संगीत

‘द रोड होम’ सम्झाउने नवीन चौहानको ‘चन्द्रमा’

समर्पण श्री मंगलबार, पुस १९, २०७९ ०८:५८

काठमाडौं– आर्टमाण्डुको गीतमा कथा भन्ने शैली दर्शकले रुचाइसकेका छन्।

दर्जन म्युजिकल फिल्म बनाइसकेका निर्देशक नवीन चौहान केही न केही नयाँ स्वाद बोकेर आइहाल्छन्। कहिले उद्यमशीलताको कथा भन्न ‘तीनपाते’ कोसेली ल्याउँछन् त सीमानाको कथा भन्न ‘बाफ’। ‘घुमीघुमी’बाट बसाइँसराईको मर्म पस्कन्छन् त कहिले सम्बन्ध जोड्ने ‘धागो’को खाजी गर्छन्।

अब म्युजिकल फिल्मको यात्रालाई केहीबेर बिसाउने सुर छ उनको। फिचर्ड फिल्मको तरखर गर्नुअघि उनले गहिरिएर सोचे, ‘एक दर्जन म्युजिकल फिल्म बनाइयो। यसपालि आफैंतिर क्यामेरा तेर्साऊँ न त।’

उनले आफैंतर्फ क्यामेरा मात्र तेर्साएनन्, आफूलाई फिल्म यात्रामा उत्प्रेरित गर्ने चिनियाँ निर्देशक झाङ यी माओलाई ‘ट्रिब्यूट’ पनि दिए।

धेरै वर्षअघि नवीनले झाङ यीको फिल्म ‘द रोड होम’ हेरेका थिए। सन् २०००मा रिलिज भएको यो फिल्म हिमाली गाउँमा पढाउन गएका शिक्षक र गाउँले युवतीको प्रेम कथामा आधारित छ।

‘त्यो फिल्म हेर्नुअघि म फिल्म बनाउनु कठिन काम ठान्थेँ। फिल्म हेरेपछि ममा पनि सक्छु भन्ने हुटहुटी पलाएको थियो,’ नवीन भन्छन।

झाङ यीको यो फिल्मले त्यतिबेलाको विभिन्न अन्तर्राष्ट्रिय अवार्ड जितेको थियो। बर्लिन अन्तर्राष्ट्रिय फिल्म फेस्टिभलमा जुरी ग्राण्ड प्रिक्स र इक्युमेनिकल जुरीको पुरस्कार हात पारेको थियो।

लाग्नसक्छ, झाङ यी माओलाई कसरी ‘ट्रिब्यूट’?

यसका लागि हालै आर्टमाण्डुको युट्युव च्यानलमार्फत् रिलिज भएको म्युजिकल फिल्म ‘चन्द्रमा’को श्रब्य/दृश्य ग्रहण गर्नुपर्छ। ‘चन्द्रमा’को विचरण गरिरहँदा ‘द रोड होम’का रंगिन दृश्य हाम्रो आँखामा आउन सक्छन्। मलिकाको अभिनयले झाओ दी( झाओ जियी)को झझल्को दिन सक्छ।

‘द रोड होम’मा शिक्षकको प्रेममा परेकी झाओले लगाउने रातो पोसाक सम्झौं। अनि ‘चन्द्रमा’कि मलिकालाई। घामका पहेँला किरणले टल्किएका सुन्दर दृश्यले ‘द रोड होम’ आँखाबाट छुट्न दिँदैनन् निर्देशकले।

नवीनको म्युजिकल फिल्ममा चन्द्रमाका रङ यसरी पोखिएका छन्, मानौं कि चन्द्रमा आँखामा टल्किरहेछ।

‘मेरा हरेक प्रोजेक्टमा झाङ यी माओका प्रभाव देखिन्छन्। द रोड होमले मलाई यात्रामा सधैं डोहोर्‍याउन सिकायो। त्यही प्रयोग मैले चन्द्रमामा गरेँ,’ नवीन भन्छन्।

‘द रोड होम’को दृश्य देखिनेजस्तो ठाउँ कहाँ छ त? खोज्दै जाँदा चित्लाङ भेटियो। नवीनले चित्लाङमा छायाङ्कन गर्दा सूर्योदय र सूर्यास्तको समय लिएका छन्। उनले कलर सापटी पनि सोही फिल्मबाट लिए। फिल्ममा झाओजस्तै देखिने पात्र उनले मलिकालाई पाए।

०००

गीतमा सँगीत, शब्द, पृष्ठभूमिको दृश्य र कलाकारको अभिनयको संयोजन सुन्दर छ। लोकबाजाको धनु त नवीनका हरेक गीतमा पाइन्छन्। दर्शकहरूलाई १० मिनेटसम्म म्युजिकल फिल्मले बाँधेर राख्छ। दृश्यसँगै बगेको सँगीत र शब्दहरू यसरी मिसिन्छन्–

आँखिझ्यालैमा
टलक्क टल्कियो चन्द्रमा तिम्रो गालैमा
फूलको तरेली
मुखले बोल्दा बातै लाग्ला झिम्काऊ परेली

निर्देशकले आफूतर्फ क्यामेरा फर्काएको कुरा कथाले बताउँदै जान्छ। गाउँमा सुटिङको टिम आएको छ। एउटी युवती बालबालिकासँग सधैँ सुटिङ हेर्न आउँछे। त्यहाँ उसलाई मनपर्ने कलाकारको सुटिङ हुन्छ। सुटिङस्थलमा स्थानीयको आकर्षण,आपसको प्रेम र टिमको गतिविधि कथामा छन्। नवीन भन्छन्, ‘यो गीत झाङ यीलाई मात्र हैन, गाउँलेहरूलाई पनि ट्रिब्यूट हो।’

सुटिमा निस्कँदा आफूहरूलाई स्थानीयले गरेको प्रेम उनी कहिल्यै भुल्दैनन्। ‘सुरुमा बास दिन नमानेको गाउँमा पछि यसरी कन्भिन्स्ड हुनुभयो कि सुटिङ सकेर फर्कँदा खसी काटेर भोज गराउनुभएको सम्झना छन्। रुवाबासी चलेका सम्झना छन्,’ नवीन भन्छन्।

स्थानीयले ल्याउने लोकल खाजा र कोसेलीका प्रसंग पनि उनले भिडियोमा समेटेका छन्।

भिडियोमा मलिकाले पहिरिएको रातो पोसाकको कन्सेप्ट पनि नवीनले ‘द रोड होम’बाटै सापटी लिएका हुन्।

गाउँले युवतीको एकतर्फी प्रेमलाई निर्देशकले मीठो ढङ्गले प्रस्तुत गरेका छन्।

गीतमा सुस्मा सिग्देलका शब्दहरू भावसहित गुन्गुनाइरहुँ झैँ लाग्छन्। एसडी योगी र रेश्मा पुनको युगल आवाज तथा सुशान्त गौतमको सँगीत निर्देशनले गीतमा प्राण भरिदिएका छन्। भिडियोमा मलिका, सविन कार्की विष्ट, सनया लिम्बु लगायत फिचर्ड छन्।