काठमाडौं– अर्जेन्टिनी गाेलकिपर इमिलियानाे मार्टिनेजले डच टाेलीकाे दुई पेनाल्टी राेकेपछि दक्षिण अमेरिकी राष्ट्रले ८ वर्षअघिकाे पुरानाे नतिजालाई दाेहर्याउँदै विश्वकपकाे सेमिफाइनलमा प्रवेश गरेकाे छ।
निर्धारित समयकाे खेल २–२ गाेलकाे बराबरीमा राेकिएपछि दुवैतर्फबाट थप गरिएकाे अतिरिक्त समयमा पनि कुनै नतिजा निस्किएन। पेनाल्टीमा अर्जेन्टिना ४–३ गाेलले विजयी हुँदै छैटाैं पल्ट विश्वकपकाे सेमिफाइनल प्रवेश गर्याे।
सन् २०१४ काे विश्वकपकाे सेमिफाइनलमा पनि नेदरल्याण्ड्सलाई पेनाल्टी सुटआउटमा पराजित गर्दै अर्जेन्टिना फाइनल प्रवेश गरेकाे थियाे।
अर्जेन्टिनाका लागि लाउटाराे मार्टिनेजले पाँचाै तथा विजयी पेनाल्टी गाेल हानेका थिए।
मार्टिनेजले डच कप्तान भान डायक र स्टिभन बर्गहजकाे सुरुवातकाे दुई पेनाल्टी राेकेर अर्जेन्टिनालाई बलियाे अवस्थामा पर्याएका थिए। अर्जेन्टिनाबाट एक मात्र पेनाल्टी इन्जाे फर्नान्डेजले मिस गरे। उनले पाेलभन्दा बाहिर पेनाल्टी हानेका थिए।
नेदरल्याण्ड्सका लागि टेउन कप्मेर्न्स, वाउट वेगहर्स्ट र लुक डे जङले पछिल्लाे तीन वटा गाेल लगातार हानेका थिए। इन्जाेले चाैथाे पेनाल्टी मिस गरेकाे अवस्थामा अर्जेन्टिना पनि दबाबमा थियाे। तर मार्टिनेजले अन्तिम पेनाल्टीमा गाेल गर्दै आफ्नाे देशलाई सेमिफाइनलकाे बाटाे देखाए।
निर्धारित ९० मिनेटकाे खेल निकै नाटकीय रह्याे। अर्जेन्टिनाले ७३ मिनेटमा बनाएकाे २ गाेलकाे अग्रतालाई डच टाेलीले २७ मिनेटमा फर्कायाे। दाेस्राे हाफमा दुवै टाेलीले फिजिकल खेल खेल्दा रेफ्रिले १५ वटा पहेँलाे कार्ड देखाउनु परेकाे थियाे।
अर्जेन्टिनाले डिफेन्डर नावेल माेलिनाकाे गाेलमा ३५ मिनेटमा अग्रता लियाे। लिओनल मेसीले टाइट एङ्गलबाट डिबक्समा निकालेकाे थ्रु पासमा माेलिनाले विश्वकपकाे पहिलाे गाेल गरे।
अर्जेन्टिनाका लागि दाेस्राे गाेल मेसीले नै गरे। अकुनालाई डिबक्सभित्र डच डिफेन्डरले लडाएपछि प्राप्त पेनाल्टीकाे अवसरलाई मेसीले ७३ मिनेटमा गाेल गर्दै अग्रतालाई दाेहाेराे बनाएका थिए।
पहिलाे हाफमा अर्जेन्टिनी गाेल पाेस्टमा एउटा पनि आक्रमण बुन्न नसकेकाे नेदरल्याण्ड्सले दाेस्राे हाफमा ४ खेलाडी परिवर्तन गर्याे र खेलकाे अन्त्यतिर उत्कृष्ट पुनरागमन गर्याे।
अतिरिक्त खेलाडीकाे रुपमा मैदान प्रवेश गरेका वाउट वेगहर्स्टले दुवै गाेल फर्काए। माम्फेज डिपेइको स्थानमा ७८ मिनेटमा प्रवेश गरेका वाउटले पाँच मिनेटभित्रै पहिलो गोल गरेका थिए।
उनले ८३ मिनेटमा स्टेभन बर्गहजको पासमा हेडिङ गोल गरेका थिए। बर्गहज पनि दोस्रो हाफपछि मैदानमा प्रवेश गरेका थिए। निर्धारित ९० मिनेटको खेल सकिएर थप गरिएको ११ मिनेटमा प्राप्त फ्रिकको अवसरलाई पनि नेदरल्याण्ड्सले सदुपयोग गर्याे।
टेउन कप्मेर्न्सले डिबक्स नजिकैबाट हानेको फ्रिककमा डिबक्सभित्र रहेका वाउटले दोस्रो गोल गरे। निर्धारित समयकाे खेल बराबरी भएपछि अतिरिक्त समयकाे अन्त्यतिर अर्जेन्टिनाले गाेलकाे ३–४ वटा अवसर गुमाएकाे थियाे।
पेनाल्टी सुटआउटमा अर्जेन्टिनाका लागि लिओनल मेसीले फेरि अर्काे गाेल गरे। उनी पहिलाे पेनाल्टी हान्न आएका थिए। दाेस्राे गाेल लियान्द्राे पार्देसले गरे। तेस्राे गाेल गाेन्जालाे माेन्टियलले गरेका थिए। अर्जेन्टिनाले पाँच मध्ये ४ वटालाई गाेलमा परिणत गरेकाे थियाे।
अर्जेन्टिना पहिलाे दक्षिण अमेरिकी राष्ट्रकाे रुपमा कतार विश्वकपकाे सेमिफाइनल प्रवेश गरेकाे हाे। यसअघि पाँच पल्टकाे च्याम्पिनय ब्राजिल पेनाल्टी सुटआउटमै क्राएसियासँग पराजित भएर बाहिरिएकाे थियाे। अब अर्जेन्टिनाकाे सेमिफाइनल भिडन्त क्राेएसियासँग हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
