बैंकहरुको व्यवसाय नबढ्दा लगानीकर्ताले पाउने लाभांशमा संकुचन, ४ बैंकले लाभांश वितरण नगर्ने

बैंक/बिमा/सेयर

सुमित्रा कार्की बुधबार, पुस ६, २०७९ १३:१३

काठमाडौं– बैंक तथा वित्तीय संस्थाले गत आर्थिक वर्षको नाफाबाट आफ्ना लगानीकर्तालाई धमाकम लाभांश वितरण गरिरहेका छन्। सञ्चानमा रहेका २६ वाणिज्य बैंकमध्ये गत आर्थिक वर्ष २०७८/०७९ को नाफाबाट २० वाणिज्य बैंकले लाभांश घोषणा गरेका छन्।

४ वटा वाणिज्य बैंकले भने आफ्ना लगानीकर्ताको ‘हात खाली’ गर्ने भएका छन्। ४ वाणिज्य बैंकले गत आर्थिक वर्षको नाफाबाट आफ्ना लगानीकर्तालाई कुनै पनि लाभांश नदिने घोषणा गरिसकेका छन्। अब २ वटा वाणिज्य बैंकले मात्रै लाभांश घोषणा गर्न बाँकी रहेको छ।

गत आर्थिक वर्षमा बैंकहरुले राम्रो मुनाफा आर्जन गरेको भए तापनि लगानीककर्तालाई दिने लाभांशमा भने संकुचन आएको देखिन्छ। गत आर्थिक वर्ष २०७८/०७९ मा २६ वाणिज्य बैंकले सार्वजनिक गरेको अपरिस्कृत वित्तीय विवरणअनुसार ७४ अर्ब ४७ करोड रुपैयाँभन्दा माथि खुद मुनाफा आर्जन गरेका थिए। यस आर्थिक वर्षमा बैंकहरुको मुनाफा आर्थिक वर्ष २०७७/०७८ को भन्दा ३२.२७ प्रतिशतले बढेको थियो।

यसैगरी, गत आर्थिक वर्ष २०७८/०७९ मा बैंकहरुको वितरणयोग्य मुनाफा ५६ अर्ब ७८ करोड ६६ लाख रुपैयाँ बराबर रहेको थियो। यस अवधिसम्म २६ वाणिज्य बैंकको चुक्ता पुँजी ३ खर्ब ५१ अर्ब ६६ करोड २७ लाख रुपैयाँ बराबर रहेको थियो। यसमा बैंकहरुको औसत वितरणयोग्य नाफा १६.१५ प्रतिशत रहेको छ।

तर चालु आर्थिक वर्षको वितरणयोग्य नाफाबाट २० वाणिज्य बैंकले नगद लाभांशमा औसत ७.३३ प्रतिशत र बोनश लाभांशमा ११.४७ प्रतिशतमात्र लाभांश दिने घोषणा गरेका छन्।

२० वाणिज्य बैंकको लाभांश कसको कति?
नबिले बैंकले गत आर्थिक वर्षको नाफाबाट आफ्ना लगानीकर्तालाई ३० प्रतिशत लाभांश दिने भएको छ। बैंकले १८.५० प्रतिशत बोनस सेयर (कर प्रयोजनसहित) ११.५० प्रतिशत नगb लाभांश आफ्ना लगानीकर्तालाई दिने घोषणा गरेको छ।

यसैगरी, एभरेस्ट बैंकले गत आर्थिक वर्षको नाफाबाट आफ्ना लगानीकर्तालाई २०.६८ प्रतिशत लाभांश दिने भएको छ। बैंकले गत आवको नाफाबाट आफ्ना लगानीकर्तालाई १३ प्रतिशत बोनस सेयर (कर प्रयोजनसहित) ७.६८ प्रतिशत लाभांश वितरण गर्ने निर्णय गरेको हो।

सानिमा बैंकले गत आर्थिक वर्षको नाफाबाट आफ्ना लगानीकर्तालाई १०.९८ प्रतिशत लाभांश दिने भएको छ। बैंकले १० प्रतिशत बोनस सेयर र कर प्रयोजनको लागि ०.९८ प्रतिशत नगत लाभांश वितरण गर्ने घोषणा गरेको हो।

सिभिल बैंकले गत आर्थिक वर्षको नाफाबाट ५.२६ प्रतिशत लाभांश दिने घोषणा गरेको छ। बैंकको पुस ५ गते बसेको सञ्चालक समिति बैठकले ५ प्रतिशत बोनस सेयर र कर तिर्न ०.२६ प्रतिशत नगद गरी कूल ५.२६ प्रतिशत लाभांश दिने निर्णय गरेको हो।

