काठमाडौं– नयाँ निर्वाचन सम्पन्न भएसँगै केन्द्र र प्रदेश सरकारको नेतृत्वका लागि तीव्र लबिइङ चलिरहेको छ। खासगरी सत्ता गठबन्धनभित्र शक्ति बाँडफाँट कसरी गर्ने भन्ने आन्तरिक गृहकार्य भइरहेको छ। वर्तमान सत्ता गठबन्धनलाई नै निरन्तरता दिने निर्णय गरिसकेका गठबन्धनका शीर्ष नेताहरूले शक्ति बाँडफाँटमा प्याकेजमै सहमति गर्ने बताइरहेका छन्।
तर, नेतृत्वका लागि अन्तरपार्टी मात्र होइन पार्टी–पार्टीभित्र पनि आकांक्षी बढिरहेका छन्। चुनावबाट पहिलो पार्टी बनेको नेपाली कांग्रेसभित्र पनि संसदीय दलको नेताका लागि सभापति शेरबहादुर देउवा र महामन्त्री गगन थापाबीच प्रतिस्पर्धा हुने देखिन्छ। दलको नेताका लागि देउवाले औपचारिक रुपमा केही बोलेका छैनन्, तर महामन्त्री थापाले भने प्रधानमन्त्री बन्नेगरी दलको नेतामा उठ्ने घोषणा गरिसकेका छन्। अर्का महामन्त्री विश्वप्रकाश शर्माले पनि गगनका लागि ‘क्याम्पियन’ गरिरहेका छन्। देउवा समूहका नेताहरू भने देउवालाई नै अघि सार्ने गरी दौडधुपमा छन्।
केन्द्रमा जस्तै कर्णाली प्रदेशमा पनि दलको नेताका लागि कांग्रेसभित्र तीव्र प्रतिस्पर्धा हुने भएको छ। सत्ता गठबन्धनबीच कर्णाली प्रदेश सरकारको नेतृत्व कांग्रेसलाई दिने सहमति भएको खण्डमा दलको नेता नै मुख्यमन्त्री हुने भएकाले प्रतिस्पर्धा चर्को देखिन्छ।
हालका मुख्यमन्त्री जीवनबहादुर शाही पुन: मुख्यमन्त्रीमा दोहोरिने योजनामा रहेका बेला कांग्रेस केन्द्रीय सदस्य एवं जाजरकोट प्रदेश सभा (२) बाट निर्वाचित राजीव विक्रम शाहले पनि दलको नेतामा उम्मेदवारी दिने घोषणा गरेका छन्। प्रतिनिधि सभा सदस्यका आकांक्षी रहेका उनी गठबन्धनबीच जाजरकोटमा माओवादीका शक्तिबहादुर बस्नेतलाई उम्मेदवार बनाउने सहमति भएपछि प्रदेश सभा सदस्यका उम्मेदवार बनेका थिए।
दलको नेताका लागि आफू हरेक हिसाबले योग्य रहेको भन्दै शाहले आफू त्यसको तयारीमा जुटेको बताएका छन्। ‘नेपाली कांग्रेस कर्णाली प्रदेश सभामा संसदीय दलको नेताको रुपमा मैदानमा उत्रने तयारीमा छु’, शाहले भने, ‘प्रतिस्पर्धा लोकतन्त्रको सौन्दर्य हो। म दलको नेताको प्रतिस्पर्धाबाट पछि हट्दिनँ। नेताहरूले मलाई प्रतिस्पर्धा गर्न दिनुपर्छ।’
उनले आफ्ना सिनियर नेताहरूलाई सम्मान गर्दै आफू निर्वाचित क्षेत्र जाजरकोट र समग्र कर्णालीको विकास, सुशासन र समृद्धिका लागि दलको नेतामा उम्मेदवारी दिन लागेको बताए।
शाहले आफूले पार्टीभित्र १३औं महाधिनवेशनदेखि नै त्याग गर्दै आएको समेत उल्लेख गरे। कांग्रेसको १३औं महाधिवेशनमा शाह केन्द्रीय सदस्यका दाबेदार थिए। तर, त्यतिबेला उनलाई केन्द्रीय सदस्य उठ्नबाट ‘ब्याक’ गराइएको थियो। त्यतिबेला जीवन शाही नै केन्द्रीय सदस्य बनाइएका थिए। केन्द्रीय सदस्यबाट ‘ब्याक’ गराइएका शाहलाई तत्कालीन अवस्थामा कांग्रेसको नेतृत्वमा सरकार बन्ने अवस्था आउँदा मन्त्री बनाउने भनिएको उनीनिकट स्रोतको दाबी छ। तर, पछि शाहीलाई नै मन्त्री बनाइएको थियो। यी दुवै जना त्यतिबेला संविधान सभा सदस्य थिए।
‘पार्टीको १४औं महाधिवेशनमा पनि उहाँ कर्णाली प्रदेश समितिको सभापतिका लागि बलियो दाबेदार हुनुहुन्थ्यो। तर, अग्रजलाई सम्मान र अनुशासनमा रहेर अरुलाई नै निर्विरोध हुने वातावरण बनाएर त्याग गर्नुभयो’, शाहनिकट एक नेता भन्छन्, ‘पटक–पटक अरुकै लागि पछि हट्ने कुरा हुँदैन। त्यही भएर उहाँले यसपटक कर्णालीमा संसदीय दलको नेतामा उम्मेदवारी दिने घोषणा गर्नुभएको हो।’
१४औं महाधिवेशन भने शाह केन्द्रीय सदस्यमा निर्वाचित भए भने शाही पराजित भएका थिए। दलको नेताको तयारी गरिरहेका शाही र शाह दुवै कांग्रेसभित्र एकै समूहका हुन्। पार्टीभित्र समूह एउटै भए पनि कांग्रेस उपसभापति पूर्णबहादुर खड्काको साथ शाहीलाई रहने देखिन्छ। शाहले ‘बालुवाटार’कै साथ पाए भने चाहिँ उनी दलको नेता हुँदै मुख्यमन्त्री हुन सक्नेछन्। देउवासँगै उनकी पत्नी आरजुसँग पनि शाहको निकट सम्बन्ध छ।
मंसिर ४ गते सम्पन्न प्रदेश सभा निर्वाचनमा कर्णाली प्रदेशमा कांग्रेसले प्रत्यक्षतर्फ ९ र समानुपातिकतर्फ ५ गरि १४ सिट जितेर पहिलो पार्टी बनेको छ।
कर्णालीमा दोस्रो दल बनेको माओवादी केन्द्रले प्रत्यक्षतर्फ ९ र समानुपातिकतर्फ ४ सिट जितेको छ। गठबन्धनको घटक एकीकृत समाजवादीले समानुपातिकतर्फ एक मात्र सिट जितेको छ। यी तीन दलको सांसद संख्या २८ हुन्छ। जबकि सरकार बनाउनका लागि २१ सांसदको साथ भए पुग्छ। कर्णाली प्रदेश सभा ४० सदस्यीय छ।
प्रमुख प्रतिपक्ष एमालेले भने प्रत्यक्षतर्फ ४ र समानुपातिकतर्फ ५ सिट जितेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770205330.png)
-1764146706.png)
