काठमाडौं– मंसिर ४ मा भएको निर्वाचनमा प्रतिनिधि सभा सदस्य उम्मेदवार बन्दा अमरेश कुमार सिंह र प्रभु साहले आ–आफ्नो पार्टीबाट विद्रोह गरेर स्वतन्त्र उम्मेदवारी दिए। साहले एमालेबाट पाएको टिकट ‘होल्ड’ गर्दै रौतहट–३ बाट स्वतन्त्र उम्मेदवारी दिए भने सिंहलाई उनको पार्टी नेपाली कांग्रेसले टिकट नै नदिएपछि सर्लाही–४ बाट स्वतन्त्र उम्मेदवार बने। संयोगले साह र सिंह दुवै निर्वाचित भए।
उनीहरूसँगै प्रतिनिधि सभामा पाँच जना स्वतन्त्र उम्मेदवार निर्वाचित भएका छन्। सत्ता गठबन्धनलाई सरकार बनाउन बहुमत नहुँदा स्वतन्त्रको संख्या नयाँ संसद्मा सरकार बनाउन ‘म्याजिक संख्या’ देखिएको छ। सिंह र साहसँगै रौतहट–२ बाट साहनिकट किरण साह, मोरङ–५ बाट योगेन्द्र मण्डल निर्वाचित भएका छन् भने बर्दिया–२ बाट लालवीर चौधरी निर्वाचित भएका छन्। चौधरी नागरिक उन्मुक्ति पार्टीका संरक्षक रेशम चौधरीका बुवा समेत हुन। त्यही भएर उन्मुक्ति पार्टी जता जान्छ लालवीर उतै लाग्ने आकलन छ।
प्रदेशहरूमा पनि निर्वाचित भएका स्वतन्त्र उम्मेदवारहरूको संख्या यो पटक ‘म्याजिक’ रुपमा उदाएको छ। जसकारण स्वतन्त्र सांसदहरू अब के गर्छन् भन्ने चासो देखिएको छ। सिंह विगतमा नेपाली कांग्रेस र साह एमालेसहित माओवादीमा प्रभावशाली भूमिकामा देखिएकाले उनीहरूको सम्भावित कदमलाई लिएर चासो देखिएको छ।
यो बीचमा यी दुवै नेताहरू नयाँ पार्टी खोल्ने गृहकार्यमा जुटेका सूचना पनि सार्वजनिक भएका छन्। प्रतिनिधि सभादेखि प्रदेश सभासम्म निर्वाचित स्वतन्त्र सांसदहरूलाई एकीकृत गरेर नयाँ पार्टी बनाउने चर्चाले अहिले राजीतकि वृत्त तातेको छ।
तर, साह र सिंह अहिले नै कुनै निर्णयमा पुगिनसकेको बताउँछन्। नेपाल लाइभसँग सम्पर्कमा आएका साह र सिंहले तत्कालै नयाँ पार्टी गठन गरिहाल्ने अवस्थामा पुगिनसकेको बताए। ‘अब के गर्ने भन्ने छलफलहरू चाहिँ सुरु गरेका हौं’, सिंहले भने, ‘अहिले तत्कालै पार्टी गठनतर्फ अघि बढेका होइनौं।’
आफ्नो विद्रोहलाई जनताले साथ दिएकाले उनीहरूको सल्लाह अनुसार अघि बढ्ने सोच रहेको सिंह बताउँछन्। ‘नेपाली कांग्रेसले मलाई निर्वाचित क्षेत्रमा टिकट नदिएर अन्य नेतालाई उम्मेदवार बनायो’, सिंहले भने, ‘मैले विद्रोह गरेर स्वतन्त्र उम्मेदवारी दिएँ। जनताले अनुमोदन गरे। अहिले थरीथरी ढंगले विश्लेषण र समाचारहरू आइरहेका छन्। तर, म हतारमा कुनै निर्णय गर्ने पक्षमा छैन।’
हतारमा पार्टी गठन गरेर फुर्सदमा पछुताउने काम नगर्ने सिंहको भनाइ छ। पछिल्ला केही दिनयता आफू माओवादी केन्द्रका अध्यक्ष प्रचण्ड, नेकपा एकीकृत समाजवादीका अध्यक्ष माधवकुमार नेपालसहित स्वतन्त्र जितेका प्रभु साहलगायतका नेतासँग छलफलमा भएपनि कुनै ठोस निष्कर्षमा पुगिनसकेको सिंहको भनाइ छ। उनले आफू यो संसद्को केही वर्ष स्वतन्त्र भूमिकामै रहने सम्भावना पनि औंल्याए।
साह भन्छन्– संगठन चाहिन्छ तर, तत्कालै केही गर्ने पक्षमा छैनौं
लामो समय माओवादीमा राजनीति गरेका र पटक–पटक मन्त्री भएका प्रभु साह नेकपा विभाजनको बेला एमालेमै बसे। एमालेले उनलाई मधेश प्रदेशको प्रमुख नेतामध्येक एकका रुपमा पनि भूमिका दियो। तर, त्यहाँ उनी टिक्न सकेनन्।
प्रतिनिधि सभा निर्वाचनको उम्मेदवारी दिने दिन एमालेबाट विद्रोह गरेर स्वतन्त्र उम्मेदवारी दिए। उनले एमालेले जसपासँग गरेको तालमेलको विरोध गर्दै पार्टी परित्याग गरेको घोषणा गरे। जसपाले मधेशमा दिएका सबै उम्मेदवारीविरुद्ध स्वतन्त्र उम्मेदवार खडा गरे। मधेश प्रदेश सभातर्फ निर्वाचित ६ जना स्वतन्त्र सांसद जिताउन साहकै भूमिका रहेको बताइन्छ। तर, उनीहरूले साहलाई साथ दिन्छन् दिँदैनन्, त्यो भने हेर्न बाँकी नै छ।
साहले आफूनिकट स्वतन्त्र सांसदहरूसँग छलफल अगाडि बढाएका छन्। तर, तत्कालै नयाँ पार्टी खोल्ने चर्चामा भने सत्यता नभएको साहको दाबी छ। ‘के गर्ने भनेर भर्खर छलफल प्रारम्भ गरेको छु। अहिले नै यो वा त्यो भन्ने छैन। राजनीतिमा संगठन महत्त्वपूर्ण कुरा हो’, साहले नेपाल लाइभसँग भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
