स्थानीय तहमा बैंकिङ सेवा विस्तार, असुरक्षा र सुविधा अभावले अझै कठिनाइ

कर्पोरेट

नेपाल लाइभ आइतबार, साउन २७, २०७५ ०४:४४

धनगढी- गत आर्थिक वर्ष २०७४/०७५ को असार मसान्तसम्म प्रदेश सातका ५९ वटा स्थानीय तहमा बैकिङ सेवा विस्तार भएको छ। सरकारले गत आर्थिक वर्षमा मुलुकका सबै स्थानीय तहमा बैंकिङ सेवा पुर्याउने लक्ष्य लिएको थियो। प्रदेश ७ मा एक उपमहानगरपालिका, ३३ नगरपालिका र ५४ गाउँपालिकासहित ८८ वटा स्थानीय तह रहेका छन्।

कैलालीका १३ वटा स्थानीय तहमध्ये मोहन्यालमा मात्रै बैंकिङ सेवा पुगेको छैन। पछिल्लो पटक चुरे गाउँपालिकामा सनराइज बैंकले बैंकिङ सेवा आरम्भ गरेको छ। प्रदेशका बाँकी स्थानीय तहमा पनि बैंकिङ सेवा विस्तार प्रक्रिया जारी रहेको जनाइएको छ।

तर, विकट स्थानीय तहमा बैंकिङ सेवा सञ्चालनमा थुप्रै समस्या र चुनौती रहेको बैंक अधिकारीहरू बताउँछन्। उनीहरूले सुरक्षाको अभाव बैंकिङ सेवा सञ्चालनका लागि सबैभन्दा प्रमुख चुनौती रहेको बताए। चुरे गाउँपालिकास्थित सनराइज बैंकका कर्मचारी धर्म बुढाले भने, 'न इन्टरनेटको सुविधा छ, न सुरक्षाको उचित व्यवस्था। बैंकलाई आवश्यक रकम लिन धनगढी वा अत्तरिया जानुपर्ने बाध्यता छ, बाटोमा चोरी डकैती हुने सधैं खतरा छ।'

उनले स्थानीय तहले बैंक सञ्चालनका लागि आवश्यक सुरक्षा प्रबन्ध गर्नुपर्ने तथा अन्य आवश्यक पुर्वाधार पुर्याउनुपर्ने बताए।

बैंकर्स एसोसिएसनका अध्यक्ष टेकराज भट्टले पूर्वाधार र सुरक्षा नहुँदा कतिपय स्थानीय तहमा बैंकहरूले थुप्रै समस्या भोग्नुपरेको बताए। भने, 'कतिपय स्थानीय तहमा यिनै कारणले बैंक स्थापना गर्न समेत कठिनाइ भइरहेको छ।' उनले सरकारले बैंक तथा वित्तीय संस्थालाई स्थानीय तहमा पुग्न भने पनि आवश्यक सुरक्षा र पुर्वाधारको व्यवस्था गर्न चासो नदिएको गुनासो गरे।

बैंक तथा वित्तीय संस्थाका अधिकारीहरू पूर्वाधार अभावका कारण सरकारका सबै निकाय समेत पुग्न नसकेको सन्दर्भमा बैंक तथा वित्तीय संस्था कसरी जाने भन्ने समस्या रहेको बताउछन्। ‘बैंकलाई कुनै समस्या आइलाग्यो भने सरकारले जिम्मेवारी लिँदैन,’ उनीहरू भन्छन्, 'भोलि बैंकमा केही घटना भयो भने डुब्ने भनेको सर्वसाधारणको रकम नै हो। उनीहरू सरकारका निकाय र बैंक तथा वित्तीय संस्थाहरूलाई सँगसँगै स्थापना गरिनुपर्ने सुझाव दिन्छन्।

नेपाल राष्ट्र बैंक, क्षेत्रीय कार्यालय धनगढीका अनुसार आर्थिक वर्ष २०७४/७५ सम्म प्रदेश ७ का ५९ स्थानीय तहमा बैंकिङ सेवा पुगे पनि ६ वटा नगरपालिका र २३ वटा गाउँपालिकामा अझै सेवा उपलब्ध छैन।
बझाङ र बाजुराका ६/६ दार्चुलाका ४, बैतडी र अछामका ३/३ कञ्चनपुर, डडेल्धुरा र डोटीका २/२ तथा कैलालीको एक स्थानीय तह अझै बैकिङ सेवाबिहीन रहेका छन्।

गत जेठ महिनासम्म प्रदेशका ५९ वटा स्थानीय तह बैंकबिहीन रहेका थिए। नेपाल राष्ट्र बैंकका अनुसार तीमध्ये ४१ स्थानीय तहमा बैंक तथा वित्तीय संस्थाले सेवा विस्तार गर्ने प्रतिबद्धता जनाए पनि १८ वटा स्थानीय तहमा कुनै पनि बैंक तथा वित्तीय संस्था जान मानेका थिएनन्।

नेपाल राष्ट्र बैंक धनगढीका क्षेत्रीय निर्देशक किरण पण्डितले सबै स्थानीय तहमा बैंकिङ सेवा पुर्याउन पहल भइरहेको बताए। उनका अनुसार बैंकहरुले गाउँपालिकामा आवश्यक पूर्वाधार नभएकाले शाखा विस्तार गर्न समस्या भइरहेको जानकारी दिएका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

बंगलादेश बन्यो च्याम्पियन, छैटौंपटक नेपाल उपविजेतामा सीमित

रेखाको ठाउँमा सरु लिम्बु खेल्ने, यस्तो छ नेपालको प्लेइङ ११

कम्युनिष्ट पार्टीमा व्यक्तिवाद हाबी भयो, भ्रष्टाचार पनि बढ्यो : माधव नेपाल