काठमाडौं– राष्ट्रपति सी जिनपिङ र राष्ट्रपति डोनाल्ड ट्रम्प बिचको भेटवार्ता करिब एक घण्टा ४० मिनेटमा समाप्त भएको छ।
व्यस्त तालिकाका कारण दुवै नेताको भेट बुसानको गिम्हे अन्तर्राष्ट्रिय विमानस्थलमा भएको हो।
यो ६ वर्षपछि भएको उनीहरूको पहिलो प्रत्यक्ष भेट हो।
वार्ताका विषयबारे विस्तृत जानकारी अझै सार्वजनिक गरिएको छैन।
बैठक अघि ट्रम्पले भनेका थिए, ‘आजै चीनसँग व्यापार सम्झौता साइन हुन सक्छ।’
वार्ताका क्रममा उनले थपे, ‘सी निकै कडा वार्ताकार हुन् । यो सजिलो कुरा होइन, तर हामी एकअर्कालाई राम्ररी चिन्छौं।’
वार्ता सुरु हुनुअघि दुवै नेताले हात मिलाएर अभिवादन गरेका थिए। ट्रम्पले जिनपिङलाई ‘एक सम्मानित र महान देशका महान नेता’ भन्दै प्रशंसा गरे।
त्यस्तै बैठकमा सी जिनपिङले पनि ट्रम्पको ‘शान्ति प्रयास र युद्ध रोक्ने प्रयास’ को प्रशंसा गरे।
उनले भने, ‘चीन र अमेरिका धेरै विषयमा सहमत नहुन सक्छन्, तर संवाद र सहकार्य दुवै देशका लागि अपरिहार्य छन्।’
सीले जोड दिए, ‘दुवै देशले स्थायित्वको दिशामा अघि बढ्नुपर्छ। चीनको विकास ट्रम्पको दृष्टिकोणसँग मेल खान्छ।’
एशिया भ्रमण सकेर ट्रम्प एयर फोर्स वनमार्फत अमेरिका फर्किएका छन्।अहिले सबैको नजर अब यो वार्ताबाट के समझदारी भयो र त्यसको प्रभाव अमेरिकी–चिनियाँ सम्बन्धमा कस्तो पर्छ भन्नेमा केन्द्रित छ।
यसअघि ट्रम्पले यो बैठक चार घण्टासम्म चल्न सक्ने बताएका थिए, तर यो अनुमानित समयभन्दा निकै अगाडि नै समाप्त भयो। यो भेट एसिया-प्यासिफिक इकोनोमिक कोअपरेसन (एपेक) शिखर सम्मेलनको साइडलाइनमा भएको हो, जहाँ दुई नेताले मुख्यतया व्यापार सम्झौताको मुद्दामा छलफल गर्ने बताइको थियो ।
बैठकमा दुवै पक्षबाट सात-सात जना सहभागी थिए । अमेरिकाको तर्फबाट ट्रम्पसँगै विदेश मन्त्री मार्को रुबियो, अमेरिकी व्यापार प्रतिनिधि जेमिसन ग्रीर, ट्रेजरी सचिव स्कट बेस्सेन्ट, वाणिज्य सचिव होवार्ड लट्नक, चीफ अफ स्टाफ सुसी वाइल्स र चीनका लागि अमेरिकी राजदूत डेविड पर्ड्यू रहेका छन्।
चीनको तर्फबाट सीसँगै चीफ अफ स्टाफ काई क्यूई, विदेश मन्त्री वाङ यी, उप-विदेश मन्त्री मा झाओक्सु, उप-प्रधानमन्त्री हे लिफेङ, वाणिज्य मन्त्री वाङ वेनताओ र राष्ट्रिय विकास तथा सुधार आयोगका अध्यक्ष झेङ शानजी रहेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
