पाटन– बैतडीको मेलौली नगरपालिकामा गरिएको तालाबन्दी एक हप्तापछि मंगलबार खुलेको छ। गएको मंगलबार वडा नं ७ का स्थानीयहरुले केशरपुर प्राथमिक स्वास्थ्य केन्द्र रहेकै ठाउँमा १५ शैय्याको आधारभूत अस्पताल निर्माण गर्ने माग सहित तालाबन्दी गरेका थिए।
प्रमुख जिल्ला अधिकारी सुरेश पन्थीको रहोबरमा मंगलबार स्थानीयहरुसँग छलफल गरेर तालाबन्दी खुलेको जिल्ला प्रहरी कार्यालय बैतडीका प्रवक्ता प्रहरी निरीक्षक योगेश खत्रीले बताए।
प्रजिअ पन्थी, प्रहरी नायव उपरीक्षक प्रेमबहादुर शाही, वडा नं ७ का आन्दोलनरत पक्ष, कार्यवाहक नगर प्रमुख कृष्णदत्त भट्ट लगायतको उपस्थितिमा तालाबन्दी खोल्नेबारे छलफल भएको थियो।
नगर प्रमुख भीमबहादुर चन्द नगरपालिकामा नफर्किँदासम्म अस्पतालका बिषयमा कुनै पनि काम अगाडि नबढाउने सहमतिमा तालाबन्दी खोलिएको हो। नगर प्रमुख र उपप्रमुख केही दिन पहिलादेखि काठमाडौंमै रहेका छन्।
यस्तै वडा नं १ का बासिन्दाहरुसँग पनि छलफल भइरहेको प्रहरी प्रवक्ता खत्रीले बताए। मेलौलीमा आधारभूत अस्पताल निर्माणका बिषयमा वडा नं १ र वडा नं ७ का स्थानीयहरुले आ–आफ्नै ठाउँमा बन्नुपर्ने अडान राख्दै आएका छन्। दुवै पक्षको अडानका कारण २०७० सालदेखि अस्पातल निर्माणको काम अघि बढ्न सकेको छैन।
गत बिहीबारमात्रै अस्पताल निर्माणकै विषयमा दुवै पक्षबीच झडप हुँदा ३५ जना घाइतेसमेत भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