हिमालयन बैंकले गत आर्थिक वर्षको मुनाफाबाट सेयरधनीलाई १९.११ प्रतिशत लाभांश प्रस्ताव गरेको छ। मंगलबार बसेको कम्पनी सञ्चालक समितिको बैठकले आर्थिक वर्ष २०७८/७९ को मुनाफाबाट सेयरधनीलाई वितरण गर्ने लाभांश प्रस्ताव गरेको हो। बैंकले सेयरधनीलाई हाल कायम चुक्ता पुँजीको ८ प्रतिशत बोनस सेयर र लाभांशमा लाग्ने कर प्रयोजनको लागिसमेत गरी ११.११ प्रतिशत नगद लाभांश वितरण गर्ने प्रस्ताव गरेको छ।

प्रभु बैंकले गत आर्थिक वर्षको नाफाबाट आफ्ना लगानीकर्तालाई ८ प्रतिशत लाभांश दिने भएको छ। बैंकले आफ्ना लगानीकर्तालाई ७.५० प्रतिशत बोनस सेयर र कर प्रयोजनसहित १.५० प्रतिशत नगद लाभांश वितरण गर्ने निर्णय गरेको हो।

बैंक अफ काठमाण्डूले गत आर्थिक वर्षको नाफाबाट आफ्ना लगानीकर्तालाई २०.५९ प्रतिशत लाभांश दिने घोषणा गरेको छ। बैंकले आफ्ना अगानीकर्तालाई ६ प्रतिशत बोनस सेयर र कर प्रयोजनसहित १४.९५ प्रतिशत नगद लाभांश वितरण गर्ने प्रस्ताव गरेको हो। बैंकले आफ्ना लगानीकर्तालाई बोनस सेयरभन्दा बढी नगद लाभांश दिने निर्णय गरेको छ।

सेञ्चुरी बैंकले ५ प्रतिशत लाभांश दिने घोषणा गरेको छ। बैंकले गत वर्षको नाफाबाट आफ्ना लगानीकर्तालाई ४.७५ प्रतिशत बोनस सेयर कर प्रयोजनको लागि ०.२५ प्रतिशत नगद लाभांश वितरण गर्ने घोषणा गरेको हो।

नेपाल इन्भेस्टमेन्ट बैंकले गत आर्थिक वर्षको नाफबाट आफ्ना लगानीकर्तालाई ११ प्रतिशत लाभांश दिने घोषणा गरेको छ। बैंकले आफ्ना लगानीकर्तालाई ४ प्रतिशत बोनस सेयर, कर प्रयोजनसहित ७ प्रतिशत नगत लाभांश दिने घोषणा गरेको हो। यस बैंकले पनि बोनस सेयरभन्दा नगद लाभांश वितरणमा जोड दिएको छ।

प्राइम कर्मर्सियल बैंकले ८.९५ प्रतिशत लाभांश वितरण गर्ने भएको छ। बैंकले गत आर्थिक वर्षको नाफाबाट आफ्ना लगानीकर्तालाई ४ प्रतिशत बोनस सेयर र कर प्रयोजनसहित ४.९५ प्रतिशत नगद लाभांश वितरण गर्ने घोषणा गरेको हो। यस बैंकले पनि बोनस सेयरभन्दा नगद लाभांश बढी दिने भएको हो।

मेगा बैंकले गत आर्थिक वर्षको नाफाबाट आफ्ना लगानीकर्तालाई ७.७९ प्रतिशत लाभांश वितरण गर्ने भएको छ। बैंकले गत आर्थिक वर्षको नाफाबाट ४ प्रतिशत बोनस सेयर र ३.७९ प्रतिशत नगद लाभांश वितरण गर्ने भएको हो।

यसैगरी, नेपाल क्रेडिट एण्ड कमर्सियल (एनसीसी) बैंकले गत आर्थिक वर्षको नाफाबाट आफ्ना लगानीकर्तालाई ११ प्रतिशत लाभांश वितरण गर्ने भएको छ। बैंकले ३.३७ बोनस सेयर र कर प्रयोजन सहित ७.६३ प्रतिशत नगद लाभांश वितरण गर्ने घोषणा गरेको हो।

ग्लोबल आईएमई बैंकले गत आर्थिक वर्षको नाफाबाट आफ्ना लगानीकर्तालाई १३.६० प्रतिशत लाभांश वितरण गर्ने घोषणा गरेको छ। बैंकले यसपटक बोनसभन्दा नगद लाभांश वितरणमा जोड दिएको छ। बैंकले यस नाफाबाट ३ प्रतिशत बोनस सेयर, कर प्रयोजनसहित १०.६० प्रतिशत नगद लाभांश वितरण गर्ने भएको छ।

