नदिनेबारे पार्टीको धारणा भोलिसम्म आउँछ,’ उनी भन्छन्।
नागरिक उन्मुक्ति पनि माग र मुद्दा पूरा नभएसम्म सरकारलाई समर्थन नगर्ने अडानमा छ। उन्मुक्तिको साथ नपाउँदा नेकपा एमालेबाट मुख्यमन्त्रीमा नियुक्त राजेन्द्र रावल पदमुक्त भएका थिए। शाह पनि कुनै एक दलको साथ पाउनेमा अझै विश्वस्त छैनन्।
केही दिनअघि शाहले आफ्नो नेतृत्वको सरकार पाँच वर्ष टिक्ने प्रतिक्रिया दिएका थिए। तर उनले मुख्यमन्त्रीमा आलोपालो गर्ने सर्त अघि बढाउनुपर्ने एक प्रदेश सभा सदस्यले बताए।
प्रदेशमा अहिले शाह अल्पमतमा छन्। उनलाई नेकपा एकीकृत समाजवादी पार्टी र स्वतन्त्र प्रदेश सभा सदस्यको समर्थन रहेको छ। यसअनुसार उनको पक्षमा २४ जना सांसद रहेका छन्। विश्वासको मत पाउन उनलाई २७ जनाको समर्थन जुटाउनुपर्छ।
संविधानको धारा १६८ को उपधारा ५ अनुसार शाहले विश्वासको मत नपाए कुनै सांसदले बहुमत सांसद पुर्याएर नियुक्त हुन सक्नेछन्। सोही अनुसार माओवादी केन्द्र पनि आफ्नो नेतृत्वको सरकार बनाउने रणनीतिमा छ।
शाहले विश्वासको मत नपाए कांग्रेसको साथ लिएर माओवादी केन्द्रका दलका नेता खगराज भट्ट मुख्यमन्त्री बन्ने दाउमा छन्। भट्ट सबै दलको सहमतिमा मुख्यमन्त्री बन्न अहिले प्रदेशमा माओवादी प्रमुख प्रतिपक्षी दल रहेको दावी गरिरहेका छन्।
५३ सदस्यीय सुदूरपश्चिम प्रदेश सभामा नेपाली कांग्रेसका १९, माओवादी केन्द्रका सभामुखसहित ११, नेकपा एमालेका उपसभामुखसहित १०, उन्मुक्तिका सात, एकीकृत समाजवादीका ४, राष्ट्रिय प्रजातन्त्र पार्टी र स्वतन्त्रका १/१ सदस्य रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786800305.jpg)
-1786602170.png)
-1786513116.png)
