काठमाडौं- हालै सम्पन्न तेस्रो राष्ट्रिय महाधिवेशनबाट नवलपरासीपूर्व हुप्सेकोट गाउँपालिकाकी अध्यक्ष लक्ष्मी पाण्डे गाउँपालिका राष्ट्रिय महासंघको अध्यक्षमा निर्वाचित भएकी छन्। पाण्डे नेपाली कांग्रेसका तर्फबाट महासंघ अध्यक्ष निर्वाचित भएकी हुन्।
काठमाडौंको कमलादीस्थित प्रज्ञा प्रतिष्ठानमा सम्पन्न महाधिवेशनबाट पाण्डेसहित ३७ सदस्यीय कार्यसमिति सर्वसम्मत चयन भएको छ। महासचिवमा भने नेकपा एमालेबाट स्याङ्जा कालीगण्डकी गाउँपालिकाका अध्यक्ष खिमबहादुर थापा चयन भए।
त्यस्तै, सचिवमा सिन्धुली फिक्कल गाउँपालिकाकी उपाध्यक्ष पार्वती सुनार निर्वाचित भएकी छन्। दलहरुको सहमतिका आधारमा नेतृत्व सर्वसम्मत चयन गरिएको हो। पहिलो दलबाट अध्यक्ष र उपाध्यक्ष र दोस्रो दलबाट महासचिव र सचिव सर्वसम्मत चयन गर्ने प्रावधान छ।
पाण्डेको अघिल्लो कार्यकालमा कार्यसदस्यका रुपमा काम गरेको अनुभव छ। उनी २०७४ यता निरन्तर हुप्सेकोट गाउँपालिका अध्यक्ष छन्। नेपालमा ४६० गाउँपालिका छन्। गाउँपालिका राष्ट्रिय महासंघको छाता संगठन हो।
२०२६ सालमा पाल्पामा जन्मिए पनि पाण्डेको परिवार उनी सानै हुँदा पूर्वी नवलपरासीको पहाडी भेग रकुवामा बसाइँ सर्यो। उनको हुर्काइ र पढाइ पनि रकुवामै भयो। उनलाई पाल्पाका सम्झना भने छैन।
किसान परिवारमा जन्मेकी पाण्डेले प्ररम्भिक शिक्षा भने बेलडाँडी प्राविमा लिइन्। कक्षा ८ सम्म यही विद्यालयमा पढेकी उनले २०४५ सालमा एसएलसी पास गरेपछि कक्षा ११/१२ भने स्याङ्जाको वालिङ क्याम्पसबाट पूरा गरिन्।
पुर्ख्यौली घर पनि वालिङ नै भएकाले उनका आफ्ना आफन्त यहीँ बस्छन्। त्यसैले उनले वालिङ नै बसेर थप अध्ययन गरिन्। उनले त्रिभुवन विश्वविद्यालय अन्तर्गत लुम्बिनी क्याम्पसबाट समाजशास्त्रमा मास्टर डिग्री गरेकी छन्। उनी लामो समयसम्म अध्यापन पेसामा संलग्न थिइन्।
सरकारी जागिर छाडेर राजनीति
लक्ष्मीले अस्थायी र स्थायी गरेर १७ वर्षसम्म अध्यापन गरिन्। नवलपरासीका विभिन्न विद्यालयमा पढाइन्। बेलझाँडीमा रहेको जनतामा माध्यमिक विद्यालयमा लामो समय पढाइन्।
स्कुले जीवनमा नै नेपाली कांग्रेस निकट महिला संघमा आवद्ध पाण्डे ८ कक्षामा पढ्ने बेला नै नेपाल विद्यार्थी संघमा काम गरिन्। लुम्बिनी क्याम्पस पढ्दा राजनीतिमा थप सक्रिय भइन्। उनका ठूलो बुबा गाउँमा राजनीति गर्थे। ठूलो बुबाको प्रेरणाबाट नै राजनीतिमा सहभागी भएको उनी बताउँछिन्।
पाण्डेले टोलमा आफैंले नेपाल महिला संघको स्थापना गरिन्। त्यतिबेला गाउँ-टोलमा महिला संघको स्थापना भएको थिएन। नेपाल महिला संघको इकाई कमिटी सभापति बनिन्। पार्टीका विभिन्न क्षेत्रमा काम गरिन्।
