काठमाडौं– नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले व्यावसायिक आइडिया भए लगानीको समस्या नरहेको बताएका छन्।
शनिबार बुटवलमा आयोजित युवा व्यवसायी समिटलाई सम्बोधन गर्दै वरिष्ठ उपाध्यक्ष ढकालले व्यवसाय गर्ने आइडिया भए लगानीका लागि लगानीकर्ता तथा बैंकहरू उपलब्ध हुने स्पष्ट पारे।
‘यदि तपाईंसँग आइडिया छ, तपाईं आमजनताको लागि काम गर्नुहुन्छ र इमानदारीसाथ काम गर्नुहुन्छ भने तपाईंलाई लगानीको समस्या हुँदैन। बैंक तथा वित्तीय सस्था र लगानीकर्ताहरु तपाईंलाई लगानी गर्न तयार हुन्छन्। अहिले भलै बंैकमा तरलताको समस्या देखिएको छ। तर, मलाई लाग्छ यो समस्या लामो रहँदैन। बिस्तारै सहज हुँदै जान्छ,’ उनले भने।
मूल्यवृद्धि र बैंकिङ क्षेत्रमा देखिएको तरलता अभावका कारण मुलुकको अर्थतन्त्रमा परेको समस्याले व्यवसाय र व्यवसायीहरु मारमा परेको उनले बताए।
अहिले निजी क्षेत्रले उठाएका एजेण्डाहरु निजीक्षेत्रको मात्र नभई समग्र अर्थतन्त्रको सुधारको लागि रहेको बताउँदै वरिष्ठ उपाध्यक्ष ढकालले निजी क्षेत्रका मुद्दा भन्दै वेवास्ता गर्दै जाने हो भने यसको परिणाम सबै नेपालीले भोग्नुपर्ने बताए।
उनले सरकारी संयन्त्रबीच एक–आपसमा समन्वयको कमी रहेको र त्यसको मार निजी क्षेत्रले खेप्नुपरेको गुनासो पोखे।
रेमिट्यान्स, बैंकिङ तथा पर्यटन क्षेत्रकामा आफ्नो व्यवसायिक सफलताको उदाहरण दिँदै ढकालले राज्यको प्राथमिकता र आम जनताको सेवासँग जोडिएका कुनै पनि व्यवसाय सजिलै सफल हुने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
