काठमाडौं- नेकपा माओवादी केन्द्रले सत्ता-गठबन्धनमा 'प्याकेज'मै सहमति खोज्ने निर्णय गरेको छ। सोमबारको पदाधिकारी बैठकले प्रधानमन्त्रीका लागि मात्र नभई अन्य शक्तिशाली पद पनि एक चरणमा टुंग्याउनुपर्ने म्यान्डेट अध्यक्ष पुष्पकमल दाहाल प्रचण्डलाई दिएको छ।
माओवादी केन्द्रका एक नेताका अनुसार सत्ता-गठबन्धनमा छलफल गर्दा प्रधानमन्त्रीको मात्र नभई राष्ट्रपति, उपराष्ट्रपति, सभामुख र उपसभामुखको हुनुपर्ने कुरा बैठकमा उठेको थियो। कांग्रेसले पहिले प्रधानमन्त्री लिएर सरकार बनाएपछि अन्य पद दिन आनाकानी गर्न सक्ने भन्दै नेताहरुले अध्यक्ष प्रचण्डलाई यस्तो सुझाव दिएका हुन्।
बैठकमा प्रचण्डले आफ्नो चाहना पनि त्यही भएको बताएका थिए। कांग्रेसभित्र नै 'पावर सेयरिङ'मा समस्या भइरहेकाले पहिले गठबन्धनमा मिलाउनुपर्ने प्रचण्डको पनि धारणा थियो। उनको भनाइ उद्धृत गर्दै एक नेताले भने, 'कांग्रेस अहिले विभिन्न गुटमा विभाजित छ। भित्रै महत्वपूर्ण पद भागबन्डा गरेर संसदीय दलको नेता छानिने अवस्था छ। त्यसैले पावर सेयरिङका विषयमा सहमति खोजेर मात्रै सरकार बनाउनेतिर अग्रसर हुनुपर्छ।'
सत्ता-गठबन्धनका दल मिलेर सरकार बनाउन राष्ट्रपतिकहाँ दावी गर्ने नेपाली कांग्रेस सभापति समेत रहेका प्रधानमन्त्री देउवाको चाहनामा प्रचण्डले नै ब्रेक लगाइदिएका हुन्। कांग्रेसमा संसदीय दलको नेताका लागि सहमति नजुट्ने देखेपछि सरकारको दावी संसदीय दलको निर्वाचनपछि गर्ने निर्णय माओवादी केन्द्रले गरेको हो।
आफूले शक्तिशाली पदहरुमा पावर सेयरिङ प्याकेजमै टुंग्याउन चाहेको कुरा प्रचण्डले सोमबार सार्वजनिक रुपमा बताएका छन्। गृहनगर चितवन पुगेका उनले विमानस्थलमा पत्रकारसँग कुरा गर्दै प्रधानमन्त्रीसहित पाँच वटा पदलाई लिएर प्याकेजमै सहमति खोजिने बताए। सरकार बनाउनका लागि राष्ट्रपतिले दिएको ७ दिनकै समयमा यी सबै पद बाँडफाँटको टुंगो लाग्ने उनको भनाइ थियो।
प्रचण्डले भने, 'पावर सेयरिङ मिलाउने कुरामा राष्ट्रपति, उपराष्ट्रपति, सभामुख र उपसभामुख पनि तत्काल टुंग्याउने कुरा छ। प्याकेजमै टुंग्याउन चाहेका छौं। ७ दिनमै यो हुन्छ।'
राष्ट्रपतिमा गैरराजनीतिक व्यक्तित्व खोज्ने कुरामा प्रचण्डले सम्भावना नै नरहेको बताए। केही बुद्धिजीवीले सुझाव दिए पनि त्यस विषयमा छलफल नभएको उनको भनाइ छ। 'गठबन्धन र राजनीतिक दलमा चर्चा भएको होइन। सम्भावना पनि छैन।'
नेकपा एमाले अध्यक्ष केपी शर्मा ओलीले संसद् विघटन गरेपछि कांग्रेसको नेतृत्वमा पाँचदलीय गठबन्धन बनेको थियो। उक्त गठबन्धन बनाउँदा नै देउवासँग सरकारको नेतृत्व आलोपालो गर्ने सहमति भएको प्रचण्डले खुलाएका छन्। जुन अद्यापि कायम रहेको उनको दावी छ।
त्यसलाई बटमलाइन बनाउन नचाहेको बताएका उनले प्रधानमन्त्री नपाउँदा अन्य महत्वपूर्ण पदमा आफ्नो पार्टीको दावी रहने प्रष्ट संकेत गरेका छन्।
प्रचण्डको प्याकेजले देउवालाई हतार
माओवादी केन्द्रले शक्ति बाँडफाँट नगरी सरकार बनाउने कुरामा सहमति नगरेपछि कांग्रेस सभापति शेरबहादुर देउवा संसदीय दलको नेता चयन प्रक्रियातिर अघि बढेको बुझिएको छ। पहिल्यै राष्ट्रपति अर्को पार्टीको भागमा पर्नेगरी सहमति गर्ने अवस्था आउँदा पार्टीभित्र अल्पमतमा पर्ने डर देउवालाई छ। पार्टीका केही नेतालाई राष्ट्रपतिको आश्वासन दिएर आफ्नो पक्षमा राख्ने प्रयास देउवाले गरिरहेका छन्।
त्यसैले आइतबार नै कार्य सम्पादन समितिको बैठक बोलाएर पुस ६ गते संसदीय दलको निर्वाचन गर्ने तयारी थालिएको हो। कांग्रेस संसदीय दलको नेता टुंगो लागेपछि मात्रै सत्ता-गठबन्धनको बैठक बोलाउने रणनीति देउवाले अख्तियार गर्नेछन्। त्यसो हुँदा यता संसदीय दलको नेता चयन भइसक्नेछ भने उता अन्य चार दल लगायतले माग्ने पदमा उदारता देखाउन पनि समस्या पर्नेछैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
