काठमाडौं– नेपाली कांग्रेसको संसदीय दलको निर्वाचन यसपटक पार्टीबाहेक अन्यत्र पनि उत्साहजनक रुपमा लागेको छ। दलभित्रबाट आगामी पाँच वर्षका लागि संसद्को नेतृत्व गर्न चयन हुने नेताका लागि मंगलबार सभापति शेरबहादुर देउवा र महामन्त्री गगन थापाले उम्मेदवारी दर्ता गरेका छन्। यससँगै सामाजिक सञ्जाल प्रयोगकर्ताहरूले विभिन्न टिप्पणी गरिरहेका छन्।
युवा पुस्ताका थापा र अवकाश उमेरमा पुगेका देउवाबीचको प्रतिस्पर्धालाई लिएर सामाजिक सञ्जाल प्रयोगकर्ताले चासो र महत्त्व दिएर टिकाटिप्पणी गरिहेका छन्। पक्ष/विपक्षमा मत जाहेर गरिरहेका छन्।
लेखक आन्विका गिरिले सामाजिक सञ्जालमा लेखेकी छन् ‘शेखर कोइरालाले गगन थापालाई सर्मथन गर्ने निर्णयको लाममा शेरबहादुर देउवा र रामचन्द्र पौडेल पनि उभिउन्। मिनेन्द्र रिजालहरूले देउवा र पौडेललाई यो बुझाउन सकुन्। लु हेरम् यति ताकत रिजाल तहका नेतामा छ कि छैन।’
अर्का सामाजिक सञ्जाल प्रयोगकर्ता लेखक एवं पत्रकार भानु बोखिमले पनि यही विषयलाई चासो दिएर लेखेका छन्। ‘नेपाली कांग्रेसको पछिल्लो महाधिवेशनमा शेखर कोइरालाले सभापतिमा मेरो यही नै अन्तिम प्रतिस्पर्धा हो भने जस्तो लाग्छ’, उनले लेखेका छन् ‘तर, आउने महाधिवेशनमा पनि उनैलाई उम्मेदवार बनाउने कुरा भयो रे। यसरी नेताले कुरा फेरेपछि राजनीति चाहिँ फेरिन्छ त?’
पत्रकार एवं नागरिक अगुवा नारायण वाग्लेले पनि अब आशा जगाउने काम होस् भनी शुभेच्छा व्यक्त गरेका छन्।
‘नेपाली कांग्रेसमा गगन थापा, विश्वप्रकाश शर्मा, धनराज गुरुङ र प्रदीप पौडेल एकै ठाउँ उभिएर आज एउटा नयाँ सन्देश दिएछन्’ उनले लेखेका छन् ‘नयाँ पुस्ता एकसाथ मिलेर काम गर्न चाहन्छ। अब यस नेता पंक्तिले संसद्लाई जीवन्त बनाउने र राजनीतिप्रति आमसाधारणको आशा जगाउने प्रयास गरोस!’
सामाजिक सञ्जाल प्रयोगकर्ताहरूले थापाको उपस्थितिलाई स्वागत गर्दै युवा पुस्ताको आगमनले राजनीतिमा सकारात्मक परिर्वतन गर्ने आस गरेका छन् भने देउवाको उमेर पुस्ताहरूको विदाई हुनुपर्ने टिप्पणी गरेका छन्।
पत्रकार तुफान न्यौपानेले लेखेका छन्,‘अनि छ नि– रामचन्द्र पौडेल वा सुवासचन्द्र नेम्वाङलाई हेरेपछि – तपाईंलाई ‘दैवको लीला’ माथि अलि अलि पनि विश्वास लाग्दैन?’
पत्रकार अनिल गिरिले मंगलबार रातभर हुने चलखेल महत्त्वपूर्ण हुने लेखेका छन्। उनले विदेशी र स्वदेशी दुवै चलखेलप्रति लक्षित गर्दै यस्तो टिप्पणी गरेको देखिन्छ।
राजाराम शर्माले समूहलाई कन्भिन्स गरेर आफ्नो पक्षबाट गगन एक्लो उम्मेदवार बन्न सक्नु नै पहिलो सफलता भएको बताएका छन्।
त्यस्तै, पत्रकार लक्ष्मण कार्कीले पुरानो प्रसंग उल्लेख गर्दै सामाजिक सञ्जालमा लेखेका छन् ‘गिरिजाप्रसाद कोइराला र कृष्णप्रसाद भट्टराई हुँदाहुँदै संसदीय दलको नेतामा सर्वसम्मत भएपछि शेरबहादुर देउवाले भन्नुभएको रहेछ– तपाइँहरूले युवालाई विश्वास गर्दै दलको नेतामा सर्वसम्मत गरेर एकदमै राम्रो काम गर्नुभयो, यो निकै नै अर्थपूर्ण छ।’
सामाजिक सञ्जाल प्रयोगकर्ता माधवी पौडेलले गगन थापाको उम्मेदवारीले सकारात्मक सन्देश दिएको उल्लेख गरेकी छन्।
‘निर्वाचनमा जनताले प्राय:जसो ठाँउमा नयाँ र सक्षम उम्मेदवार जिताएर संसद्मा पुर्याए। राजनीतिमा युवा र सक्षम व्यक्ति भाषणमा मात्र होइन, दलहरूभित्र अभ्यास जरुरी छ’, उनले लेखेकी छन् ‘यतिखेर कांग्रेसभित्रै सुरु हुन खोजेको सो अभ्यासमा देउवाले उम्मेदवारी फिर्ता लिई गगनलाई अगाडि सार्दा समग्र कांग्रेसको जित हुनेछ।’
त्यस्तै, पत्रकार गोविन्द अधिकारीले पनि कांग्रेसले पुनर्जीवन पाउने आशा व्यक्त गरेका छन्। ‘गगनले उम्मेदवार हुन आफ्नो समूहको समर्थन पाउँदा पनि गजबको उत्साह सामाजिक सञ्जालमा देखियो। जिते भने प्रधानमन्त्री नभए पनि कांग्रेसले पुनर्जीवन पाउने देखिन्छ,’ उनले लेखेका छन्।
बुधबार बिहान कांग्रेसको संसदीय दलको नेताका लागि निर्वाचन हुँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769598146.jpg)
-1769597259.png)
-1764146706.png)
