काठमाडौं– सत्तारुढ नेकपा (माओवादी केन्द्र)का महासचिव देवप्रसाद गुरुङले राजनीतिक पृष्ठभूमिभन्दा बाहिर गएर राष्ट्रपति बनाउने कुरा सोच्न पनि नसकिने टिप्पणी गरेका छन्।
मुलुकमा आर्थिक तथा वैदेशिक हस्तक्षेप चुलिएको बेला राजनीतिक पृष्ठभूमिभन्दा बाहिर गएर राष्ट्रपति बनाउने कुरा राष्ट्रिय आत्मसमर्पणवादी चिन्तन हुने महासचिव गुरुङको भनाइ छ। संवाद डबलीले शुक्रबार काठमाडौंमा आयोजना गरेको एक कार्यक्रममा बोल्दै उनले यो व्यवस्था र प्रणाली रहुन्जेल मुलुकको नेतृत्व गर्ने कुरा राजनीतिक दलहरुको नेतृत्वले नै गर्नुको विकल्प नरहेको स्पष्ट पारे। उनले राजनीतिक दलहरुभन्दा बाहिर गएर राष्ट्रपति बनाउने कुरा आफ्नो दल र सत्तारुढ पाँच दलभित्र कहीँकतै पनि छलफल नभएको दाबी गरे।
महासचिव गुरुङले गैरराजनीतिक व्यक्तिलाई राष्ट्रपति बनाउने कुरा अहिलेको राजनीतिक प्रणाली अनुकूलको दृष्टिकोण नभएकाले मान्य नहुने तर्क गरे।
‘संस्थागत रुपमा मैले यस्तो कुनै जानकारी पाएको छैन। पार्टीमा पनि कुरा उठेको छैन। पाँच दलीय गठबन्धनमा पनि यो कुरा कतैबाट उठेको छैन। तर, पनि हिजोबाट कतिपय मिडियाहरुमार्फत् यो कुरा सुनिराखिएको छ, आइराखेको छ। अब सुनेकै कुरा ठीक हो भने यो सोच, यो भिजन अहिलेको सिस्टम अनुकूलको भिजन होइन, दृष्टिकोण होइन’, उनले भने, ‘किनभने अहिलेसम्मको विकासको यात्राले के चाहिँ आत्मासातिकरण गर्दै आएको हो भने अब मुलुकको नेतृत्व दलहरुले गर्नुपर्छ। त्यसकारणले मल्टीपार्टी डेमोक्रेसीको कन्सेप्ट अगाडि आयो।’
राजनीतिक पृष्ठभूमि, राजनीतिक विचारधारा, राजनीतिक मूल्य, मान्यता, आदर्शको आधारमा उदाएका नेताहरुबाट नै मुलुकको नेतृत्व गर्न सक्ने भन्दै उनले मुलुकको नेतृत्व गर्नका लागि दलहरु नै सक्षम रहेको दाबी गरे।
‘दलका नेताहरुमा, राजनीतिक नेतृत्वहरुमा सीमारहित हुन्छन् भन्ने होइन। सीमाहरु पनि हुन सक्छ। कमीकमजोरीहरु पनि हुन सक्छ। ती कमीकमजोरीका बाबजुत पनि अहिलेको सन्दर्भमा दलहरुको नेताहरुको विकल्प छैन’, उनले भने, ‘दलहरुको विकल्प छैन। दलीय प्रणालीको विकल्प छैन। राजनीतिक पृष्ठभूमि र राजनीतिक पृष्ठभूमिबाट आएको लिडरहरुको विकल्प छैन। तर, यो मान्यताभन्दा फरक ढंगले राजनीतिक पृष्ठभूमिभन्दा बाहिरका न्युट्रलको नाममा ल्याउने कुरा जुन ढंगले सोचहरु सुनिएको छ। यदि यथार्थ हो भने यो प्रणालीबाटै विचलित भएको सोच हो त्यो। यदि यही हो भने बहुदलीय प्रणाली किन ?’
बहुदलीय प्रणाली भन्ने अनि अभ्यास चाहिँ निर्दलीय प्रणालीको गर्न थालियो भने मुलुकमा राम्रो नहुने उनको भनाइ छ। राष्ट्रियताको दृष्टिकोणबाट संकटमा भएकाले यस्तो अभ्यास हुन नसक्ने बताए।
‘संकट मोचन गर्नका लागि दलका नेताहरुको विकल्प खोज्नु हुँदैन। अहिले मुलुकको नेतृत्व गर्ने कुरा, राष्ट्रको रक्षा गर्ने कुरा, संरक्षण गर्ने कुरा यतिखेर दलहरुले अग्रसरता लिनुको विकल्प छैन’, उनले भने, ‘दलका नेताहरु नै अग्रसर हुनुको विकल्प छैन। त्योभन्दा बाहिर सोच्न मिल्दैन। यदि गैरराजनीतिक खलको नेतृत्व सोच्ने हो भने त्यो राष्ट्रिय आत्मसर्मपणवादी चिन्तन हुन्छ।’
उनले अब बन्ने सरकारको नेतृत्वमा आफ्नो पार्टीका अध्यक्ष पुष्पकमल दाहालको दाबी रहेको पनि बताए। महासचिव गुरुङले माओवादी विचारले मुलुकलाई नेतृत्व गरेको र त्यसको नेता हुनुको नाताले प्रचण्डको नेतृत्वमा सरकार बनाउनु स्वभाविक हुने जिकिर समेत गरे।
‘गिरिजाप्रसाद कोइराला अहिले हुनुहुन्न। एउटा सिंगो प्रचण्ड मात्रै बाँकी रहनु भएको छ। त्यसकारणले यो संकट पर्दाखेरी स्टेटम्यानसिप लिएका पात्रहरु अगाडि बढ्ने कि नबढ्ने भन्ने प्रश्न छ’, उनले भने, ‘मुलुकमा जुन समस्याहरु पैदा भएको छ। यो अवस्थामा मुलुकको अभिभावकको रुपमा रहेको, मुलुकको यो व्यवस्थाको प्रस्तावको रुपमा रहेको, यो मुलुकको संरक्षकको रुपमा रहेको नेतृत्व अगाडि बढ्ने कि नबढने भन्ने प्रश्न आउँछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772193271.png)
-1764146706.png)
