काठमाडौं– क्याम्बोडिया र थाइल्यान्डको सीमानानजिकै रहेको पोइपेटस्थित एक क्यासिनोमा भएको भीषण आगलागीमा परी निधन भएका एक नेपालीको शव नेपाल पठाउने तयारी भइरहेको छ।
थाई –क्याम्बोडिया सीमामा पर्ने ग्रान्ड डायमन्ड सिटीको भवनमा आगलागी हुँदा झापाका ४० वर्षीय निराकार पाण्डेसहित कम्तीमा २६ जनाको मृत्यु भएको जनाइएको छ।
उक्त क्यासिनोमा कार्यरत तीनजना नेपाली सेफ सुरक्षित रहेको घटनास्थल पुगेका गैरआवासीय नेपाली संघ क्याम्बोडियाका अध्यक्ष लालसिंह खड्काले बताए।
नेपाल लाइभसँग कुरा गर्दै खड्काले बैंककस्थित नेपाली दूतावाससँग समन्वय गरी पाण्डेको शव नेपाल पठाउने तयारी भइरहेको जानबारी दिए।
बैंककस्थित नेपाली दूतावासका प्रथम सचिव खगराज पाण्डेयले घटनास्थलको निरीक्षण गरेर बैंकक फर्किएको पनि उनले बताए। ‘स्वर्गीय पाण्डेका परिवारसँग पनि नेपालमा सम्पर्क भइरहेको छ,’ उनले भने।
'बिहान पौने ६ बजे मेसेज गरेका थिए पाण्डेले'
गैरआवासीय नेपाली संघ क्याम्बोडियाका अध्यक्ष खड्काले पाण्डेलाई आफूले व्यक्तिगत रूपमा पनि चिनेको बताए। ‘स्थानीय समयअनुसार हिजो (बिहीबार) बिहान पौने ६ बजे उहाँको मेसेज आयो। मेरो शव नेपाल पठाई दिनु होला भनेर लेख्नु भएको थियो। साह्रै हतास मनस्थितिमा हुनुहुन्थ्यो। मैले हिम्मत नहार्न भनें। शायद त्यो नै उहाँको अन्तिम मेसेज थियो,’ खड्काले भने।
‘स्थानीय समयअनुसार बुधबार राती ११ः३० बजेतिर होटेलमा आगो लाग्दा पाण्डे १२ औं तलामा थिए। विद्युत अवरुद्ध भएर ढोका बन्द भएका कारण उनी बाहिर निस्कन सकेनन्। त्यसपछि उनले नेपालमा आफ्नो परिवारजनसँग भिडियोमा घण्टौं मार्मिक कुराकानी गरेका थिए। झन्डै ६ घण्टासम्म कोठाभित्रै थुनिँदा पनि उद्धारकर्मी पुग्न नसक्नुले क्याम्बोडियाको आपत्कालीन सुरक्षा व्यवस्थाबारे गम्भीर प्रश्नहरू उठेका छन्।
‘यो अत्यन्तै दुःखदायी घटना भयो। उहाँको परिवारलाई क्षतिपूर्ति दिलाउन सकिन्छ कि? हामीले सक्दो पहल गर्ने छौं,’ खड्काले भने।
क्याम्बोडियाको राजधानी नोम पेन्हबाट झण्डै आठ घण्टा ड्राइभ गरेपछि उक्त होटेल पुग्न सकिन्छ। तर बैंककबाट चाहिँ उक्त होटेल पुग्न साढे तीन घण्टा मात्रै लाग्छ। सो आगलागीमा परी हताहती हुनेको संख्या अरु बढ्न सक्ने आशंका गरिएको छ।
थाइल्यान्डमा जुवा खेलविरुद्ध कडाइ गरिने गरेकाले जुवा खेल्नकै लागि कैयौं थाई नागरिकहरु उक्त होटेल–क्यासिनोमा जाने गरेको बीबीसीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
