काठमाडौं- कतारमा जारी २२औं विश्वकपमा हुने खेलको हारजितलाई लिएर नेपालमा करोडौं रुपैयाँको बेटिङ (सट्टेबाजी) हुने गरेको पाइएको छ।
काठमाडौं उपत्यका अपराध अनुसन्धान कार्यालयले बेटिङका काठमाडौंस्थित एजेन्टलाई पक्राउ गरेपछि सो कुरा बाहिर आएको हो। विश्वकप फुटबलमा हुने हारजितलाई रसियन बेटिङ एप वान एक्स बेटमार्फत बेटिङ राख्न लगाएर ठूलो आर्थिक कारोबार हुने गरेको पाइएको छ।
अपराध अनुसन्धान कार्यालयले बिहीबार मात्रै १० करोड रुपैयाँको सट्टेबाजी कारोबार गरिसकेका एक व्यक्तिलाई पक्राउ गरेको छ। लमजुङको सुन्दरबजार-१ का २६ वर्षीय सुजन गौलीलाई पक्राउ गरिएको छ। गौलीले इ-सेवा, आईएमई पे, खल्ती एपमार्फत २ करोड ३६ लाख ३३ हजार १३८ रुपैयाँ बराबरको कारोबार गर्ने गरेको देखिएको छ।
त्यसैगरी विभिन्न २६ वटा वालेटमार्फत उनले ७ करोड ७२ लाख ८९ हजार ४६ रुपैयाँ बराबरीको सट्टेबाजी खेलाएको समेत देखिएको अपराध अनुसन्धान कार्यालयका एसपी तथा प्रवक्ता कृष्ण कोइरालाले बताए।
सट्टेबाजी खेलाउने वान एक्स एपका नेपालका एजेन्ट हुन् गौली।
यसअघि कात्तिक २६ गते अपराध अनुसन्धान कार्यालयले नै ललितपुरबाट वान एक्स बेटिङ एपका अर्का एजेन्ट मोहत्तरीका २० वर्षीय आदर्श ठाकुरलाई पक्राउ गरेको थियो। २ करोड २ लाख ८४ हजार ४४८ रुपैयाँ बराबरको सट्टेबाजी उनले खेलाएका थिए। विभिन्न व्यक्तिका नागरिकता र मोबाइल नम्बरबाट ४८५ वटा डिजिटल वालेट खोलेर उनले बेटिङ धन्दा चलाउँदै आएका थिए। उनी विगत ८ महिनादेखि बेटिङ धन्दामा लागेको अनुसन्धानबाट खुलेको थियो।
बिटक्वाइन र हुण्डीमार्फत विदेशमा पैसा
सट्टेबाजी गरेर प्राप्त भएको रकम बिटक्वाइन र हुण्डीमार्फत विदेशमा पुग्ने गरेको काठमाडौं उपत्यका अपराध अनुसन्धान कार्यालयका एसपी तथा प्रवक्ता कृष्ण कोइरालाले बताए।
‘एजेन्ट राखेर बेटिङ एपमार्फत सट्टेबाजी खेलाएर रकम प्राप्त गर्ने र उक्त रकम बिटक्वाइनमा लगानी गरेर र हुण्डीमार्फत विदेश पुग्ने गरेको अनुसन्धानले देखाएको छ,’ एसपी कोइरालाले भने।
बिटक्वाइन डिजिटल करेन्सी हो। कम्प्युटर सफ्टवेयरमार्फत गणितीय सूत्रको प्रयोग गरी इन्टरनेटमार्फत बिटक्वाइनको कारोबार गरिन्छ।
बिटक्वाइनद्वारा केही समान खरिद-बिक्री तथा पैसा आदान-प्रदान गर्न बैंक जस्तो तेस्रो पक्षको आवश्यकता पर्दैन। यसको कारोबारमा कुनै सीमा हुँदैन र यसको कारोबार इन्टरनेटबाट हुने हुँदा संसारको जुनै कुनाबाट पनि कारोबार गर्न सकिन्छ। यसैको प्रयोग गरेर सट्टेबाजीमार्फत आर्जन गरेको पैसा विदेश पुग्ने गरेको प्रहरी अनुसन्धानले देखाएको छ।
