संस्थापन पक्ष रक्षात्मक, इतर पक्ष आक्रामक

नवीन झा मंगलबार, पुस १२, २०७९ ०६:५६

काठमाडौं– आइतबार विकसित राजनीति घटनाक्रमले संसद्को सबैभन्दा ठूलो दल नेपाली कांग्रेस आफ्नो नेतृत्वमा सरकार बनाउनबाट चुकेको छ। परिणामतः कैयौं सम्भावनाहरुका अघिल्तिर उभिएको कांग्रेस एक्कासी शून्य उपलब्धिमा पुग्ने स्थिति उत्पन्न भयो।

आफ्नै नेतृत्वको सरकारमा सहभागी तथा नयाँ प्रतिनिधि सभाको तेस्रो ठूलो दल माओवादी केन्द्रका अध्यक्ष पुष्पकमल दाहाल प्रचण्ड नाटकीय रुपमा प्रधानमन्त्री भनेपछि कांग्रेस प्रतिक्रियाविहीन अवस्थामा पुगेको हो। यद्यपि, पार्टीभित्र र बाहिर बहस, छलफल र विश्लेषणहरु भइरहेका छन्।

कांग्रेस सभापति तथा निवर्तमान प्रधानमन्त्री शेरबहादुर देउवा निकट नेताहरुले माओवादीले धोका दिएको आरोप लगाइरहेका छन्। उता माओवादीले भने कांग्रेसले धोका दिएकाले एमालेसँग सहकार्य गर्नुपर्ने बताएको छ।

कांग्रेसभित्रै भने सभापति देउवा र उनी पक्षका नेताहरुको अक्षमताका कारण यस्ता परिस्थिति सिर्जना भएको तर्क गर्नेहरुको कमी छैन। आइतबारको राजनीतिक घटानाकमपछि देउवा र उनी निकट नेताहरु सार्वजनिक रुपमा मौन देखिएका छन्। उनीहरु आन्तरिक छलफलमै व्यस्त छन्। संस्थापनइतर पक्ष भने देउवा पक्ष महत्त्वपूर्ण सवालमा बृहत्तर छलफल नगरी संकीर्ण घेराबाट अघि बढेको भन्दै ‘खुचिङ्ग’ गर्ने 'मुड'मा देखिन्छन्।

संसदीय दलको निर्वाचनमा सभापति देउवालाई महामन्त्री गगन थापा र विश्वप्रकाश शर्माले चुनौती दिएपछि देउवा पक्ष उनीहरुमाथि असहिष्णु देखिएका थिए। राजनीतिक घटनाक्रमको अत्यन्तै महत्त्वपूर्ण मुद्दाहरुमा छलफल र बैठक चलिरहँदा पनि देउवाले दुई महामन्त्रीहरुलाई वास्ता गरिरहेका थिएनन्।

आक्रामक इतर पक्ष
आइतबार कांग्रेससहितको गठबन्धन भत्केसँगै संस्थापन इतर पक्षका नेताहरुले पार्टी सभापति देउवाको कार्यशैलीप्रति प्रश्नहरु उठाउन थालेका छन्। देउवाका लागि संसदीय दलमा प्रस्तावक नै बनेका रामचन्द्र पौडेलले नै प्रचण्डलाई धोका भएको बताएका थिए। उनले प्रचण्ड बालुवाटारबाट बाहिरिएपछि नै सञ्चारकर्मीलाई प्रतिक्रिया दिँदै प्रचण्डको पक्ष लिएका थिए।

जुन देउवामाथि उच्च तहबाट व्यक्त पहिलो असन्तुष्टि थियो। पौडेल पछिल्लो समयमा माओवादीलाई प्रधानमन्त्री दिएर राष्ट्रपति बन्ने दाउमा थिए। त्यो दाउ अनुसार परिस्थिति निर्माण नहुने भएपछि उनी देउवाप्रति नै आक्रोशित भएका हुन्।

पौडेल मात्रै होइन, कांग्रेसका महामन्त्रीद्वय गगन थापा र विश्वप्रकाश शर्माले पनि पार्टी नेतृत्वप्रति कटाक्ष व्यक्त गरेका छन्। आइतबारको राजनीतिक घटनाक्रमपछि सोमबार पोखरा साहित्य मेलामा बोल्दै उनीहरुले नेतृत्वको कमजोरी उजागर गरेका हुन्।

शर्माले त जे भयो, त्यो राम्रो भएको भन्दै पार्टी रुपानान्तरण र पुस्तान्तरणका सवालमा आफूहरु अघि बढ्ने बताए। शर्मा सामाजिक सञ्जालमा पनि राजनीतिक घटनाक्रमलाई जोडेर टिकाटिप्पणी गरिरहेका छन्। उनले देशभरका पार्टीका नेता कार्यकर्ताहरुले प्रश्न सोधिरहेको तर आफूले जे भयो, त्यो ठीक भएको उत्तर दिने गरेको उल्लेख गरेका छन्।

महामन्त्री थापाले पनि साहित्य मेलामा आइतबार आफूले अपमानित महसुस गरेर काठमाडौंबाट पोखरा आएको गुनासो गरे। उनले पनि पार्टीलाई माथि उठाउने बाचा गरेका छन्।

आइतबार साँझ राष्ट्रपति विद्यादेवी भण्डारीले माओवादी अध्यक्ष प्रचण्डलाई प्रधानमन्त्रीमा नियुक्त गरेलगत्तै कांगेसका नेताहरु अर्जुननरसिंह केसी, चन्द्र भण्डारी लगायतले पार्टी नेतृत्वको दम्भका कारण संसद्‌को सबैभन्दा ठूलो दल भएर पनि कांगेस सरकार बनाउनबाट वञ्चित भएको आरोप लगाएका छन्।

यसरी आइतबारको विकसित राजनीतिक घटनाक्रम हेर्दा पार्टी नेतृत्वप्रति ईतर पक्षका नेताहरु आक्रामक देखिएका छन् भने सभापति देउवा र उनी निकटका नेताहरु मौन र रक्षात्मक देखिएका छन्।

अब कांग्रेसभित्रको संघर्ष कसरी अगाडि बढ्छ, हेर्न बाँकी छ। तर, सभापति देउवामाथि आन्तरिक दबाब बढ्ने निश्चित देखिन्छ।

२०७४ मा देउवाकै नेतृत्वको सरकारले चुनाव गराउँदा कांग्रेसले पराजय बेहोर्दा पनि देउवालाई कुनै फरक नपरेको भन्दै अहिलेको परिस्थिति पनि त्यसै बितेर जाने तर्क गर्नेहरु छन्। तर, विगतभन्दा कांग्रेसको पदाधिकारीहरुको टिम बनोट फरक भएकाले देउवालाई असर पर्न सक्ने तर्क गर्नेहरु पनि छन्। सम्भवतः अब छिट्टै बस्ने कांग्रेस केन्द्रीय कार्यसमिति बैठकमा त्यसको परिदृश्य देखिनेछ।