नवलपरासी जिल्लाको महिला संघको सभापति भएर काम गरेकी पाण्डेले महिला लोकतान्त्रिक संगठन निर्माण गरिन्। महिलाका मुद्दामा निरन्तर बोलिन्। समाजको तल्लो स्तरमा काम गरिन्। नेपाली कांग्रेसको महासमिति सदस्य समेत बनिन्।
२०७४ सालमा स्थानीय तहको निर्वाचनमा हुप्सेकोट गाउँपालिका अध्यक्षको उम्मेदवार बनिन्। अनि शैक्षिक पेसाबाट राजीनामा दिइन्।
दुई पटक हुप्सेकोट गाउँपालिका अध्यक्ष
लक्ष्मी हुप्सेकोट गाउँपालिकाको दुई कार्यकाल अध्यक्ष भइन्। संघीयता कार्यान्वयनपछि २०७० सालमा पहिलो पटक स्थानीय सरकार सञ्चालनमा आएको थियो। त्यतिबेला काम गर्न ठूलै चुनौती थियो। ‘कार्यकारी पदमा जान सजिलो कसैलाई पनि हुँदैन’, उने भनिन्।
२०७४ सालको स्थानीय तह निर्वाचनमा पनि पार्टीले उनलाई नै गाउँपालिका अध्यक्षमा टिकट दियो। पाँच वर्षको अनुभव थियो। उनी भन्छिन्, ‘मैले काम पहिलो पटक राम्रो काम गरेको पार्टीले मूल्यांकन गर्यो।’ उनी निर्वाचित पनि भइन्।
संघीयताको सुरुवात गर्दा सिक्दै, चुनौती मोल्दै काम गरिन्। पहिलाका अधुरा काम पूरा गर्न आफुलाई पुन: उम्मेदवार बनाएको पाण्डे बताउँछिन्। ‘व्यक्ति परिवर्तनभन्दा पनि समस्या समाधान चुनौती हो,’ उनी भन्छिन्। जनताको रोजाइ भएर नै दोस्रो कार्यकाल निर्वाचित भएको उनको ठहर छ।
भर्खरै सम्पन्न भएको स्थानीय तहको निर्वाचनमा पनि पाण्डे निर्वाचित भइन्। उनले ६ हजार ४५५ मत ल्याइन् भने नेकपा एमालेका चेतबहादुर रानाले ५ हजार ७४१ मत ल्याएका थिए। पाण्डे सत्ता गठबन्धनकी साझा उम्मेदवार थिइन। दुई पटक गाउँपालिका अध्यक्ष हुँदै उनी अहिले गाउँपालिका राष्ट्रिय महासंघको अध्यक्ष निर्वाचित भएकी छन्।
तीन तहको सरकारको पुलको काम गर्न महासंघ
स्थानीय सरकार आफैंमा कार्यकारी भूमिकामा छ। स्थानीय, प्रदेश र संघको सरकारबीच समन्वयकारी भूमिका गर्नाका लागि गाउँपालिका राष्ट्रिय महासंघको स्थापना भएको पाण्डे बताउँछिन्।
उनका अनुसार संघीयताभन्दा पहिला केन्द्रीकृत सरकार थियो। त्यो बेलामा पनि गाविसको पनि महासंघ रहेको थियो। त्यो बेलादेखिको अभ्यासलाई निरन्तरता दिइएको उनले बताइन्। 'गाउँगाउँमा सिंहदरबारको नारा छ। यसलाई कार्यान्वयन गर्नाका लागि पनि महासंघको आवश्यकता छ,' उनले भनिन्।
स्थानीय सरकारलाई बलियो बनाउनुपर्ने उनको भनाइ छ। 'तीन सरकारबीचको अन्तरलाई जोड्नु छ। बाझिएका कानुनलाई सहज बनाउनु छ,' पाण्डेले भनिन्, ‘म पार्टीभन्दा पनि जनताका सबै जनप्रतिनिधिको साझा प्रतिनिधि बन्नेछु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765273665.jpg)
-1764146706.png)
-1763721444.png)