योसँगै हुण्डीमार्फत पनि विदेशमा पैसा पउाठने गरेको पाइएको छ।
अनलाइन मिटिङ गरेर बेटिङ धन्दा
काठमाडौंस्थित बेटिङका एजेन्टहरुले हरेक दिन हुने खेलमा राखिने बेटिङबारे अनलाइन मिटिङ गरेर खेलाउने गरेको पाइएको छ। प्रहरी अनुसन्धानका क्रममा वान एक्स बेटका काठमाडौंस्थित एजेन्टहरुले खेलमा सहभागी टिम र तिनीहरुले जित्ने सक्ने आधार, कसले जित्न सक्ने सम्भावना बढी छ, कुन टिमको पक्षमा बाजी राख्दा जित्नेलाई कतिसम्म दिनेजस्ता विषयहरु अनलाइन मिटिङमार्फत टुंगो लगाउने गरेको पाइएको छ।
अनलाइन मिटिङका लागि एजेन्टहरुलाई कोड उपलब्ध गराइने र मिटिङबाट हारजितको पक्ष-विपक्षमा कति रकम दिनेभन्ने उक्त मिटिङले तोक्ने गरेको पाइएको छ।
यी एजेन्टहरुले बेटिङमार्फत खेलाएको रकमबाट प्राप्त हुने रकमको २५ प्रतिशत कमिसन लिने गरेको पाइएको काठमाडौं उपत्यका अपराध अनुसन्धान कार्यालयका एक प्रहरी अधिकारीले बताए।
इन्जिनियरदेखि माल्टा जान लागेकासम्म बेटिङका एजेन्ट
प्रहरीले पक्राउ गरेका गौली माल्टा जान लागेका व्यक्ति हुन्। यसअघि खाडी मुलुक गएर आएका गौली भने अहिले माल्टा जाने तयारीमा रहेका थिए। वान एक्स बेटमा जोडिएर उनले करोडौंको कारोबार गर्दै आएको पाइएको छ।
यसअघि पक्राउ परेका अर्का व्यक्ति ठाकुर भने सिभिल इन्जिनियरिङका विद्यार्थी हुन्। उनी पोखरामा इन्जिनियरिङ पढ्दै आएका थिए।
रसिया बस्ने डेबिड केसी नाम गरेका व्यक्तिमार्फत उनले नेपालमा बेटिङ धन्दा चलाउँदै आएको पाइएको छ।
फितलो कानुनको फाइदा
सट्टेबाजी खेलाउने विरुद्ध हुने कारबाहीको प्रक्रिया फितलो भएकाले पनि यो धन्दा मौलाएको प्रहरीको बुझाइ छ। करोडौंको कारोबार भएको देखिए पनि १० हजार रुपैयाँमै छुट्न सक्ने प्रावधान भएकाले सट्टेबाजी धन्दा फस्टाएको प्रहरी अधिकारी बताउँछन्।
मुलुक फौजदारी अपराध संहिता २०७४ को परिच्छेद ५ अन्तर्गतको कसुरमा सट्टेबाजी मुद्दाको कसुर चलाइन्छ।
परिच्छेद ५ को दफा १२५ मा जुवा सट्टेबाजी गर्नु नहुने उल्लेख छ। सट्टेबाजी गरेमा १ वर्षसम्म कैद र १० हजार रुपैयाँसम्म जरिवाना हुने प्रावधान छ। करोडौं करोडको सट्टेबाजी गरेको व्यक्ति जम्माजम्मी १० हजार जरिवाना तिरेर छुट्ने अवस्था आएका यस्ता प्रकारका अपराधहरुले बढवा पाएको प्रहरी अधिकारीको तर्क छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
