काठमाडौं– पोर्चुगिज सुपरस्टार फुटबलर क्रिस्टियानो रोनाल्डो साउदी अरेबियाको अल नासर क्लबमा आबद्ध भएका छन्। इंग्लिस क्लब म्यानचेस्टर युनाइटेडसँग सम्बन्ध बिग्रिएका रोनाल्डो अकस्मात युरोप छोडेर एसियातर्फ लागेपछि यो धेरैका लागि आश्चर्यको विषय भएको छ।
यसैबीच, स्पेनिस पत्रिका मार्काले रोनाल्डो साउदी क्लब जानुको रहश्य खुलाएको छ। उनी अर्को सिजन च्याम्पियन्स लिग खेल्ने हेतुले अल नासर गएको उसको दाबी छ।
मार्काका अनुसार यदि न्युक्यासल युनाइटेड अर्को सिजनको च्याम्पियन्स लिगमा छनोट भएमा रोनाल्डो सो प्रतियोगिता खेल्न लोनमा अल नासरबाट त्यता जानेछन्।
न्युक्यासलमा पनि साउदीकै मानिसको लगानी रहेको बताइएको छ। यस्तोमा रोनाल्डोले च्याम्पियन्स लिग खेल्ने मनसायले अल नासरसँग सम्झौता गरेका हुन्।
न्युक्यासल प्रिमियर लिगको तेस्रो स्थानमा छ। च्याम्पियन्स लिगमा कायम रहन कम्तीमा शीर्ष चारमा रहनु पर्छ।
न्युक्यासल शीर्ष चारमा परेमा रोनाल्डो आगामी सिजन लोनमा जाने मार्काको दाबी छ।
रोनाल्डो च्याम्पियन्स लिगका ‘बादशाह’ मानिन्छन्। उनी क्लब फुटबलकै सर्वाधिक प्रतिष्ठित यस प्रतियोगिताका सर्वाधिक गोलकर्ता हुन्। साथै, उनी सर्वाधिक पाँच पटकका विजेतासमेत हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
