काठमाडौं– काठमाडौंको थापाथलीस्थित बागमती नदी किनारमा रहेको अनाधिकृत संरचना र सुकुम्बासी बस्ती हटाउन खोजिरहेको काठमाडौं महानगरपालिकालाई गृह मन्त्रालयले ‘प्रक्रिया पुर्याएको अवस्थामा’ सहयोग गर्ने जवाफ दिएको छ।
व्यवस्थित रुपमा प्रक्रिया पुर्याएर बस्ती हटाउनका लागि गृहले सहयोग गर्नेबारे गृह मन्त्रालयका प्रवक्ता फणिन्द्रमणि पोखरेलले जानकारी दिए।
‘सुकुम्बासी बस्ती हटाउन समय लाग्छ। भर्खरको भर्खरै हटाउन सकिँदैन। व्यवस्थित प्रक्रिया र मापद्दण्ड पुरा गरेर सुकुम्बासी बस्ती हटाउन हामी महानगरलाई सहयोग गर्छौं। महानगरको पत्रको जवाफमा प्रक्रिया पुरा गरे हामीले सहयोग गर्छौ भनेर भनेका छौं,’ उनले भने।
मंसिरको दोस्रो साता बागमती नदी किनारामा रहेका अनधिकृत संरचना हटाउन पुगेको महानगरको टोलीमाथि आक्रमण भएको थियो। त्यसपछि महानगरका मेयर बालेन्द्र शाह तत्कालीन प्रधानमन्त्री शेरबहादुर देउवासँग सहयोग माग्न पुगेका थिए। देउवाले सहयोग गर्ने वचन दिए पनि प्रशासनले भने सहयोग उपलब्ध गराएन।
गृह प्रशासनले सहयोग गरे बागमती सहितका नदी किनारका अव्यवस्थित बस्ती हटाउने भन्दै महानगरले १३ पुसमा गृह मन्त्रालयलाई अनाधिकृत बस्ती तथा संरचना हटाउन सहयोग माग्दै पत्र लेखेको थियो।
‘अतिक्रमित क्षेत्रमध्ये थापाथलीस्थित बागमती नदी किनारमा अव्यवस्थित र अनाधिकृत रुपमा रहेको संरचना हटाइ सो क्षेत्रको संरक्षण एवं सौन्दर्यकरण गर्ने कार्य तत्काल अगाडी बढाउन बागमती सभ्यता एकीकृत विकास परीयोजना समेतबाट अनुरोध भइ आएको र सो क्षेत्र खाली गराउन महानगरबाट आवश्यक सबै समन्वय र प्रयास अगाडी बढाइएको भएतापनि सो सफल हुन सकेको अवस्था छैन। यसर्थ विशेष गरी थापाथलीस्थित उल्लेखित क्षेत्रमा रहेका अनाधिकृत संरचना हटाइ तहाँ सौन्दर्यीकरणको कार्य तत्काल शुरु गर्ने कार्यक्रम रहेकोले सो संरचना हटाउन आवश्यक सहयोग एवं समन्वयका लागि अनुरोध छ,’ महानगरले गृहमा पठाएको पत्रमा भनिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791799330.png)
-1791796975.png)
-1786602170.png)