नेपाल एसबीआई बैंकले गत आर्थिक वर्षको नाफाबाट आफ्ना लगानीकर्तालाई १०.५३ प्रतिशत लाभांश दिने भएको छ। बैंकले ३ प्रतिशत बोनस सेयर र करप्रयोजन सहित ७.७३ प्रतिशत नगत लाभांश बाँड्ने भएको छ। यस बैंकले पनि नगद लाभांशलाई प्राथमिकतामा राखेको छ।

नेपाल बैंक लिमिटेडले गत आर्थिक वर्षको नाफाबाट आफ्ना लगानीकर्तालाई १२ प्रतिशत लाभांश दिने भएको छ। यस बैंकले पनि बोनसर सेयरभन्दा नगद लाभांश बढि दिन लागेको छ। बैंकले गत आर्थिक वर्षको नाफाबाट आफ्ना लगानीकर्तालाई २ प्रतिशत बोनस सेयर र कर प्रयोजनसहित १० प्रतिशत नगद दिन लागेको हो।

स्ट्याण्डर्ड चार्टर्ड बैंकले गत आर्थिक वर्षको मुनाफाबाट १६.५१ प्रतिशत लाभांश वितरण गर्ने भएको छ। बैंकले कर प्रयोजनसहित नगद लाभांश मात्र वितरण गर्ने घोषणा गरको छ। कुमारी बैंकले गत आर्थिक वर्षको नाफाबाट आफ्ना लगानीकर्तालाई १२.५० प्रतिशत नगद लाभांशमात्र वितरण गर्न लागेको छ।

सिटिजन्स बैंकले गत आर्थिक वर्षको नाफाबाट आफ्ना लगानीकर्तालाई ९ प्रतिशत नगद लाभांशमात्र वितरण गर्ने घोषणा गरेको छ। यसैगरी, एनएमबी बैंकले गत आर्थिक वर्षको नाफाबाट अफ्ना लगानीकर्तालाई ८.२५ प्रतिशत नगद लाभांशमात्र वितरण गर्ने भएको छ।

सिद्धार्थ बैंकले गत आर्थिक वर्षको नाफाबाट आफ्ना लगानीकर्तालाई १३.१६ प्रतिशत लाभांश वितरण गर्ने भएको छ। बैंकले १२.५० प्रतिशत बोनस सेयर र कर प्रयोजनका लागि ०.६६ प्रतिशत नगद लाभांश वितरण गर्ने घोषणा गरेको हो।

लाभांश घोषणा गरेका २० बैंकहरुमध्ये ५ बैंकले साधारण सभाबाट लाभांश पारित गरिसकेका छन्। सिटिजन्स बैंक, नेपाल क्रेडिट एण्ड कमर्सियल बैंक (एनसीसी), कुमारी बैंक, स्ट्याण्डर्ड चार्टर्ड बैंक, सानिमा बैंक र बैंक अफ काठमाण्डूले साधारण सभा सम्पन्न गरेर लाभांश वितरणको प्रस्ताव पनि पारित गरिसकेका छन् ।

बाँकी बैंकले साधारण सभा बोलाएका छन्। बैंकको साधारण सभा बसेपछि लाभांश पारित हुन्छ। अब कृषि विकास बैंक र राष्ट्रिय वाणिज्य बैंकको लाभांश घोषणा हुन बाँकी छ। राष्ट्रिय वाणिज्य बैंकमा सर्वधारणको सेयर स्वामित्व छैन।

पुँजी कोष पर्याप्त नहुँदा ४ बैंकको लाभांश रोकियो
पुँजी कोष पर्याप्त नहुँदा ४ बैंकको लाभांश रोकिएको छ। यसपटक एनआईसी एसिया बैंक, सनराइज बैंक, लक्ष्मी बैंक र माछापुच्छे बैंकले लाभांश नदिने घोषणा गरेका छन्।

राष्ट्र बैंकको प्रावधानअनुसार पुँजी कोष ‘टाइट’ भएका बैंकहरुले यस वर्ष लाभांश नदिने घोषणा गरेका हुन्। गत वर्ष लाभांश नबाँडेको एनआईसी एसियाले यस वर्ष पनि लाभांश बाँड्न नसक्ने अवस्था रहेको छ। बाँकी दुई बैंकले भने हालसम्म आउँदा पनि लाभांश घोषणा गरेका छैनन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।