काठमाडौं– हङकङ सिक्सेस अन्तर्गत नेपालले भारतविरुद्ध ऐतिहासिक जित निकालेको छ । आफ्नो तेस्रो खेलमा भारतलाई नेपालले ९२ रनको फराकिलो अन्तरले जित निकालेको हो ।
यो जित हङकङ सिक्सेस इतिहासमै सबैभन्दा ठूलो अन्तरको जित हो । यसअघि सबैभन्दा ठूलो रन अन्तरले गत वर्षको प्रतियोगितामा ओमानले इंग्ल्यान्डविरुद्ध निकालेको थियो । ओमानले इंग्ल्यान्डलाई ६७ रन अन्तरले हराएको थियो ।
भारतविरुद्ध नेपालको जितमा बसिर अहमदले २, रासिद खानले ३ र रुपेश सिंहले एक विकेट लिए । पहिला ब्याटिङ गरेको नेपालले विना विकेटको क्षतिमा ६ ओभरमा १३७ रन जोडेको थियो । रासिद खानले अर्धशतक बनाएर रिटार्ड हर्ट हुँदा सन्दीप जोराले ४७ रनमा अविजत रहे ।
खानले १८ बलमा ५५ रन बनाउँदा सन्दीपले १२ बलमा ४७ रन जोडे । यस्तै लोकेश बमले ३१ रन बनाए । यता भारतका लागि भारत चिप्ली र प्रियांक पांचाले १२/१२ रन बनाउनुबाहेक अरु ब्याटरले दोहोरो अंकमा रन बनाउन सकेनन् । १३८ रनको लक्ष्य पछ्याउने क्रममा भारत तीन ओभरमा अलआउट हुँदै ४५ रनमै समेटियो ।
यस्तै आजैको खेलमा अस्ट्रेलियाले बंगलादेशलाई ५४ रन अन्तरले हराएको छ । अफगानिस्तानले शुक्रबार दक्षिण अफ्रिकालाई ४९ रनले हराएको थियो ।
नेपालले अब नवौं स्थानका लागि भोलि बिहान ६ बजे खेल्दैछ । बटममा रहेर नेपालले बलको फाइनल जित्ने योजनामा रहेको छ । यसअघिका खेलमा नेपाल पहिलोमा अफगानिस्तान र दोस्रोमा आजै श्रीलंकासँग पराजित भएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
