काठमाडौं– नेकपा (एकीकृत समाजवादी) का पोलिटब्युरो सदस्यहरूले वामपन्थी शक्तिका बीचमा एकता गर्नुपर्नेमा जोड दिएका छन्।
सोमबारदेखि सुरु भएको पार्टीको पोलिटब्युरो बैठकमा आफ्नो धारणा राख्दै पोलिटब्युरो सदस्यहरूले वामपन्थी शक्तिहरुका बीचमा एकता गर्नुपर्नेमा जोड दिएका हुन्।
बैठकपछि सञ्चारकर्मीहरुसँग कुराकानी गर्दै एकीकृत समाजवादीका प्रवक्ता जगन्नाथ खतिवडाले बैठकमा बोल्ने सदस्यहरुले वामपन्थीहरुलाई एकतावद्ध बनाउन पहल गर्नुपर्ने धारणा राखेको बताए। उनले वामपन्थीहरुको एकताको सम्बन्धमा सबैको एकमत रहेको दाबी गरे।
त्यस्तै, संगठन सुदृढीकरण गर्न आगामी पाँच वर्ष पार्टी निर्माणको अभियानमा लाग्नुपर्नेमा पनि सम्पूर्ण सदस्यहरु एकमत रहेको उल्लेख गरे।
बैठकमा करिब ३० जना सदस्यले आफ्नो धारणा राखेको प्रवक्ता खतिवडाले जानकारी दिए।
‘अधिकांशतः आफ्नो पार्टीलाई सबल बनाएर शक्ति सुदृढीकरण गरिसकेपछि मात्रै हामी सबै उपलब्धी प्राप्त गर्नसक्छौँ। आजदेखि अभियान पाँच वर्षसम्म लगातार पार्टी निर्माणको अभियानमा हामी हिड्नुपर्छ भन्नेमा सबैको एक मत छ,’ उनले भने, ‘अब वाम एकताकाबारेमा, वामपन्थीहरुलाई एकतावद्ध बनाउन पहल गर्ने कुरामा सबैको एकमत छ। तर, निर्णय भएको छैन। अरु कतिपय विषयमा विभिन्न प्रकारका छलफल चलिरहेका छन्।’
उनले वर्तमान सरकारमा जाने सन्दर्भमा औपचारिक प्रस्ताव नै नआएको भन्दै यस सम्बन्धमा छलफल नभएको बताए।
बैठकमा सरकारलाई हेर्ने दृष्टिकोणको सम्बन्धमा भने छलफल भएको उनको भनाइ छ।
‘सरकारलाई हेर्ने दृष्टिकोणबारेमा हामी छलफल गरिरहेका छौँ। सरकारमा जाने कि नजाने भनेर छलफल गरिरहेका छैनौँ,’ उनले भने, ‘औपचारिक प्रस्ताव आएपछि त्यो लायक छ कि छैन। हाम्रा उद्देश्य अनुसार हेर्छौ।’
प्रवक्ता खतिवडाले विगतमा सँगै गठबन्धन गरेका नेता पुष्पकमल दाहाल प्रचण्ड प्रधानमन्त्री भएसँगै आफूहरुलाई समर्थन गर्ने कि नगर्ने भन्ने सम्बन्धमा धर्मसंकट परेको बताए।
पार्टीको नीतिलाई स्पष्ट पार्नका लागि पोलिटब्युरो बैठक राखिएको भन्दै उनले परिपक्व निर्णय गरिने बताए।
‘हामीले जनादेश बुझेका छौँ। हामीलाई एउटा धर्मसंकट छ,’ उनले भने, ‘सँगै काम गरेको सहयात्री १७-१८ महिनासम्म हामी गठबन्धनमा सँगै बस्यौँ। कमरेड प्रचण्ड प्रधानमन्त्री हुनुभएको छ। जुन–जुन बाटोबाट हुनुभएको भए पनि उहाँ प्रधानमन्त्री हुनुभयो। व्यक्तिगत रुपमा उहाँप्रति हाम्रो सद्भाव पनि छ।’
तर, व्यक्तिगत रुपमा प्रधानमन्त्री प्रचण्डप्रति सद्भाव भएपनि राजनीतिमा व्यक्तिगत सद्भावले काम नगर्ने उनले स्पष्ट पारे।
‘राजनीति भनेको व्यक्तिगत सद्भावले मात्रै काम गर्ने कुरा नभएकाले पार्टीको नितिगत प्रश्नहरुमा प्रष्टता नभइकन व्यक्तिगत कुराको अर्थ हुँदैन,’ उनले भने।
अर्को बैठक मंगलवार बिहान ११ बजे पुनः बस्ने उनले बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
