काठमाडौं– चितवनको खहरे खोलाको पानी ल्याउन भरतपुर महानगरपालिका–१ रामनगरका स्थानीय श्रमदानमा जुटेका छन्। भरतपुर–२९ स्थित खहरे खोलाको पानी रामनगर, ठिमुरा र देवघाट क्षेत्रमा ल्याउने योजनाका साथ स्थानीयवासी १ सातादेखि श्रमदानमा जुटेका हुन्।
पानी ल्याउन ट्याङ्की र पाइप बिच्छयाउनका लागि झण्डै ५ किलोमिटर क्षेत्रमा झाडी सफा गर्ने काम सकिएको छ। भरतपुर महानगरपालिका–१ अन्तर्गत पर्ने रामनगरका बासिन्दाले शुद्ध पानी पिउन नपाएको वर्षौं भइसक्यो। रामनगरमा खानेपानी ल्याउनका लागि चितवन क्षेत्र नम्बर २ बाट निर्वाचित प्रतिनिधिसभा सदस्य रवि लामिछानले १० दिनअघि श्रमदान अभियानको सुरुआत गरेका थिए।
सहजरुपमा पानी पिउन नपाएको समस्या थाहा पाएपछि सांसद लामिछानेले रामनगरमा खानेपानी व्यवस्थापनका प्रतिनिधि र स्थानीयसँग छलफलसमेत गरेका थिए। लगत्तै उनकै नेतृत्वमा श्रमदान अभियान सुरु भएको हो।
२०४९ चैतमा नेपाल र जापान सरकारको सहकार्यमा भरतपुर खानेपानी विस्तार आयोजनाको सुरुआत भएको थियो। त्यसबेला रामनगरमा ४ वटा पानी ट्याङ्की निर्माण गरिएका थिए। जुगेडीबाट पानी उक्त क्षेत्रमा ल्याएर भरतपुरका विभिन्न स्थानसम्म वितरण हुने गर्दथ्यो।
द्वन्द्वकालपछि धेरै संरचना नष्ट भएपछि खानेपानी ट्याङ्की क्षेत्र झाडीमा परिणत भएको थियो। अहिले सोही ठाउँमा सरसफाई गर्दै खानेपानीका लागि पहल भइरहेको छ।
स्थानीय सीता भट्ट नगरवासीको मुख्य समस्या पानीको रहेको बताउँछिन्। ‘इनारको पानी खान बाध्य छौँ,’ उनले भनिन्। हाल दैनिक १०० जना जनश्रममा जुटेका उनले बताइन्।
स्थानीय राधा कुँवर र भोलादेवी कुँवर गुप्ता पनि घरको काम छाडेर जनश्रममा जुटेको बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
